24 ნოემბერს ოზურგეთის მუნიციპალიტეტის საკრებულოს მორიგი სხდომა შედგა.
როგორც წესი, საკრებულოს თავმჯდომარემ დავით დარჩიამ დეპუტატებს დღის წესრიგით გათვალისწინებული თერთმეტი საკითხი გააცნო. შემდეგ კი ყველას მოსმენისკენ მოუწოდა.
საკრებულოს ნაციონალმა დეპუტატმა თათია ნიკოლაშვილმა წარმოადგინა რამდენიმე საკითხი, რომლის უგულებელყოფაშიც ბრალი საკრებულოს დასდო. ოზურგეთის საჭიდაო დარბაზი, რაგბის მოედანი სოფელ ბახვში, ერთ-ერთ პატარა ღელეზე ხიდის გაკეთების პრობლემა _ ამ საკითხების ირგვლივ მან ფოტო მტკიცებულებებით დაიწყო საუბარი:
_ საჭიდაო დარბაზი, რომელსაც არაერთი სპორტსმენი აღუზრდია, სავალალო მდგომარეობაშია. რაც შეეხება რაგბის სტადიონის პრობლემას, 2017 წლიდან ვისმენთ მხოლოდ დაპირებებს. თავის დროზე, არჩილ თალაკვაძემ გასცა დაპირება დახმარების თაობაზე _ ის რაგბის კავშირის საპატიო პრეზიდენტიცაა. თუმცა, რაგბის სტადიონზე სავალალო მდგომარეობაა, _ თქვა ნიკოლაშვილმა და მოითხოვა, განემარტათ, სად გაქრა თანხები, რატომ ჭიანურდება ასე დიდხანს აღნიშნული ინფრასტრუქტურული სამუშაოების ჩატარება. მან ყველა საკითხზე საუბრისას წარმოადგინა ფოტომასალა.
ნიკოლაშვილმა, ასევე, ვრცლად ისაუბრა სოფელ ბახვში გასაკეთებელი პატარა ხიდის შესახებ, რომლის მიმდებარედ მხოლოდ ერთი ოჯახი ცხოვრობს. მან თქვა, რომ იქვე, მდინარიდან ამოღებული ღორღი დაყარეს “საკრებულოს გაგზავნილმა კაცებმა” და სამწუხაროდ, მასში მანქანა ისე ჩაეფლო, რომ სამაშველო სამსახურის გამოძახება გახდა საჭირო.
თათია ნიკოლაშვილის კრიტიკას საკრებულოს თავმჯდომარის მოადგილემ, ლავრენტი ბიგვავამ უპასუხა:
_ როცა საკრებულოს წევრი კითხულობს, სად წავიდა თანხები, წინ უდევს მესამე კვარტლის შესრულებული ანგარიში. აქ გაწერილია თითოეული თეთრი ზუსტად, თუ სად წავიდა ეს თანხები. რაგბის სტადიონის პრობლემებს რაც შეეხება, მოქმედმა ხელისუფლებამ ყველაფერი გააკეთა, რომ ეს საქმე დაძრულიყო. ეს არის წლების წინ შექმნილი პრობლემა. იმ ე. წ. ჭაობიდან ამოსასვლელად ყველაფერი გაკეთდა. ახლა მიმდინარეობს ტექნიკური დოკუმენტაციის მოწესრიგება და სრულფასოვანი სამუშაოების გახორციელება. არქიტექტურული ნახაზი მომზადებულია. ოღონდ ჯერ უნდა მოხდეს განფასების პროცესის დასრულება. თუ განფასება არ მოხდა, ისე არ დაიწყება! მომავალ წელს დაიწყება საუკეთესოდ აღჭურვილი სტადიონის მშენებლობა და უკვე წლის ბოლოს ოზურგეთს ექნება საუკეთესო რაგბის სტადიონი, _ თქვა მან.
ფრაქცია “ქართული ოცნების” თავმჯდომარემ, მარიკა ჩხიკვიშვილმა ნიკოლაშვილს ირონიულად მიულოცა პარტიის თავმჯდომარეობა და შემდეგ ასეთი განმარტება გააკეთა:
_ დიახ, როცა ერთი წლის წინ, როცა თანამდებობაზე მოვიდა ავთანდილ თალაკვაძე, პირველი საკითხი, რაც პრიორიტეტებში შევიტანეთ, ეს იყო რაგბის კავშირის განვითარება. დიახ, რაც ახლა კეთდება, არის არჩილ თალაკვაძის დამსახურება! ძალიან დიდი ნონსენსია, როცა ქალბატონი თათია წინა სხდომებზე ტაშ-ფანდურას ეძახდა კულტურის და სპორტის ღონისძიებებს, ახლა კი ასე ლაპარაკობს, _ განაცხადა ჩხიკვიშვილმა.
საკრებულოს “ნაციონალმა” დეპუტატმა, რაინდი დუმბაძემ დასვა კითხვა, როდის მოხდება ლაითურში მრავალბინიანი სახლების გადახურვა, რომლებიც დანგრევის პირასაა:
_ მერის დაპირება იყო მრავალბინიანი სახლების გადახურვა. ოცი განცხადებაა შემოტანილი. რომელი განიხილეთ? _ ჰკითხა მან ხელისუფლების წარმომადგენლებს.
