გუშინ, ცნობილი გახდა რომ ესპანურ „ვალენსიას“ უახლოეს დღეებში ახალი მთავარი მწვრთნელი ეყოლება. ჯენარო გატუზოს დროებითმა შემცვლელმა ვორო გონსალესმა არ გაამართლა და ესპანეთის პირველობაზე გიორგი მამარდაშვილის გუნდი ზედიზედ ორჯერ დამარცხდა.
გამოცემა „Plaza Deportiva“-ს მტკიცებით „ვალენსიას“ ტექნიკური დირექტორი მიგელ ანხელ კორონა ერთდროულად სამ ფეხბურთის სპეციალისტთან – ნუნუ ეშპირიტუ სანტუსთან, ვისენტე მორენოსთან და რუბენ ბარახასთან აწარმოებს მოლაპარაკებას.
ნუნუ ესპირიტუ სანტუ „ვალენსიაში“ ადრე უკვე მუშაობდა. მის შემთხვევაში დაბრკოლება ის 5 მილიონი ევროა, რომელიც ვალენსიელებმა „ალ-იტიჰადს“ კომპენსაციის სახით უნდა გადაუხადონ. ფინანსურ კრიზისში მყოფი „ვალენსიასთვის მწვრთნელის სანაცვლოდ ეს საკმაოდ სერიოზული თანხაა.
ვისენტე მორენოს მიმდინარე სეზონის ბოლომდე ხელშეკრულება აკავშირებს „ალ-შაბაბთან“, მაგრამ მას ხელშეკრულებაში არ აქვს კომპენსაციის პუნქტი. ამის მიუხედავად არაბულ გუნდთან კონტრაქტის გაწყვეტა იოლი არ იქნება, რადგან „ალ-შაბაბი“ ჩემპიონობისთვის იბრძვის და კრიშტიანო რონალდოს „ალ-ნასრის“ მთავარი კონკურენტია.
ზემოთ დასახელებული ორი ფეხბურთის სპეციალისტის ფონზე რუბენ ბარახა ყველაზე რეალური ვარიანტია. ბარახა „ვალენსიაში“ 2000-2010 წლებში ასპარეზობდა. მოთამაშის კარიერის დასრულების შემდეგ „ვალენსიას“ ახალგაზრდულ გუნდსა და „ვალენსია B“-ში მუშაობდა, 2015 წლიდან კი „ელჩეს“, „რაიო ვალეკანოს“, ხიხონის „სპორტინგს“, „ტენერიფესა“ და „სარაგოსას“ ავარჯიშებდა.
გუშინ, გერმანული „კარლსრუეს“ მთავარმა მწვრთნელმა კრისტიან აიხნერმა ბუდუ ზივზივაძის შესახებ ისაუბრა. მან ქართველ ფეხბურთელზე კომენტარი „ფიურტთან“ მატჩისწინა პრესკონფერენციაზე გააკეთა.
„ვფიქრობ, რომ ნამდვილად შესაძლებელია ის სამატჩო განაცხადში მოხვდეს. თუმცა, მე-2 ბუნდესლიგასთან შესაგუებლად ჯერ კიდევ სჭირდება გარკვეული დრო, მაგრამ ეს ნორმალურია, როცა სხვა ლიგიდან მოდიხარ. რასაც ის ვარჯიშებზე ბურთით კარის წინ აკეთებს, ნამდვილად დიდ იმედს იძლევა“, – განაცხადა კრისტიან აიხნერმა.
ბუდუ ზივზივაძე „კარლსრუეში“ რამდენიმე დღის წინ გადავიდა და ჯერ არ უთამაშია. მან კლუბთან კონტრაქტი 2025 წლის ზაფხულამდე გააფორმა.
ცნობილი გახდა, რომ საქართველოს საკალათბურთო ნაკრებისა და „ინდიანას“ ცენტრალურ თავდამსხმელ გოგა ბითაძეს ამჟამინდელმა გუნდმა ხელშეკრულება ოფიციალურად გაუწყვიტა და კლუბიდან გაუშვა.
ბითაძე „ინდიანას“ შემადგენლობაში ისედაც ცოტას თამაშობდა, გასული წლის ნოემბრიდან მოყოლებული კი ის მოედანზე კიდევ უფრო იშვიათად ჩნდებოდა. „ინდიანა პეისერზი“ გოგას გაცვლაზე აქტიურად მუშაობდა. ბოლო დღეებში დიდ ძალისხმევას „ნიუ იორკ ნიკსთან“ მიმართავდა. „ინდიანას“ ფორვარდი კემ რედიში სურდა, სანაცვლოდ კი ბითაძეს და 2023 წლის დრაფტის მეორე წრის არჩევანს იძლეოდა. სამწუხაროდ, გოგას ეს გაცვლა არ განხორციელდა და „ინდიანა“ იძულებული გახდა ის გუნდიდან გაეშვა.
