ოზურგეთის პროგრესის სახლში კვლევის – „2022 წლის განმავლობაში, ოზურგეთის მუნიციპალიტეტში გახორციელებული საქმიანობის შეფასება მოქალაქეების მიერ“ პრეზენტაცია გაიმართა.
კვლევის ფარგლებში, ქალაქ ოზურგეთში, დაბა ნასაკირალში, დაბა ლაითურში და დაბა ნარუჯაში 270 ადამიანი გამოიკითხა.
გურიის სამოქალაქო ცენტრის წარმომადგენელმა ნათია ვაშალომიძემ, მედიის წარმომადგენლებთან თქვა: 2021 წელს გურიის სამოქალაქო ცენტრმა შეაგროვა ყველაზე მნიშვნელოვანი და მტკივნეული საკითხები, რომელიც აწუხებდა მუნიციპალიტეტის მოსახლეობას. სწორედ ამ საკითხების ირგვლივ მაშინდელ მერობის კანდიდატებს მივმართეთ კითხვებით თუ, რას გეგმავდნენ ისინი ამ საკითხების გადასაჭრელად. არსებული მერის დაპირება ცხრილად გამოვეცით და წელს არის პირველი წელი, როცა მოქალაქეები და სამოქალაქო საზოგადოების ორგანიზაციის წარმომადგენლები აფასებენ მერის საქმიანობას იმ ცხრილის მიხედვით, რომელიც ჩვენ შევადგინეთ. ჩვენ გვაქვს ასეთი მეთოდი, რომ ცხრილს ვაფერადებთ შესაბამისი ფერით. შესრულებულ საკითხს ვნიშნავ მწვანე ფერით, პროცესში არსებულ ნებისმიერ საქმიანობას ვნიშნავთ ყვითლად, ხოლო, საკითხს, რომელზეც არანაირი სამუშაო არ არის დაწყებული, ვინიშნავთ. გამოკითხვების შედეგად პირველი წელი მწვანე ფერს არ შეიცავს. იმედი გვაქვს, შემდეგ წლებში ეს მონაცემები დადებითისკენ შეიცვლება. უფრო მეტად წითელი და ყვითელი ფერები დომინირებს.
ოზურგეთის მუნიციპალიტეტის მერის მოადგილემ გიორგი ღურჯუმელიძემ „გურია ნიუსთან“ საუბრის დროს აღნიშნა: როგორც საზოგადოებამ იცის ჩვენი გუნდი წინასაარჩევნოდ მოსახლეობის წინაშე წარსდგა რვაპუნქტიანი გეგმით, რომლის მიხედვით მოხდება მუნიციპალიტეტის განვითარება. გამოიკვეთა ის, რომ ბევრი საკითხი, რომელიც რვაპუქტიან გეგმაში იყო მოცემული, საკმაოდ დიდი წინსვლა გვაქვს, გარკვეულ ნაწილზე მუშაობა დაწყებულია. შესაბამისად, ვფიქრობ ჩვენს სამოქალაქო საზოგადოებასთან აქტიურად თანამშრომლობით სხვა საკითხებსაც მივიყვანთ ბოლომდე და ამის შესახებ საზოგადოება იქნება აუცილებლად ინფორმირებული.
შეხვედრაზე მყოფმა ოზურგეთის მუნიციპალიტეტის მერმა განაცხადა, რომ მომავალ წელს არაერთი საინტერესო და მნიშვნელოვანი პროექტების გახორციელება არის დაგეგმილი და ამას საზოგადოება ეტაპობრივად გაიგებს.
გამოკითხული ადამიანების უმეტესობამ, არაერთი პრობლემა დაასახელა, რომლის მოგვარებასაც დროულად და სწრაფ დროში მოგვარებას მოითხოვს. მიუხედავად ასეთი შედეგებისა, კითხვაზე _ როგორ შეაფასებდით ოზურგეთის მერის საქმიანობას ბოლო ერთი წლის განმავლობაში? _ ასეთი პასუხები მივიღეთ: ძალზე დადებითად _ 37,2%, დადებითად _ 33,8 %, უარყოფითად _ 4,5%, ძალზე უარყოფითად _ 3%, მიჭირს პასუხის გაცემა _21,4.
ავტორი
