გუშინ ვებგვერდმა „Diariogol“ ქართველებისათვის საინტერესო ინფორმაცია გაავრცელა. აღმოჩნდა რომ მადრიდის „რეალის“ მთავარმა მწვრთნელმა კარლო ანჩელოტიმ კლუბის ხელმძღვანელობას ხვიჩა კვარაცხელიას შეძენა დაჯინებით მოსთხოვა.
„კილიან მბაპესა და ერლინგ ჰაალანდის ტრანსფერები უკვე მიუღწეველი ჩანს და მადრიდის „რეალსაც“სხვა მიზნები გაუჩნდა. კარლო ანჩელოტის ერთ-ერთი ყველაზე დიდი სურვილი, შეტევის ამ სეზონის უდიდესი სენსაციით – ხვიჩა კვარაცხელიათი გაძლიერებაა.
„Transfermarkt“-ის თანახმად, ახალგაზრდა ქართველი ვარსკვლავი უკვე 60 მილიონ ევროდ ფასდება. ბუნებრივია, მის მიმართ ინტერესი დიდი გუნდების მწვრთნელებს გაუჩნდათ და კარლო ანჩელოტიც ერთ-ერთი იმათგანია, ვინც ახალგაზრდა გარემარბის ტალანტმა დააბრმავა.
დააბრმავა იმდენად, რომ იტალიელი მწვრთნელმა ფლორენტინო პერესს სთხოვა კვარაცხელიას ტრანსფერის განხორციელება იმ შემთხვევისთვის, თუკი „რეალის“ გაწვრთნას მომავალ სეზონშიც გააგრძელებს.
მაგრამ, როგორც „რეალისთვის“, ისე სხვა კლუბებისთვის, აურელიო დე ლაურენტისის კარზე დაკაკუნება და ქართველის თხოვნა მარტივი არ იქნება. საქმე ისაა, რომ იტალიური მედიის ცნობით, ნეაპოლური კლუბის ხელმძღვანელები არ აპირებენ თავიანთ ვარსკვლავს, ჩამოყვანიდან ერთი წლის თავზე დაემშვიდობონ. შესაბამისად, ისინი მომავალ ზაფხულს უარს იტყვიან მოლაპარაკებებზე.
მაგრამ გადამწყვეტი შესაძლოა თავად კვარაცხელიას სურვილი აღმოჩნდეს. ფეხბურთელი არასდროს მალავდა მადრიდის „რეალით“ დაინტერესებას. ეს ის არის, რაც ფლორენტინო პერესმა და კლუბის სხვა ხელძღვანელებმა თავიანთი ინტერესებისთვის უნდა გამოიყენონ, რათა საბოლოო ჯამში, ჩააცვან მას „რეალის“ თეთრი მაისური,“ – დაწერა ესპანურმა გამოცემამ.
გუშინვე ცნობილი გახდა რომ საქართველოს ეროვნული გუნდისა და ფრანგული „მეცის“ თავდამსხმელი გიორგი მიქაუტაძის შეძენით რამდენიმე იტალიური კლუბია დაინტერესებული.
იტალიური გამოცემები 22 წლის შემტევს „უდინეზესა“ და „ჯენოას“ უკავშირებენ. ჯერჯერობით კონკრეტული წინადადებისა და დეტალების შესახებ საუბარი არ არის, მაგრამ დაინტერესებაზე ინფორმაცია ვრცელდება.
მიქაუტაძე „უდინეზეში“ ბეტოს შემცვლელად განიხილება, რომელიც ზაფხულში, დიდი ალბათობით ინგლისის პრემიერლიგაში გადაბარგდება. „უდინეზეს“ გარდა, მიქაუტაძით „ჯენოაც“ დაინტერესებულია. გენუელთა მთავარი მწვრთნელი ალბერტო ჯილარდინო პირადად უმიზნებს ქართველი ფეხბურთელის ტრანსფერს.
„ჯენოა“ ამჟამად იტალიის „სერია B“-ში ასპარეზობს, მაგრამ „სერია A“-ში დასაბრუნებლად იბრძვის და კარგი შანსი აქვს, მომდევნო სეზონი ელიტარულ დივიზიონში გაატაროს.
„ვალენსიას“ ფეხბურთელი გიორგი მამარდაშვილი კი ესპანეთის „ლა ლიგის“ მეოცე ტურის საუკეთესო მეკარედ დასახელდა.
