დღეს, ოზურგეთში, სახელმწიფო თეატრის წინ, ცენტრალურ მოედანზე, ორ საათზე დაიწყო საახალწლო ღონისძიების ცერემონიალი.
ზაფხულის დღეს დამსგავსებულმა დეკემბრის დილამ, დღეს გადამწყვეტი სიტყვაც კი „თქვა“! მიუხედავად იმისა, რომ სარეაბილიტაციო სამუშაოები ჯერ არ არის დასრულებული, მოედნის მოწესრიგება და ნაძვის ხის აღმართვა დროულად და ლამაზად მოხერხდა. აქ ადგილობრივი მეწარმეების მიერ, მათივე ნაწარმის, ხელნაკეთი ნივთების გამოფენა-გაყიდვა ადრიანად დაიწყო. კვების ობიექტებმა თავიანთი ნუგბარი ტკბილეული გამოფინეს. გურული ვაზის მოტრფიალემ და ღვინის ოსტატმა, ანდრო ვაშალომიძემ საკუთარი ხელით დაწურული ღვინო შესთავაზა მოსეირნე გურულებს. სახელდახელოდ მოწყობილი სცენიდან, ოზურგეთელი მოსწავლეების, ახალგაზრდების მონაწილეობით არაერთი განწყობის მომნიჭებელი სიმღერა და ჰანგი გაისმა. განსაკუთრებით ბავშვების სიხარული და ჟრიამული , მზესთან ერთად ამშვენებდა საახალწლო ზეიმის ხალისს.
_ დღეს, თითქოს, ბუნება, საგანგებოდ დაეხმარა ყველას ერთად! პატარა, 2 წლის მარიამ თავაძეს, რომელიც გვეუბნება რომ „გურული თავადის ქალია“ უხარია, ახალი, 2023 წლის სიმბოლიკის წინ ჯდომა და თავს იწონებს. იქვე, ცუგაც არხეინობს…
_თუნდაც ერთი პატარას ასე გახარება, არის უზარმაზარი საქმე, რომელსაც ვერაფერი შეედრება და სამყაროდ ღირს! ღმერთმა დალოცოს პატარა ბაბუკოები, ჩვენი ქვეყნის მომავალი, – სიყვარულით ამბობს 80 წლის ბესო რამიშვილი, რომელიც გვეუბნება, რომ უხარია დღეს აქ სეირნობა. სიხარულს ვერ ფარავდა 4 წლის კესანე კოპლატაძეც, რომელიც ასევე ცდილობდა, 2023 წლის მაცნედ საკუთარი თავი წარმოედგინა.
ღონისძიება ოზურგეთის მუნიციპალიტეტის მერიის ორგანიზებით შედგა.
ავტორი
