ა(ა)იპ ჩოხატაურის მუნიციპალიტეტის სკოლამდელი საგანმანათლებლო–სააღმზრდელო დაწესებულება ,,მომავალის“ ხელმძღვანელი, ნინო ბარამიძე „გურია ნიუსთან“ საუბრის დროს ამბობს, რომ ჯერ უცნობია, როდის დაიწყება ზამთრის არდადეგები საბავშვო ბაღებში, თუმცა, ვირუსების სიჭარბე ბაღებში აღსაზრდელების რაოდენობაზე აისახა.
“ვირუსები სჭარბობს და ეს აისახა საბავშვო ბაღებზეც”, _ გვითხრა ბარამიძემ.
ჩოხატაურის საზოგადოებრივი ჯანდაცვის ცენტრის ხელმძღვანელი, ნატო ჯიბუტი კი განმარტავს, რომ, ჯერჯერობით მუნიციპალიტეტში არ არის ისეთი დაძაბული ვითარება, როგორიც თბილისში. ჯიბუტის თქმით, ჩოხატაურში გრიპის ერთეული შემთხვევებია გამოვლენილი.
“ჯერჯერობით ჩოხატაურში არ არის ისეთი დაძაბული ვითარება, როგორიც თბილისში. გრიპის ერთეული შემთხვევები ვლინდება. რამდენიმე ბავშვი იყო მოთავსებული კლინიკაში. დეკემბრის ბოლოსთვის ველოდებით მდგომარეობის გამწვავებას გრიპის მხრივ. რაც შეეხება გრიპის ზოგად სიმპტომებს, მიმდინარეობს მაღალი ტემპერატურით, ყელის ტკივილით, ხველით, შესაბამისად, გრიპის ვირუსს რაც ახასიათებს ზოგადი ინტოქსიკაცია, სახსრების, კუნთების ტკივილი. მაღალი ტემპერატურა, იმის მანიშნებელია, რომ ძალიან აგრესიული ვირუსია, რაც ცირკულირებს ახლა საქართველოში”, _ ამბობს ჩვენთან საუბრისას ჩოხატაურის საზოგადოებრივი ჯანდაცვის ცენტრის ხელმძღვანელი ნატო ჯიბუტი.
ინფორმაციისთვის, ქვეყანაში, ძირითადად, ე.წ. ჰონგ–კონგის ვირუსი ცირკულირებს, რომელსაც შედარებით მძიმე მიმდინარეობა აქვს, განსაკუთრებით, მცირეწლოვნებისთვის.
რა მდგომარეობაა ლანჩხუთში, _ ამის გასარკვევად ლანჩხუთის საზოგადოებრივი ჯანდაცვის ცენტრის ხელმძღვანელ ნატო მენაღარიშვილს ვესაუბრეთ. მენაღარიშვილი აღნიშნავს, რომ გრიპის ან ნებისმიერი სხვა ვირუსული ინფექციისგან თავდასაცავად აუცილებელია პირბადე და დაავადების ქონის შემთხვევაში საზოგადოებრივი თავშეყრის ადგილებში სიარულისგან თავის შეკავება.