„ჟირონასთან“ შეხვედრაში გიორგიმ ერთი გოლი გაუშვა, თუმცა 7 დარტყმა მოიგერია, მათ შორის, რამდენიმე ძალიან რთული. ერთ მატჩში 7 სეივი „ლა ლიგის“ მიმდინარე სეზონის რეკორდია.
მიმდინარე სეზონში ქართველი ტურის საუკეთესო მეკარედ პირველად დასახელდა, თუმცა გასულ სეზონში ეს ორჯერ მოახერხა.
ცნობილი გახდა, რომ ლეო მესი „პსჟ“-სთან ხელშეკრულების გახანგრძლივებასთან ახლოსაა.
მხარეები ორ ვარიანტს განიხილავენ. ერთი გახლავთ ერთწლიანი კონტრაქტი, მეორე კი ერთწლიანი ხელშეკრულება კიდევ გახანგრძლივების პერსპექტივით. საბოლოო გადაწყვეტილებას თავად არგენტინელი თავდამსხმელი მიიღებს.
რამდენიმე დღის წინ არგენტინელი ვარსკვლავის ოჯახი ერთი სკანდალის მონაწილე შეიქმნა. მესის ძმამ მატიას მესიმ განაცხადა, რომ ლეო „ბარსელონაში“ არ დაბრუნდება.
„დაივიწყეთ! ჩვენ არ დავბრუნდებით „ბარსელონაში“. თუ ეს ოდესმე მოხდება, ეს ნიშნავს, რომ კლუბში ყველაფერი გასუფთავდა, პრეზიდენტ ჟოან ლაპორტას კლუბიდან წასვლის ჩათვლით. ჩემი აზრით, „ბარსელონა“ პოპულარული და ცნობადი, მხოლოდ მესის დროიდან გახდა. კატალონიელები მოღალატეები არიან. ისინი არ გამოვიდნენ ქუჩაში მესის კლუბში დარჩენის მოთხოვნით,“ – განაცხადა მატიას მესიმ.
ლიონელ მესი „ბარსელონაში“ 2021 წლამდე თამაშობდა, მაგრამ შემდეგ კლუბთან კონტრაქტი ამოეწურა და „პარი სენ ჟერმენში“ გადავიდა.
მოგვიანებით, ფეხბურთელის ძმას „ბარსელონას“ მიმართ გაკეთებული განცხადების გამო საჯაროდ ბოდიშის მოხდა მოუწია.
„მინდა განმარტება გავაკეთო იმის შესახებ, რაც სოციალურ ქსელში ვთქვი: ჩემს შვილთან და მეგობრებთან ერთად ვხუმრობდი. როგორ შეიძლება, ასე ვიფიქრო ისეთ გუნდზე, როგორიც „ბარსელონაა“? კლუბზე, რომელმაც ამდენი მისცა ლეოს და ჩემს ოჯახს. ჩვენთვის კატალონია მეორე სახლია და ეს ყველამ იცის. ძალიან ვწუხვარ და ბოდიშს ვუხდი ყველას, განსაკუთრებით ბარსელონელ მეგობრებს“,- განაცხადა მატიას მესიმ.
„ვალენსიას“ ურუგვაელმა თავდამსხმელმა, ედინსონ კავანიმ კი შესაძლოა კარიერა ბრაზილიის ჩემპიონატში გააგრძელოს. მისით „სანტოსი“ დაინტერესდა.
„ჩვენ ვცდილობთ კავანის დაყოლიებას. ჯერ კიდევ არის შესაძლებლობა. ედინსონს ვკითხეთ, სურს თუ არა ჩვენთან თამაში. მოვიწვიეთ, რათა გვეჩვენებინა, რა და როგორ გვაქვს. დაგვპირდა მოვიფიქრებო,“ – განაცხადა „სანტოსის“ პრეზიდენტმა ხოსე კარლუშ დე ოლივეირამ.
კავანი „ვალენსიას“ ფეხბურთელი 2022 წლის აგვისტოს ბოლოს გახდა. 35 წლის ურუგვაელმა მიმდინარე სეზონში ესპანურ პრიმერაში 13 მატჩი ჩაატარა, 5 ბურთი გაიტანა და ერთი საგოლე გადაცემა შეასრულა.
ავტორი
