ამერიკული იარაღის მწარმოებელი კომპანია უკრაინის მთავრობას MQ-9 Reaper-ის ტიპის ორი უპილოტო საფრენი აპარატის 1 დოლარად მიყიდვას სთავაზობს, რათა ქვეყანას დაეხმაროს თავის დაცვაში, რადგან ის რუსეთის მხრიდან შეტევის მოლოდინშია – ამის შესახებ გამოცემა The Wall Street Journal-ი წერს.
შეთანხმება, რომელიც შესაძლოა გაფორმდეს, კიევისგან მოითხოვს, რომ $10 მილიონი საფრენი აპარატის ტრანსპორტირებისთვის და ყოველ წელს $8 მილიონი ორივე დრონის შენახვისთვის გამოყონ.
The Wall Street Journal-ის ცნობით, მათ მიერ ნანახ წერილში აღნიშნულია, რომ შეთანხმება მოიცავს მიწაზე განსათავსებელ საკონტროლო სადგურსაც, რომლიდანაც დრონების მართვა შორ მანძილზე იქნება შესაძლებელი. შეთავაზება ვაშინგტონში უკრაინის თავდაცვის ატაშეს დრონების მწარმოებელი კომპანიის, General Atomics-ის აღმასრულებელმა დირექტორმა, ლინდენ ბლუმ წაუყენა.
გამოცემა წერს, რომ General Atomics-ი დრონებს პირდაპირ უკრაინის მთავრობას სთავაზობს და არა აშშ-ს მთავრობის შუამავლობით, თუმცა მათი კიევისთვის გადაცემას თეთრი სახლის დასტური მაინც სჭირდება.
The Wall Street Journal ამბობს, რომ გამოცემას თეთრმა სახლმა და უკრაინის მთავრობამ კომენტარის გაკეთებაზე უარი უთხრა
ასევე შეთანხმებასთან დაკავშირებით, კონკრეტულ კომენტარის გაკეთებაზე უარი თქვა General Atomics-ის წარმომადგენელმა თუმცა კომპანიამ აღნიშნა, რომ უკრაინას Reaper-ის მსგავსი შესაძლებლობები საჩქაროდ ესაჭიროებათ.
“General Atomics-ი უკრაინის შეიარაღული ძალების საჭიროებებს მთავრობასთან მრავალი თვის განმავლობაში განიხილავდა და რჩება მათთვის ნებისმიერი შესაძლებელი გზით დახმარების მიმართ ერთგული”, – თქვა General Atomics-ის წარმომადგენელმა.
The Wall Street Journal წერს, რომ MQ-9 Reaper-ს ტიპის უპილოტო საფრენ აპარატს, ფრენა 24 საათზე მეტ ხანს შეუძლია. შესაძლებელია მისი რაკეტებით შეიარაღება, ასევე მისი სადაზვერვო მიზნებით გამოყენება.
Reaper-ების გარდა General Atomics-ი აწარმოებს Gray Eagle-ებსაც, რომელთა უკრაინისთვის გადაცემასაც თეთრი სახლი ბლოკავს.
ავტორი
