ჩამოშლილი, დანესტილი კედლები, აყრილი და ჩამპალი იატაკი, სახლი ყოველგვარი სიკეთის გარეშე _ ეს ის რეალობაა, რომელშიც ჩოხატაურის მუნიციპალიტეტის სოფელ ბუკნარში, სანიკიძეების ოჯახს 4 მცირეწლოვან შვილთან ერთად უწევს ცხოვრება.
ოჯახის შესახებ ცოტა ხნის წინ ინფორმაცია სოციალურ ქსელში ფეისბუქმომხმარებელმა, ქველმოქმედმა გაგა ყაჭეიშვილმა გამოაქვეყნა;
“ყველას გთხოვთ, რომ მცირედი გავიღოთ ამ პატარებისთვის. ლარიც კი მნიშვნელოვანია. მათ ჩვენი დახმარება სჭირდებათ. ისინი ჩოხატაურში, სოფელ ბუკნარში ცხოვრობენ ამ ქოხში, სადაც ელემენტარული პირობებიც კი არ არსებობს. საუბრის დროს თქვეს, რომ ხშირად მხოლოდ პურის ჭამა უწევთ. საკმარისია, ჩაიხედო მათ თვალებში, უდიდეს ტკივილს და იმედგაცრუებას დაინახავ. ჩვენ კი, შეგვიძლია, ცოტათი მაინც გავუხალისოთ ყოველდღიურობა… მამა შრომისუუნაროა, დედა სოციალური დასაქმების პროგრამაშია და ძალიან მცირედი აქვს შემოსავალი. თხოვნაა ყველას მიმართ _ რის საშუალებაც გვაქვს, დავეხმაროთ ამ პატარებს _ ტანსაცმლით, საკვებით, საყოფაცხოვრებო ნივთებით”, _ დაწერა ფეისბუქის საკუთარ გვერდზე გაგა ყაჭეიშვილმა და იქვე საკუთარი ანგარიშის ნომერიც მიუთითა, რომელზეც ოჯახისთვის დახმარების გაწევის მსურველებს თანხის ჩარიცხვა შეუძლიათ.
“გურია ნიუსი” ოჯახის მდგომარეობით დაინტერესდა და სანიკიძეებს ესტუმრა.
ნანახმა ყოველგვარ მოლოდინს გადააჭარბა. იშვიათად შეიძლება მოიძებნებოდეს ასეთ პირობებში მცხოვრები ადამიანები _ სახლი, სადაც ბავშვების კი არა, უფროსების ცხოვრებისთვისაც არანაირი პირობა არაა.
როგორც გივი სანიკიძის მეუღლე, ლოლა პაპავა ჩვენთან საუბრისას ამბობს, მისი ქმარი 2020 წლის დეკემბერში ადგილობრივ ქრისტიანებსა და მუსლიმ თემს შორის მომხდარი დაპირისპირების დროს დააკავეს და ამ დრომდე პირობით სასჯელს იხდის. მას საზოგადოებრივი სამუშაოები დააკისრეს და დავალებისამებრ, დადის სხვადასხვა ადგილას სამუშაოების ჩასატარებლად:
“ჩემი მეუღლე ქრისტიანებსა და მუსულმანებს შორის დაპირისპირებისას დაიჭირეს და საზოგადოებრივი სამუშაოები დააკისრეს. დადის, სადაც გამოიძახებენ. ხან ლამპიონის ნათურებს ცვლის, ხან კიდევ სხვა სამუშაოებს ასრულებს.
მერიამ შემოგვთავაზა ქირით გაყვანა, მაგრამ ჩვენ არ გვინდა იმ სახლის დატოვება, სადაც ამდენი წელია ვცხოვრობთ.
