ტურინის „იუვენტუსთან“ ბრწყინვალედ ჩატარებული შეხვედრის შემდეგ საქართველოს ნაკრების თავდამსხმელი ხვიჩა კვარაცხელიას დასაუფლებლად ევროპის წამყვანმა და მდიდარმა გუნდებმა ნამდვილი ომი გამოაცხადეს.
რამდენიმე დღის წინ ესპანურმა გამოცემამ „Fichajes.net“ გაავრცელა ცნობა, რომ მადრიდის „რეალის“ პრეზიდენტი ფლორენტინო პერესი „ნაპოლის“ დამრტყმელი დუეტის – კვარაცხელია – ოსიმენის წყვილის გადაბირებას ცდილობს.
ფლორენტინო პერესი იმდენად აღფრთოვანებულია ამ მოთამაშეებით, რომ მზადაა, მომავალში სატრანსფერო ბაზარზე რაიმე განსაკუთრებული მოიმოქმედოს რომ ეს ფეხბურთელები ხელში ჩაიგდოს.
პრობლემა ისაა, რომ ორივე ფეხბურთელს „ნაპოლისთან“ ხანგრძლივი კონტრაქტი აქვს – ოსიმენს 2025 წლამდე, კვარაცხელიას – 2027 წლამდე. იტალიური გუნდი მათ მხოლოდ ისეთი თანხის სანაცვლოდ შეელევა, რომელიც 200 მილიონ ევროს გადააჭარბებს.
გუშინ კი საქმეში ბრიტანული მედია „ჩაერთო“ და გაავრცელა ინფორმაცია, რომ ლონდონის „არსენალმა“ საკუთარი ყურადღება მას შემდეგ, რაც უკრაინელი მიხაილო მუდრიკის ტრანსფერი არ შედგა,მზერა „ნაპოლის“ ქართველ შემტევის, ხვიჩა კვარაცხელიასკენ მიმართა.
ლონდონური კლუბის მთავარ მწვრთნელ მიკელ არტეტას სურს, რომ შეტევა ხვიჩა კვარაცხელიათი გააძლიეროს, თუმცა ამის გაკეთება რთული იქნება. ამ ეტაპზე ქართველის გაყიდვით ნეაპოლელები დაინტერესებულნი არ არიან. ამ ფაქტორის გათვალისწინებით, ამ ტრანსფერის ალბათობა ალბათ საკმაოდ მცირეა.
გუშინვე ცნობილი გახდა, რომ საქართველოს ნაკრებისა და „ვალენსიის“ კარის დარაჯი გიორგი მამარდაშვილის მსურველ კლუბებს კიდევ ერთი შეემატა. ესპანური მედიის მტკიცებით, 22 წლის ქართველს მადრიდის „ატლეტიკო“ თავისი მთავარი მეკარის, სლოვენიელი იან ობლაკის შემცვლელად სერიოზულად განიხილავს.
იან ობლაკი 30 წლისაა, რაც იმას ნიშნავს, რომ კარიერის დასრულებამდე ის, სავარაუდოდ, კიდევ 10 წელიწადი ითამაშებს. ამის მიუხედავად, „ატლეტიკო“ უკვე ემზადება იმ დღისთვის, როდესაც სლოვენიელი მის რიგებს დატოვებს.
„ატლეტიკოსთვის“ მამარდაშვილის ტრანსფერის განხორციელება იოლი არ იქნება, რადგან მეკარის კონტრაქტში, რომელიც 2027 წლამდეა გათვლილი, გამოსასყიდ თანხად 100 მილიონი ევროა მითითებული.
გუშინ, იტალიურ მედიაში ხვიჩა კვარაცხელიას თემა კიდევ ერთხელ გაჟღერდა. გამოცემამ „გაძეტა დელო სპორტი“ ის დრო გაიხსენა, როდესაც „იუვენტუსი“ ქართველის ტრანსფერზე მუშაობდა და მის შეძენასთან ახლოს იყო.