“უშუალოდ, იმას, რომ გრიპის ვირუსია, ლაბორატორიული დადასტურება სჭირდება. ჩვენ ყოველკვირეულად დაავადებათა კონტროლის ცენტრს ვაწვდით მონაცემებს, ზოგადად, მომართვიანობა რამდენია პაციენტების და მათ შორის, გრიპის საეჭვო ნიშნებით რამდენი ადამიანია. უნდა გითხრათ, რომ სეზონურად რაც არის ხოლმე მაჩვენებელი, ამ დროისთვის იმ მაჩვენებელს არ სცილდება. უშუალოდ გრიპის დიაგნოზით უფრო ნაკლებად, მაგრამ ვირუსული ინფექციები, რინოვირუსები, ადენოვირუსები და ა.შ. ზოგჯერ გართულებებით მიდის. მომართვიანობა, ზოგადად, გაზრდილია ამ რესპირატორულ ინფექციებზე, განსაკუთრებით, ბავშვთა ასაკში და მოზრდილებშიც. კოვიდის რაოდენობა საგრძნობლად შემცირებულია, თუმცა, ეს სეზონური ვირუსების რაოდენობა მომატებულია. შეიძლება, ამ პანდემიის ფონზე, რადგან კორონავირუსი დომინირებდა, ზოგადად, მოსახლეობას ნიღბები ეკეთა, ძალიან ცოტა იყო გრიპის ვირუსები, იმიტომ, რომ ნიღაბი იცავს. ახლა კორონავირუსი უკვე ძალას კარგავს და მცირე რაოდენობით ფიქსირდება. ნიღაბს აღარ იყენებენ. ვაქცინაცია დღემდე გრძელდება და კიდევ 10 დეკემბრამდე გახანგრძლივდა ყველა კატეგორიისთვის, მაგრამ მოსახლეობა დიდ აქტიურობას არ იჩენს, როგორც წესი. ამიტომ გრიპის შემთხვევები პანდემიის პერიოდთან შედარებით მომატებული არის, თუმცა, ზოგადი მაჩვენებელი იგივე რჩება. ვირუსისგან თავდაცვის ერთადერთი საშუალებაა ნიღაბი და აცრა. ორივეს საშუალება აქვს სახელმწიფოს, მთავარია, მოსახლეობამ გამოიჩინოს კეთილგონიერება. ნებისმიერი რეპირატორული ინფექციის დროს დაავადებულმა ადამიანმა უნდა იხმაროს პირბადე და არ უნდა გამოცხადდეს კოლექტიური თავშეყრის ადგილებში, როგორებიცაა: სამსახური, საბავშვო ბაღი ან სხვა დაწესებულება, რომ შემდეგ ინფექცია არ გავრცელდეს.
_ რა შემთხვევაში ხდება საჭირო გრიპის ვირუსის დროს კლინიკაში მოთავსება?
_ კლინიკაში მოთავსება ხდება ისეთ შემთხვევაში როცა ვირუსული ინფექცია გადადის ბაქტერიულში. ვითადება პნევმონია, ბრონქიტი, სუნთქვის უკმარისობა და რთულდება პაციენტის მდგომარეობა. მხოლოდ ტემპერატურა ან ცხელება თუ არის, რაც რამდენიმე დღეში გაივლის ის არ საჭიროებს კლინიკაში მოთავსებას. ამას წყვეტს მკურნალი ექიმი სიმპტომების მიხედვით.
_ რამდენად მარტივად გადააქვთ ბავშვებს ეს ვირუსი?
_ მეტ–ნაკლებად. ძირითადად, მომართვიანობა ახლა არის ამბოლატორიულად. მშობლები მაინც ყურადღებით არიან და ასე ვთქვათ, პირველივე ნიშნებისთანავე, მეორე თუ არა მესამე დღეს მაინც მიჰყავთ ბავშვი ექიმთან თუ სახლში პირველადი დახმარება არ არის ეფექტური. დროულად როცა ხდება მიმართვა, გართულებაც ნაკლებია. ამიტომ იშვიათი შემთხვევაა, რომ ბავშვებს დასჭირდეთ სტაციონარში მოთავსება, _ გვეუბნება ნატო მენაღარიშვილი.
ოზურგეთის საზოგადოებრივი ჯანდაცვის ცენტრში კი ამბობენ, რომ შემთხვევები სხვადასხვა ასაკის მოსახლეობაში ფიქსირდება. ზოგადი დამახასიათებელი სიმპტომების არასრულფასოვანი მკურნალობის შემთხვევაში კი, შეიძლება პაციენტის მდგომარეობა დამძიმდეს და ჰოსპიტალიზაცია გახდეს საჭირო.