ამ ცნობის გავრცელების შემდეგ ისევ გააქტიურდნენ სერბული ვებგვერდები, რომელთა მტკიცებით გოგა ბითაძის დამატება ევროლიგის „ცრვენა ზვეზდას“ სურს, თუმცა გოგას აგენტმა ერთხელ უკვე უარყო ევროპაში დაბრუნების მოსაზრება. ამის მიუხედავად, გავრცელდა ცნობა რომ გოგა ბითაძის აგენტი ევროლიგის გუნდთან აწარმოებს მოლაპარაკებას, თუმცა აშშ-ში დარჩენის შესაძლებლობაც საკმაოდ რეალურია. ყველაფერი უახლოეს ორ დღეში გაირკვევა.
გუშინ, საინტერესო ინფორმაცია გაავრცელა ბრაზილიურმა გამოცემამ „Globo Esporte“. მისი მტკიცებით, მიმდინარე სეზონის შემდეგ იტალიელი კარლო ანჩელოტი მადრიდის „რეალს“ დატოვებს და ბრაზილიის ნაკრების მთავარი მწვრთნელი გახდება.
63 წლის ფეხბურთის სპეციალისტს შესანიშნავი ურთიერთობები აქვს ბრაზილიის ნაკრების მთელ რიგ ფეხბურთელებთან. „რეალში“ მუშაობს ვინისიუსთან, როდრიგოსა და მილიტაოსთან, მისი ყოფილი მოთამაშე იყო კაზემირო, რომელიც ამჟამად „მანჩესტერ იუნაიტედის“ ღირსებას იცავს.
უკვე ცნობილია, რომ ანჩელოტის წასვლის შემთხვევაში „რეალს“ კლუბის ლეგენდა, 45 წლის რაულ გონსალეს ბლანკო ჩაიბარებს, ამჟამად „რეალის“ სათადარიგო გუნდს ავარჯიშებს.
„მანჩესტერ სიტის“ კი პრობლემები აქვს და კლუბს 115-ზე მეტ ფინანსურ დარღვევაში ადანაშაულებენ. გუშინ, პრემიერლიგის ხელმძღვანელობა და ოცივე კლუბის წარმომადგენლები შეიკრიბნენ, სადაც რამდენიმე საკითხზე ისაუბრეს, რომელთა შორისაც მანჩესტერული კლუბის საკითხი ძირითადი გახლდათ.
გაირკვა, რომ პრემიერლიგის დანარჩენი ცხრამეტი კლუბი „მანჩესტერ სიტის“ ფინანსური გადაცდენით ძალიან უკმაყოფილოა და შეხვედრაზე ამ გუნდის ქვედა ლიგაში დაქვეითება მოითხოვა. რა თქმა უნდა, ამას კლუბები და პრემიერლიგა ვერ გადაწყვეტს, ყველაფერი სასამართლომ უნდა დაადგინოს.
გუშინ, ცნობილი გახდა რომ „პარი სენ ჟერმენის“ ფეხბურთელმა ლეო მესიმ შესაძლოა ჩემპიონთა ლიგის მერვედფინალში მიუნხენის „ბაიერნთან“ პირველი თამაში გამოტოვოს.
საფრანგეთის თასის მერვედფინალში „მარსელთან“ მატჩში არგენტინელმა მარჯვენა ბარძაყის კუნთის დაზიანება მიიღო, რის გამოც „ლიგა 1“-ის უახლოეს შეხვედრაში „მონაკოსთან“ ვერ ითამაშებს.
ჯერჯერობით, უცნობია, იქნება თუ არა მზად მესი „ბაიერნთან“ თამაშისთვის, რომელიც 14 თებერვალს პარიზში უნდა გაიმართოს.
აღსანიშნავია, რომ „პსჟ“-ს მიუნხენელთა წინააღმდეგ კილიან მბაპე ვერ დაეხმარება. შესაბამისად, მესიც თუ ვერ გავიდა მოედანზე, საფრანგეთის ჩემპიონის შანსი გერმანულ კლუბთან მნიშვნელოვნად შემცირდება.
ავტორი