„კვარაცხელია ნამდვილად ძალიან ახლოს იყო „იუვენტუსთან“. სპორტულმა დირექტორმა ფაბიო პარატიჩიმ, რომელიც ახლა „ტოტენჰემში“ მუშაობს, შენიშნა ქართველის ტალანტი და მუშაობა დაიწყო. პირველი მცდელობა იყო ანდრეა პირლოსთვის მისი შეძენა ფედერიკო კიეზასთან ერთად, ხოლო მერე 2021 წლის გაზაფხულზე, როდესაც პარატიჩი ცდილობდა „ბაიერნისა“ და ინგლისური კლუბებისთვის დაესწრო. ქართველი ტურინშიც იყო ჩასული, სადაც კლუბის სპორტული ბაზა ნახა. მასთან ერთად იყო ფედერიკო კერუბინი, ამჟამად „იუვენტუსის“ სპორტული დირექტორი.
საბოლოოდ რატომ არ შედგა ეს ტრანსფერი? 2021 წლის გაზაფხულზე „იუვენტუსში“ სტრუქტურული გადაადგილებები განხორციელდა. პარატიჩის წასვლა მოუწია, მენეჯმენტში ცვლილებებით კი პრიორიტეტები და სტრატეგიები შეიცვალა, მათ შორის, კვარაცხელიას ტრანსფერის გეგმაც. ქართველი ყაზანის „რუბინში“ დარჩა და მოგვიანებით, უკრაინაში ომის გამო დინამო „ბათუმში“ გადავიდა. ეს უკვე 2022 წლის გაზაფხულზე მოხდა და „ნაპოლის“ სპორტულმა დირექტორმა სიტუაციით კარგად ისარგებლა, მან 10 მილიონ ევროდ მოახერხა აღმოსავლეთიდან ტალანტის იტალიაში ჩამოყვანა“, – დაწერა იტალიურმა გამოცემამ.
ორი დღის წინ, ოფიციალურად დადასტურდა, რომ 21 წლის უკრაინელი მიხაილო მუდრიკი კარიერას ლონდონის „ჩელსიში“ განაგრძობს. ტრანსფერი 100 მილიონი ევრო დაჯდა. ამ გარიგების შესახებ დონეცკის „შახტარის“ პრეზიდენტმა, რინატ ახმეტოვმა ისაუბრა:
„მიხაილოს გამო ძალიან ბედნიერი ვარ და მისით ვამაყობ. მიმაჩნია, რომ მის მსგავს ფეხბურთელებს პირიქით, უნდა ვიწვევდეთ გუნდში და ევროტურნირების მოსაგებად უნდა ვიბრძოდეთ. სამწუხაროდ, ეს შეუძლებელია ახლა, რადგან უკრაინაში ომი მიმდინარეობს. თუმცა მე მჯერა, რომ ჩვენ გამარჯვებას მოვიპოვებთ, შემდეგ კი ლონდონის „ჩელსისთან“ „დონბას არენაზე“ ამხანაგურ მატჩს ვითამაშებთ.
ამიტომ, მივიღე გადაწყვეტილება, რომ ვაწარმოო „აზოვსტალის პროექტი“, რომელიც მხარს დაუჭერს მარიუპოლის მცველებს და მათ ოჯახებს. მუდრიკის ტრანსფერიდან შემოსული 25 მილიონი ჩვენი ჯარისკაცების, მცველებისა და მათი ოჯახების დასახმარებლად გადაირიცხება. ჩვენ მუდამ ვალში ვიქნებით ჩვენს ჯარისკაცებთან,“ – განაცხადა ახმეტოვმა.
გუშინ ცნობილი გახდა რომ „მანჩესტერ იუნაიტედის“ ესპანელი მეკარე, დავიდ დე ხეა, მიუნხენის „ბაიერნში“ გადასვლასთან ახლოსაა.
მიუნხენური კლუბის ხელმძღვანელობა მას ტრავმირებული მანუელ ნოიერის შემცვლელად მოიაზრებს.
კატარის მუნდიალიდან ნაადრევად გავარდნის შემდეგ, გერმანელთა მეკარე ნოიერი დასასვენებლად გაემგზავრა მთიან კურორტზე და თხილამურებით სრიალისას ფეხი მოიტეხა. ექიმების დასკვნით, ის სეზონის ბოლომდე ვეღარ ითამაშებს. ამიტომ ბავარიელები შემცვლელს ეძებენ.
პრემიერლიგის მიმდინარე სეზონში დე ხეამ მანჩესტერელთა მაისურით 18 მატჩი ჩაატარა. ამჟამინდელ გუნდთან გაფორმებულ კონტრაქტს ვადა 2023 წლის ზაფხულში ეწურება.
ავტორი
