“ეს თუ არ აიღეთ და ამაზე დაყარეთ ისევ ტალახი, დავიღუპეთ! პრობლემური ქუჩაა… საჭიროებს მოხრეშვას. არა ლოდების დაყრას! არა ტალახის დაყრას! მოწმენდის მერე უნდა მოიხრეშოს მსხვილი ხრეშით. ამ ტალახში არ დაყაროთ, გთხოვთ! საორხელოდ ნუ გაიხდით საქმეს! მოგვხედეთ!!!” _ სოციალური ქსელით ამ სიტყვებით მიმართავს ადგილობრივ ხელისუფლებას ლანჩხუთში, სოფელ აკეთის მკვიდრი.
ზოგადად, აკეთის ადმინისტრაციულ ერთეულში შემავალი სოფლებისა და იქაური მოსახლეობისთვის გზასთან დაკავშირებული პრობლემები არახალია, თუმცა, როგორც ირკვევა, ამ კონკრეტულ შემთხვევაში, პრობლემა აკეთში წყლის სისტემების მოსაწყობად მიმდინარე სამუშაოებმა წარმოშვა და სოფლის გზებზე არსებული ისედაც არასახარბიელო მდგომარეობა კიდევ უფრო გაამწვავა.
“აქ გადაადგილება შეუძლებელია!
ყველამ უნდა ამოიღოს ხმა და არა ერთმა და ორმა. თითქმის ყველგან ასეთი მდგომარეობაა ამ გადათხრების შემდეგ.
ხმის ამოღება არავის არ უნდა. ჩუმად ადევნებენ თვალს, რამდენიმე ადამიანი როგორ გამოთქვამს ხმამაღლა მთელი თემის სათქმელს. იჯექით, მეგობრებო თბილად არ გაცივდეთ.
ასეა კეთილსინდისიერი მოსახლეობის ხარჯზე და ზურგზე გადადის მაგათი უგულოდ გაკეთებული საქმეები.
მარტო ერთგან კი არა, იგივე მდგომარეობაა თითქმის ყველგან, გადაადგილება შეუძლებელია. ასე ატალახებულ გზას ნუ დაგვიტოვებთ გთხოვთ! ასეთი არც წყალი გვინდა, დაღუპეს სოფელი, არც ერთ კუთხეში არ შეისვლება.
ერთი გაკეთდეს და მეორე გაფუჭდეს, ასე სოფელიც ზარალდება და ხალხიც… მართალია, ყველაფერი ერთად ვერ გამოვა… იმედია, ყველაფერი კარგად და ხალხის სასარგებლოდ გაკეთდება.
ყველა სოფელში რომ ერთდროულად ათხარეს, მაგის ბრალია, უნდა წაყოლოდნენ რიგრიგობით და რასაც გაწმენდნენ, ის გაეკეთებინათ.
ძალიან უგულოდ აკეთებენ. გთხოვთ, რომ გულისყურით მოეკიდოთ საქმეს!
გაჩნდა იმის იმედი, რომ ნორმალურად გაკეთდებოდა ყველაფერი. ასე თუ უნდა ვიწვალოთ ყველა უბანი, ყველა მილი, ვპოსტოთ ყველა დეტალი, არ ვიცი რა.
ხომ შეიძლება, რაც კეთდება, გაკეთდეს ნორმალურად, რომ არ გამოიწვიოს ხალხის გაღიზიანება.
რატომ არ გინდათ, რომ კმაყოფილი დარჩეს ხალხი, მადლიერი იყოს თქვენი გაკეთებული საქმეებით. დავიღალეთ არაკეთილსინდისიერად გაკეთებული, შუა გზაზე მიტოვებული საქმეებით.
იქნებ, მოაგვაროთ საქმე ბოლომდე, ნუ დატოვებთ ასე, სირცხვილია!” _ მიმართავს პრობლემით შეწუხებული აკეთის მოსახლეობა მათ, ვისაც ამ საქმის მოგვარება ხელეწიფებათ.
აკეთის ადმინისტრაციული ერთეულის წარმომადგენელი ლანჩხუთის საკრებულოში ემზარ თედორაძე ამბობს, რომ პრობლემის თაობაზე, რაზეც მოსახლეობა საუბრობს, ინფორმირებულია და კარგად იცის იქ შექმნილი ვითარება, თუმცა, დასძენს, რომ სანამ წყლის სისტემების მოსაწყობად მიმდინარე სამუშაოები არ დასრულდება, მანამ გზასთან დაკავშირებული პრობლემა ვერ მოგვარდება:
“ვიცი ამ პრობლემის შესახებ. დილემის წინაშე ვართ. ისევ გადასათხრელია. ჰოდა, დაყარო ხრეში, კიდევ გადათხარონ, არ გამოდის. პრობლემაა, სანამ საბოლოო სახე არ ექნება ამ სამუშაოებს. ნაწილობრივ შეიძლება მოგვარდეს რაღაც, რომ გზა გავლადი იყოს, სხვანაირად არ გამოვა არაფერი. მანქანები, ტრაქტორი, დიდი გამავლობის მანქანები მუშაობენ და სხვანაირად არ გამოდის, ვერანაირად ვერ გააკეთებ, ისეთი ამბავია, სანამ სამუშაოები ბოლომდე არ დასრულდება”, _ ამბობს სოფლის მაჟორიტარი “გურია ნიუსთან” საუბარში.
ავტორი
