ერთ შემთხვევაში გირგვლიანის საქმეზე სააკაშვილს მიუსაჯეს პატიმრობა, მაგრამ გირგვლიანის საქმის მოსამართლეებს – მურუსიძესა და გიგიტაშვილს ხმა არ გავეცით, პირიქით, ისინი დღეს არიან დაწინაურებული, წახალისებული, შეიძლება ითქვას, რომ დღეს ისინი არიან უვადო მოსამართლეები სწორედაც იმის გამო, რომ მათ შეასრულეს ხელისუფლების დაკვეთა,- ამის შესახებ ყოფილმა სახალხო დამცველმა უჩა ნანუაშვილმა „პალიტრანიუსის“ გადაცემა „ნიუსრუმში“ მიხეილ სააკაშვილის პატიმრობასა და ჯანმრთელობის მდგომარეობასთან დაკავშირებით საუბრისას განაცხადა.
მისივე განმარტებით, მსგავსი ორმაგი მიდგომა ამ პროცესში კიდევ უფრო მეტ კითხვის ნიშნავს აჩენს.
„თუ ადამიანი ცუდად არის, მას უნდა უმკურნალოს სახელმწიფომ და აბსოლუტურად ყველაფერი უნდა გააკეთოს იმისთვის, რომ პატიმარს შეუნარჩუნდეს ჯანმრთელობა და ამ კუთხითაც არის ბევრი კითხვის ნიშანი. არის კითხვის ნიშნები იმის გამოც, რომ რეალურად პროცესის მიმართ ნდობა აღარ არსებობს, იყო ძალიან ბევრი ურთიერთსაწინააღმდეგო განცხადება, მათ შორის, სამედიცინო წრიდანაც. რა თქმა უნდა, ამ ყველაფერმა კიდევ უფრო მეტად დააზარალა ეს საკითხი. მეორე მხრივ, ვხედავთ, რომ ადამიანს უნდა სასამართლო პროცესზე დასწრება და ის ამას ვერ ახერხებს, მაშინ როცა ადრე პირიქით ხდებოდა, მას სურდა დასწრება და უარს ეუბნებოდნენ სხვადასხვა მოტივით, რაც ასევე იყო კანონდარღვევა“,- განაცხადა ნანუაშვილმა.
მისივე განმარტებით, სააკაშვილის ირგვლივ პროცესები მიმდინარეობს ისე, რომ ხელისუფლება კვლავ ხელმძღვანელობს პოლიტიკური მოტივებით. ნანუაშვილის შეფასებით, ეს არის პოლიტიკური ანგარიშსწორება.
„ჩვენ ვხედავთ, რომ მთლიანად ეს პროცესი მიმდინარეობს იმ ფონზე, როდესაც სამწუხაროდ, ხელისუფლება კვლავ ხელმძღვანელობს პოლიტიკური მოტივებით. მისთვის პოლიტიკური ანგარიშსწორება უფრო მნიშვნელოვანია და ყველაფერს იყენებს იმისთვის, რომ ეცადოს და გაუსწორდეს პოლიტიკურ ოპონენტს. ხელისუფლებას უნდა გაეკეთებინა აბსოლუტურად ყველაფერი, რომ მაქსიმალურად ყოფილიყო დაცლილი ეს პროცესი სპკულაციებისგან, პოლიტიზაციისგან და მას ჰქონდა ამის რეალური შესაძლებლობა, რადგან ფაქტია, ვერავინ უარყოფს, რომ სააკაშვილის მმართველობის დროს ჰქონდა უფლებების დარღვევას ადგილი, ჰქონდა სისტემურ დანაშაულებს ადგილი, თუნდაც იმაზე, რაზეც არის გადაწყვეტილებები გამოტანილი, თუნდაც იგივე გირგვლიანის საკითხთან დაკავშირებით, წამების ფაქტები იქნება ეს თუ მიტინგების დარბევა, იყო ძალიან ბევრი ბრალდება რასთან დაკავშირებითაც უნდა ჩატარებულიყო ობიექტური გამოძიება და ყველა კითხვას უნდა გასცემოდა პასუხი.
ეს არის პოლიტიკური ანგარიშსწორება, ხელისუფლება უსწორდება პოლიტიკურად მთავარ მოწინააღმდეგეს, რომელიც 10 წელზე მეტია, რაც რეალურად ხელისუფლებაში აღარ არის. მიუხედავად ამისა, ეს ძალა კვლავ რჩება ხელისუფლების ერთ-ერთ მთავარ პოლიტიკურ ოპონენტად და შეიძლება ითქვას, რომ მთავარი საფრთხე ხელისუფლების წარმოდგენით სწორედაც იყო სააკაშვილი“,– განაცხადა ნანუაშვილმა.
წყარო: ipn