“ოზურგეთის საზოგადოებრივი ჯანდაცვის ცენტრში მიმდინარე წლის მე-40 კვირიდან, მომავალი წლის მე-20 კვირის ჩათვლით წარმოებს გრიპისა და გრიპისმაგვარი დაავადებების ყოველკვირეული აღრიცხვა. სტატისტიკურად ყველაზე მეტად, შემთხვევათა რაოდენობამ მოიმატა ნოემბრის დასაწყისისათვის, ხოლო ამჟამად, შემთხვევათა რაოდენობა გახლავთ მომატებული, მაგრამ _ სტაბილური. შემთხვევები ფიქსირდება მოსახლეობის სხვადასხვა ასაკობრივ ჯგუფში, მათ შორის ბავშვთა ასაკში. ვირუსულ გრიპსა და სხვა გრიპისმაგვარ დაავადებებს საწყისი სიმპტომატიკა აქვთ მსგავსი, ძირითადად, ესაა: თავის ტკივილი, კუნთებისა და სახსრების ტკივილი, საერთო სისუსტე, ყელის ტკივილი, ხველა, ტემპერატურული რეაქცია, შედარებით იშვიათად _ დიარეა, ან გულისრევა. აღნიშნული სიმპტომები არასრულფასოვანი მკურნალობის პირობებში მძიმდება ბრონქიტით, პნევმონიითა და სუნთქვის უკმარისობით. აღნიშნულ დაავადებებს მაღალი კონტაგიოზურობის გამო, არასათანადო პრევენციულ სიტუაციაში შეუძლიათ გამოიწვიონ მასობრივი გავრცელება და ლოკალური ეპიდაფეთქებები.
გრიპი და გრიპისმაგვარი დაავადებები განსაკუთრებით საშიშია მცირე ასაკში, ხანდაზმულობის ასაკსა თანმხლები ქრონიკული დაავადებების დროს, ამიტომ ჩვენს მუნიციპალიტეტში, ისევე, როგორც ქვეყნის მასშტაბით, ყოველწლიურად, მატ შორის წელსაც ჩატარდა სეზონური გრიპის საწინააღმდეგო ვაქცინაცია ჯერ რისკ-ჯგუფებისათვის, ხოლო შემდგომ საქართველოს ყველა მოქალაქისათვის უფასოდ. აღნიშნული სეზონური ინფექციების მაღალი კონტაგიოზურობის გამო, უდიდესი მნიშვნელობა ენიჭება დროულ დიაგნოსტიკასა და პროფილაქტიკური ღონისძიებების დაცვას. უპირველესად, აუცილებელი გახლავთ, მოხდეს სიმპტომიანი პაციენტის ტესტირება კოვიდინფექციაზე, კოვიდსტატუსის დასადგენად. აღნიშნული ტესტირება ჩვენს მუნიციპალიტეტში მიმდინარეობს შესაბამის სამედიცინო დაწესებულებებში მათ შორის ოზურგეთის ჯანდაცვის ცენტრში სახელმწიფო დაფინანსებით.
რაც შეეხება პრევენციულ ღონისძიებებს, ყველა ზემოთაღნიშნული დაავადების შემთხვევაში გახლავთ, უპირველესად, სიმპტომების გამოვლენისთანავე დისტანცირება და პაციენტის სივრცობრივი იზოლირება დანარჩენებისაგან, ვიზიტი შესაბამის სპეციალისტთან (ინფექციონისტი, ოჯახის ექიმი), პირადი დაცვის საშუალებათა გამოყენება, ხელების, ხველისა და ცემინების ეტიკეტის დაცვა, სველი წესით დალაგება, სადეზინფექციო საშუალებათა გამოყენებით, ხშირი განიავება, განსაკუთრებით ბავშვთა სააღმზრდელო დაწესებულებებსა და ხანდაზმულთა სახლებში, სამედიცინო პერსონალის მხრიდან სიმპტომებზე მონიტორინგი, სრულფასოვანი მკურნალობა, ჯანდაცის სპეციალისთა ჩართულობა, რათა თავიდან ავიცილოთ გრიპისა და გრიპისმაგვარი დაავადებების მასიური გავრცელების საფრთხე”, _ გვითხრა ეპიდემიოლოგმა ელზა სიმონიშვილმა.
ავტორი
