გუშინ, იტალიურმა გამოცემამ „Repubblica“ გაავრცელა ცნობა რომ მადრიდის „რეალის“ წარმომადგენლები ხვიჩა კვარაცხელიას აგენტს დაუკავშირდნენ და ფეხბურთელის სამომავლო ტრანსფერზე პირველი მოლაპარაკება გამართეს.
ჯერჯერობით გადაწყვეტილი არაა, დატოვებს თუ არა კარლო ანჩელოტი მადრიდულ კლუბს მიმდინარე წლის ზაფხულში. ჯერჯერობით მხოლოდ „რეალის“ სამომავლო სატრანსფერო პრიორიტეტები იკვეთება, ხოლო რომელი ფეხბურთელი გადაბარგდება მადრიდში, უშუალოდ ამ სეზონის შემდეგ გადაწყდება.
საინტერესოა, რომ „ნაპოლის“ პრეზიდენტი დე ლაურენტისი ქართველის გაშვებას არ გეგმავს, თუმცა, თუ მოთამაშე დათმო, ეს 110 მილიონ ევროზე ნაკლებად არ მოხდება.
ცნობილი გახდა, რომ ხვიჩა კვარაცხელიას გამოცემა „El Chiringuito“-ს ჟურნალისტმა მადრიდის „რეალის“ ყოფილი მოთამაშე გუტის ავტოგრაფიანი მაისური უკვე ჩაუტანა.
ესპანელმა ქართველს საჩუქარი პირადად გადასცა, შესაბამისი ვიდეოც გადაიღო და მას კომედიური ჟანრის ელფერი მისცა. პირველ ჯერზე ის ხვიჩას სავარჯიშო ბაზაზე მისვლისას წინ დაუდგა, თუმცა ქართველმა ავტომობილი არ გააჩერა და გზა განაგრძო, მოგვიანებით კი ნიკო როდრიგესმა ავტოგრაფიანი მაისური ქართველს მაინც გადასცა.
„საჩუქარი ხვიჩას. იმედი მაქვს მაისური მოგეწონება და შენი ოცნებები ახდება. მე მადრიდში გელოდები და იმედი მაქვს, მალე შევხვდებით“, – ეწერა გუტის გამოგზავნილ წერილში.
ამაზე კომენტარი ხვიჩა კვარაცხელიამაც გააკეთა:
„დიდი მადლობა. გუტისთვის საჩუქარი მეც მაქვს და აუცილებლად გავუგზავნი. დიდი მადლობა ამ მაისურისა და წერილისთვის. შენ საფეხბურთო ლეგენდა ხარ და კიდევ ერთხელ, დიდი მადლობა“.
გუშინ, „მანჩესტერ სიტის“ მთავარმა მწვრთნელმა პეპ გვარდიოლამ „ლაიფციგთან“ ჩემპიონთა ლიგის მერვედფინალური მატჩის მოგების – 7:0 შემდეგ ჟურნალისტებთან „ნაპოლის“ შესახებ ისაუბრა.
„ალბათ, ამ სეზონში „ნაპოლი“ ევროპაში საუკეთესო გუნდია. მათი თამაშის სტილი განსხვავებულია, ისინი ამ თვალსაზრისით „არსენალთან“ ახლოს იმყოფებიან“.
გუშინ, დიეგო მარადონას შვილმა, დიეგო მარადონა უმცროსმა ხვიჩა კვარაცხელიასთვის 10 ნომრიანი მაისურის მიცემასთან დაკავშირებით გავრცელებულ ამბებზე კომენტარი გააკეთა:
„ამ თემაზე აზრი არასოდეს შემიცვლია. როდესაც ინსინიემ 24-ნომრიანი მაისური ჩაიცვა, ლორენცოს იმ დღესვე ვუთხარი, რომ ნეტავ შემძლებოდა მისთვის 10-ნომრიანი მაისურის დათმობა. იგივე შემთხვევაა კვარასთან დაკავშირებითაც. ჩვენ ძალიან ძლიერ ფეხბურთელზე ვსაუბრობთ, თუმცა „ნაპოლიში“ 10 ნომერი ხელშეუხებელია,”– განაცხადა მარადონა ჯუნიორმა.