ამ ყველაფერს მოჰყვა ტრადიციული ყვირილი, ურთიერთშეურაცხყოფა: “მონის მონავ”, “ხელის ბიჭო”, “გაყვლიფეთ ყველაფერი”, “შეჭამეთ ოზურგეთი”, “გიჭერს რაღაც”, “შენ თავში გიჭერს და აგხსნი”, _ ისმოდა უცენზურო სიტყვები.
ამ ყველაფრის შემდეგ კი “ნაციონალმა” დეპუტატმა შალვა თავდიშვილმა არჩევნების პერიოდი გაიხსენა, სოფელ ძიმითში საარჩევნოდ ნაყიდი წყლის ავზების ფაქტი წამოაძახა სოფლის მაჟორიტარ ტიტე მგელაძეს. ამ უკანასკნელმა კი უთხრა, რომ ავზები კიდევ იდგმება და მომავალშიც დაიდგმება.
როგორც იქნა, ჩხუბი შენელდა და საკრებულოს 11 საკითხიდან, შვიდი, რომელიც უსახელო ქუჩების სახელდებას ეხებოდა, დადებითად გადაწყდა. ურეკში შვიდ უსახელო ქუჩას ეწოდა: “ძმობის”, “მთის ბროლის”, “თამარ მეფის”, “მაგნეტიტის”, “მეგობრობის”, “გაბრიელ ეპისკოპოსის” და “შოთა გოგუაძის” სახელი.
საკრებულომ მოისმინა და ცნობად მიიღო ინფორმაცია “ოზურგეთის მუნიციპალიტეტის 2022 წლის ბიუჯეტის მესამე კვარტლის შესრულების ანგარიშის” შესახებ.
საკრებულომ აღმასრულებელ ორგანოს უკან დაუბრუნა ოზურგეთის 2023 წლის ბიუჯეტის პროექტი, რაც კომისიების დასკვნების შესაბამისად იყო განხილული. ცნობილია, რომ კომისიების სხდომები, როგორც აქ თქვეს კანონმდებლობის შესაბამისად, ღია იყო მიმდინარეობის და შუქდებოდა, როგორც ვებგვერდზე, ასევე, გადაიცემოდა ღია ეთერში.
კიდევ ერთი მნიშვნელოვანი ფაქტი, რაც ამ საკრებულოს სხდომაზე მოხდა, იყო ის, რომ შედგა არჩევნები და საკრებულომ საფინანსო-საბიუჯეტო კომისიის თავმჯდომარედ, საკრებულოს წევრი, გელა ჩავლეშვილი აირჩია. მას აღნიშნული პოსტი აქამდეც ეჭირა.
მას შემდეგ, რაც საკრებულოს ბიურომ საფინანსო-საბიუჯეტო კომისიის თავმჯდომარის უფლებამოსილების შეწყვეტის თაობაზე ინფორმაცია ცნობად მიიღო, საკრებულომ ფარული კენჭისყრის გზით, იმავე საფინანსო-საბიუჯეტო კომისიის თავმჯდომარის არჩევნები გამართა. საკრებულოს ცხრა წევრის ინიციატივით, კომისიის თავმჯდომარის კანდიდატი, გელა ჩავლეშვილი, საკრებულოს ამავე სხდომაზე, 24 ხმით აირჩიეს.
საქმე იმაშია, რომ საკრებულოს ფრაქცია “ქართული ოცნების” ორმა დეპუტატმა _ ეროდი გორდელაძემ და გელა ჩავლეშვილმა ახლახან ოფიციალურად დატოვეს აღნიშნული ფრაქცია. მათ დაწერეს განცხადებები. ცნობილი გახდა, რომ ისინი სოზარ სუბარის “ხალხის ძალას” უერთდებიან. “გურია ნიუსთან” საუბარში ეს დაადასტურა კიდეც ეროდი გორდელაძემ.
გელა ჩავლეშვილის კვლავ სახელისუფლებო პარტიის, საკრებულოს ფრაქციის თავმჯდომარედ არჩევამ კი, გაამყარა აზრი, რომ “ხალხის ძალა” და “ქართული ოცნება” ერთი პარტიაა _ თქვეს ოპოზიციონერმა დეპუტატებმა.
“ნაციონალმა” დავით მჟავანაძემ ამჯერად ირონია არ დაიშურა _ ფორმალობა უწოდა ამ ფაქტს და სთხოვა სახელისუფლებო პარტიის წევრ დეპუტატებს, ოფიციალურად დაეფიქსირებინათ ეს ფაქტის.
სხდომაზე, რაც გამოკვეთილად დასანახი იყო, ორივე ძალა: “ქართული ოცნება” და “ერთიანი ნაციონალური მოძრაობა”, ერთმანეთს ნიშანს უგებდა, თუ როგორ ხდება მათი პარტიების დაშლა-დაყოფა და მერე ერთმანეთის მოკავშირეებად, ანუ ისევ ერთ ძალად დარჩენა.
ავტორი
