დასრულდა საქართველოს 2023 წლის ჩემპიონატი 7- 9-11-13 და 15 წლამდე ასაკის მოჭადრაკეთა შორის, რომელიც თბილისში გაიმართა. საჭადრაკო ასპარეზობაზე გურია 7 მონაწილით იყო წარმოდგენელი.
გურიის საჭადრაკო ოჯახის წარმომადგენელი, ოზურგეთელი 15 წლის თენგო თოიძე ჩემპიონატის ვიცე-ჩემპიონი გახა.
„თენგო თოიძემ 15 წლამდე ასაკის ჭაბუკთა საქართველოს ჩემპიონატში მეორე ადგილი და ვერცხლის მედალი აიღო. ამასთან, საკუთარი რეიტინგი (R 1760) 35 გააუმჯობესა.
თენგო წინა ჩემპიონატებშიც ყოველთვის ფავორიტებს შორის იყო და ბრინჯაოც აქვს აღებული, მაგრამ წლევანდელი წარმატება განსაკუთრებულია, რადგან მისი თამაშის ხარისხი და შედეგი ბევრად გასცილდა სასკოლო ასაკის დონეს.
15 წლის თენგო თოიძე მხოლოდ 0,5 ქულით ჩამორჩა ჩემპიონს, ვისთანაც პირადი შეხვედრა მოგებული ჰქონდა და თანაბარი ქულების შემთხვევაში, თენგო ხდებოდა ჩემპიონი.
ვულოცავთ თენგოს მიღწეულ, დამსახურებულ წარმატებას და მომავალ წელს ოქროს მედლისა და ჩემპიონის ტიტულის მოპოვებას ვისურვებთ.
ასევე უნდა ითქვას, რომ ჩვენმა მოჭადრაკეებმა ყველა ასაკობრივ კატეგორიაში კარგად ითამაშეს. მათ შეძლეს ქულათა შესაძლებლობის 50%-იანი ბარიერის (4,5 ქულა) გადალახვა.
ქულაზე ნაკლები არცერთ მათგანს არ დაუგროვებია. ამასთან, ოთხი, ბოლო ტურებამდე საპრიზო ადგილზე გასვლის შანსებს ინარჩუნებდა. აქ, უპირატესად, ოზურგეთელ ლაზარე ჩხარტიშვილს (6 ქულა) და ლანჩხუთელ ნიკოლოზ ჟორდანიას (5,5) ვგულისხმობთ.
დადებითად ვაფასებთ, ამავე ასაკის ჭაბუკებში, ოზურგეთელი სანდრო გოგუაძის დაგროვილ ხუთ ქულას, რომელმაც ჩემპიონატზე ყაიმების სარეკორდო რაოდენობა ითამაშა.
ჩემპიონატზე შექება დაიმსახურა 9-წლამდე ასაკში მოასპარეზე მარიამ გოგუაძემ, რომელიც დიდი ხანი არაა ჭადრაკს ეზიარა და უკვე ქვეყნის ძლიერ თანატოლებთან 5 ულის აღება შეძლო“, _ ამბობენ ოზურგეთის მუნიციპალიტეტის სპორტულ-გამაჯანსაღებელ დაწესებულებათა გაერთიანებაში.