გუშინ ცნობილი გახდა რომ არგენტინის ნაკრებისა და ფრანგული „პსჟ“-ს 35 წლის ვარსკვლავმა ლიონელ მესიმ, შესაძლოა, პორტუგალიელი კრიშტიანო რონალდოს გზა გაიაროს და კარიერა საუდის არაბეთის ჩემპიონატში განაგრძოს.
ეს იმ შემთხვევაში მოხდება, თუკი არგენტინელს საუდის არაბეთში იმაზე მეტ ხელფასს დაუნიშნავენ, რომელიც რონალდოს აქვს.
ცნობილი გახდა, რომ ლეოს მამა ხორხე მესი უკვე ესაუბრა „ალ-ჰილალის“ წარმომადგენლებს და შვილისთვის ხელფასის სახით ორ წელიწადში 600 მილიონი ევრო მოითხოვა.
ლეოს გარემოცვაში თვლიან, რომ ის ნამდვილად იმსახურებს პორტუგალიელ ფეხბურთელზე მეტ ანაზღაურებას, რადგანაც კრიშტიანოზე 2 წლით უმცროსია.
ცნობილია, რომ რონალდო „ალ-ნასრში“ სეზონში 200 მილიონ ევროს გამოიმუშავებს. თუკი გარიგება შედგება, მესი წლის განმავლობაში კრიშტიანოზე ზუსტად 100 მილიონით მეტს მიიღებს.
გუშინ, საერთაშორისო ოლიმპიური კომიტეტის იდეას, რომელიც 2024 წლის ოლიმპიადაზე რუსი და ბელარუსი სპორტსმენების დაშვებას ითვალისწინებს, თამაშების მასპინძელი პარიზის მერი, ან იდალგო გამოეხმაურა.
„ვერ წარმომიდგენია, რომ მათ (სოკ-ი) ასეთ გადაწყვეტილების (თამაშებზე რუსი და ბელარუსი სპორტსმენების ჩვეულებრივი სტატუსით დაშვება) მიღება შეუძლიათ. წამითაც ვერ ვუშვებ, რომ სოკ-ი ასეთ კვალს დატოვებს. გავაკეთებ ყველაფერს, რაც შემიძლია, რომ ეს არ მოხდეს.
ახლავე უნდა ვიმოქმედოთ. ის ფაქტი, რომ სოკ-მა ამ ილიმპიადის ჩასატარებლად პარიზი აირჩია, ძალიან სიმბოლურია, რადგან ეს ადამიანის უფლებების დედაქალაქია. ეს არის დედაქალაქი, სადაც საფრანგეთის რევოლუციის პერიოდიდან მოყოლებული, ადამიანის უფლებათა ყველა უნივერსალური დეკლარაცია დაიწერა. ეს არის ქვეყანა და ქალაქი, რომლებიც თვალს ვერ დახუჭავენ, როდესაც საქმე ადამიანის უფლებებს ეხება“, – აქვეყნებს იდალგოს სიტყვებს ფრანგული მედია.
რუს და ბელარუს სპორტსმენებს საერთაშორისო შეჯიბრებებში გამოსვლა, როგორც აგრესორი ქვეყნის და მისი მხარდამჭერი სახელმწიფოს წარმომადგენლებს, უკრაინაში ომის დაწყების შემდეგ შეუზღუდეს. ამ წლის 25 იანვარს საერთაშორისო ოლიმპიური კომიტეტის აღმასკომი გამოვიდა ინიციატივით, რათა რუს და ბელარუს სპორტსმენებს საერთაშორისო შეჯიბრებებში ნეიტრალური სტატუსით გამოსვლის უფლება მიეცეთ.
ზაფხულის XXXIII ოლიმპიური თამაშები საფრანგეთის დედაქალაქში 2024 წლის 26 ივლისიდან 11 აგვისტოს ჩათვლით პერიოდში გაიმართება.
ავტორი
