რუსეთში, პრიმორსკის მხარეში, MiG-31-ის ტიპის ავიაგამანადგურებელი ჩამოვარდა – ამის შესახებ ინფორმაციას რუსული გამოცემა TASS ავრცელებს, საგანგებო სიტუაციების სამსახურზე დაყრდნობით.
გამოცემის ცნობით, არავინ დაშავებულა, რადგან ეკიპაჟის წევრებმა შეჯახებამდე ევაკუაცია მოასწრეს.
“MIG – 31 აფრენიდანვე მალე, სოფელ ალესკევას სიახლოვეს ტყეში ჩამოვარდა. წინასწარი მონაცემებით მსხვერპლი არ არის.
პილოტების მდგომარეობას იკვლევენ. წინასწარი მონაცემებით, მსხვერპლი და ნგრევა არ მოყოლია“, – აცხადებს რუსეთის საგანგებო სიტუაციების სამსახური.
TASS ინფორმაციით, მომხდარის შესახებ ინფორმაცია აღმოსავლეთის სამხედრო ოლქის პრესსამსახურშიც დაუდასტურეს.
“2 დეკემბერს, პრიმორსკის მხარეში, დაგეგმილი სასწავლო ფრენის დროს, თვითმფრინავი MiG-31 ჩამოვარდა. ეკიპაჟი გადარჩა“, – აღნიშნეს პრესსამსახურში.
როგორც რაიონში აცხადებენ, შემთხვევის ადგილზე სამძებრო–სამაშველო სამსახურის შვეულმფრენები მი-8 იყო გაგზავნილი.
“ფრენა საბრძოლო მასალის გარეშე განხორციელდა. თვითმფრინავი უკაცრიელ ადგილას ჩამოვარდა, ადგილზე არანაირი დაზიანება არ ყოფილა. წინასწარი ინფორმაციით, ავარიის მიზეზი ტექნიკური გაუმართაობა იყო“, – თქვეს აღმოსავლეთის სამხედრო ოლქის პრესსამსახურში
MiG-31 არის საბჭოთა, ახლა უკვე რუსული, ორადგილიანი, შორ მანძილზე მოქმედი ზებგერითი გამანადგურებელი. თვითმფრინავი შეიარაღებულია ექვსლულიანი 23 მმ–იანი ქვემეხით, MiG-31-ის სხვადასხვა მოდიფიკაცია შეიძლება აღიჭურვოს სხვადასხვა ტიპის ჰაერ–ჰაერი და ჰაერი–ზედაპირითი რაკეტებით, საჰაერო ბომბებით და ჰიპერბგერითი აერობალისტური რაკეტებით.
ავტორი
