გუშინ იტალიურმა გამოცემამ „Corriere dello Sport“ საინტერესო ინფორმაცია გაავრცელა. აღმოჩნდა რომ „ნაპოლის“ შეძენით რამდენიმე ამერიკული საინვესტიციო ფონდია დაინტერესებული და ხვიჩა კვარაცხელიას ამჟამინდელ გუნდზე დაკვირვება დაიწყო.
თურმე ამერიკელ ინვესტორებს ძალიან მოსწონთ კლუბის პრეზიდენტი, აურელიო დე ლაურენტისის ხედვა და მუშაობა. მისი წარმატებული ნაბიჯები ერთ-ერთი მიზეზი გახდა, რატომაც ფონდებმა კლუბს თვალი დაადგეს. გამოცდილმა პრეზიდენტმა ბოლო წლებში „ნაპოლისთვის“ სერიოზული მარკეტინგული გარიგებები დადო – შეუთანხმდა „Emporio Armani“-ს, ხოლო „Amazon“-თან სასპონსორო ხელშეკრულება გააფორმა. ამას გარდა, იტალიურ მედიაში დაიწერა, რომ „Apple“-ს გენერალური დირექტორი ტიმ კუკი ნეაპოლში სტუმრობისას დე ლაურენტისს რამდენჯერმე შეხვდა.
თუმცა, საეჭვოა, რომ ლაურენტისი წარმატების გზაზე მდგომ „ნაპოლის“ შეელიოს. 73 წლის დე ლაურენტისმა ჯერ კიდევ 2019 წელს კლუბი არ გაყიდა და უარი 900 მილიონი ევროს შემოთავაზებაზე განაცხადა.
იტალიური გამოცემების მტკიცებით, შეთავაზება მალე გაკეთდება, თუმცა კლუბის ამჟამინდელი მფლობელისაგან ალბათ უარს მიიღებენ.
საქართველოს მორაგბეთა ეროვნული ნაკრები კი მსოფლიო რეიტინგში ერთი საფეხურით დაწინაურდა. ეს არის შედეგი ნოემბრის ტესტებში უელსთან საგარეო გამარჯვების, ისევე, როგორც გასულ ზაფხულს ბათუმში „ექვსი ერის“ კიდევ ერთი წევრის, იტალიის ნაკრების დამარცხებით განპირობებული.
ცხადია, არ შეიძლებოდა, მსოფლიო სარაგბო ელიტის ორ წარმომადგენელთან გამარჯვებას უკვალოდ ჩაევლო. ამჟამად „ბორჯღალოსნები“ მე-14 ადგილზე იმყოფებიან 75.19 ქულით. ჩვენს წინ იტალიაა (75.95), ხოლო შემდეგ – ფიჯი (74.84).
ორი დღის წინ გამოცემამ „Sydney Morning Herald“ საყურადღებო „ნიუსი“ გაავრცელა. 2023 წლის მსოფლიო თასის შემდეგ ედი ჯონსი ინგლისის ნაკრების მთავარი მწვრთნელის პოსტს დატოვებს. წინასწარი ინფორმაციებით ის ფრანგულ „რასინგ 92“-ს ჩაუდგება სათავეში ან იაპონიის ეროვნული გუნდის კონსულტანტი გახდება.
ავსტრალიელი ჟურნალისტების მტკიცებით ახლა მას ორი ახალი ვარიანტი გამოუჩნდა. ინგლისელთა ამჟამინდელ დამრიგებელს თვალი ამერიკელებმა დაადგეს და ნაკრების ჩაბარება შესთავაზეს. ამ დღეებში მოლაპარაკება მიმდინარეობს და თუ მხარეებმა შეთანხმებას მიაღწიეს, რვაწლიანი კონტრაქტი გაფორმდება. ასეთ შემთხვევაში ჯონსი აშშ-ის ნაკრებს 2031 წლის საშინაო მსოფლიო თასისთვის მოამზადებს.
მაგრამ ედი ჯონსს თურმე საქართველოს რაგბის კავშირიდანაც დაუკავშირდნენ და „ბორჯღალოსნების“ გაწვრთმა შესთავაზეს. ედი ჯონსი მსოფლიო რაგბში ერთ-ერთ ყველაზე ავტორიტეტულ მწვრთნელად ითვლება და თუ საქართველოში მუშაობას დაყაბულდება, ჩვენი ეროვნული გუნდის მომავალი წარმატებებისათვის ეს წინ გადადგმული ნაბიჯი იქნება. საქართველოს რაგბის კავშირს ამ ინფორმაციაზე ჯერ ოფიციალური განმარტება არ გაუკეთებია.
მსოფლიო ფეხბურთისაგან მოკვეთილმა რუსეთის ნაკრებმა აზიური ტურნე დაასრულა. გუნდს რომელსაც საერთაშორისო ტურნირებზე მონაწილეობის მიღება აკრძალული აქვს და აზიელთა გარდა მასთან ამხანაგურადაც კი თამაშის სურვილი არავის აქვს.
ვალერი კარპინის გაწვრთნილმა გუნდმა ჯერ ბიშკეკში ტაჯიკეთთან 0:0 ითამაშა, შემდეგ კი ამავე ანგარიშით ტაშკენტში უზბეკეთის ეროვნულ გუნდს დაუზავდა. მანამდე რუსებმა სტუმრად ყირგიზეთს მოუგეს – 2:1.
საინტერესოა რომ უზბეკეთთან დაპირისპირებაში სლავთა გუნდს გიორგი ჯიქია კაპიტნობდა. რუსებს წაგებაც შეეძლოთ. შეხვედრის ბოლო წუთზე მასპინძელთა თავდამსხმელი მეტოქის საჯარიმოში წააქციეს, მაგრამ ყაზახმა მსაჯმა დინიარ სახიმ პენალტის დანიშვნა საჭიროდ არ მიიჩნია.
ამასობაში, გამოცემა „Calciomercato“-ს ინფორმაციით, „გალათასარაის“ არგენტინელი მაურო იკარდის გამოსყიდვა სურს.
29 წლის თავდამსხმელი სტამბოლურ გუნდში „პსჟ“-დან იჯარით თამაშობს. თურქული კლუბი მზადაა, ფეხბურთელის სანაცვლოდ 30 მილიონი ევრო გაიღოს.
მიმდინარე სეზონში იკარდიმ თურქეთის სუპერლიგაში 6 შეხვედრაში მიიღო მონაწილეობა, სადაც 4 გოლი გაიტანა და 3 შედეგიანი გადაცემა გააკეთა.
ეს ის მარიო იკარდია, რომელიც ადრე მილანის „ინტერში“ დამაჯერებლად ასპარეზობდა, შემდეგ კი მეუღლესა და ამავდროულად მენეჯერ ვანდა ნარასთან პირადი ურთიერთობა აერია და საფეხბურთო კარიერის დაღმასვლაც დაეწყო.
ავტორი