ჩოხატაურის მერია დაგვეხმარა _ ცემენტის იატაკი დაგვისხა, კედელი გაგვილესა და შეგვითეთრა, მანამდე “სიკეთის ქალაქიდანაც” იყვნენ მოსულები, ისინიც დაგვეხმარნენ. სოციალურ დახმარებას ვიღებ, ასევე, ვარ სოციალური პროგრამით დასაქმებული და ვიღებ თანხას, როგორც მრავალშვილიანი დედა. მალე ველოდებით სახლის სახურავს და სხვა საჭირო მასალასაც”.
სანიკიძეების ოჯახის პრობლემებთან დაკავშირებით ქვენობნის ადმინისტრაციული ერთეულის მერის წარმომადგენლის თანაშემწეს თეონა ქათამაძეს ვესაუბრეთ:
“კონკრეტულ ოჯახთან არაერთხელ იმყოფებოდა მუნიციპალიტეტის მერი, მისი დახმარებით ოჯახს გადაეცა სამშენებლო მასალები, რითაც მოხერხდა ავარიული კედლის ამოშენება და იატაკების დასხმა, ამ ეტაპზე მერია გადასცემს სახლის სახურავს.
ასევე, ოჯახს აქვს სოციალური შემწეობა, მრავალშვილიანობის დახმარება და ასევე, ქალბატონი დასაქმებულია სოფელში “სოციალურად დაუცველთა დასაქმების” ფარგლებში.
ოჯახში ცხოვრობს 6 წევრი, 4 არასრულწლოვანი და დედ-მამა, რომლებიც სრულიად უნარის მქონენი არიან, რომ გამოკვებონ ოჯახი. ბავშვები დადიან სკოლაში, ბაღში, სადაც საუკეთესო ყურადღება აქვთ მოზარდებს.
სახლი უფრო ავარიული იყო. ახლა, დახმარების გაწევის შემდეგ ცოტათი გაუმჯობესებულია. საჭიროებს შიდა რემონტს. რამდენადაც ვიცი, ერთ-ერთმა გულისხმიერმა მოქალაქემ გადასცა ფანჯრები, რითაც შეძლებენ შეცვალონ ძველი.
რამდენადაც ჩემთვისაა ცნობილი, ამ ეტაპისთვის ოჯახის გადაყვანა ქირით არ იგეგმება, რადგან ოჯახს არ აქვს ამის სურვილი”, _ გვითხრა თეონა ქათამაძემ.
ინფორმაცია სანიკიძეების ოჯახისთვის გაწეული დახმარების შესახებ, დაადასტურა მერიის საზოგადოებასთან ურთიერთობის სამსახურის თანამშრომელმა ლილე კვინტრაძემ, რომელმაც, ასევე, გვითხრა, რომ იგეგმება მათთვის სახურავის და ხის მასალის გადაცემა.
სანიკიძეების ოჯახის შესახებ სტატია მზად იყო დასაბეჭდად, როცა სოციალურ ქსელში გაგა ყაჭეიშვილმა ისევ გამოაქვეყნა ინფორმაცია: “წინ მივიწევთ. დღეს აზომვითი სამუშაოები ჩატარდა სანიკიძეების სახლში. სარემონტო სამუშაოები ჩატარდება მთლიან საცხოვრებელ სახლში. კედლები დაიფარება ხით (პანელით) და იატაკზეც ხე დაიგება. რაშიც თქვენი დახმარება აუცილებელია, მეგობრებო. მადლობას გიხდით გულისხმიერებისთვის. ერთად ვაკეთოთ სიკეთე”, _ დაწერა გაგა ყაჭეიშვილმა.
სანიკიძეების ოჯახში იმყოფებოდნენ, ასევე, სამხარეო ადმინისტრაციისა და ადგილობრივი ხელისუფლების ხელმძღვანელი პირები, წითელი ჯვრის წარმომადგენლებთან ერთად. მათ სოციალურად დაუცველ, მრავალშვილიან ოჯახს შეშა და საკვები პროდუქტები გადასცეს.
ავტორი
