დღეს, ბათუმში, ევროპის 2024 წლის პირველობის შესარჩევი ეტაპის პირველ შეხვედრაში საქართველოს ნაკრები ნორვეგიის ეროვნულ გუნდს უმასპინძლებს. გუშინ, ქართველთა მთავარმა მწვრთნელმა ვილი სანიოლმა პრესკონფერენცია გამართა და რამდენიმე საინტერესო საკითხზე ისაუბრა:
„ესპანეთი – ნორვეგიის მატჩს ვუყურეთ. პირველ რიგში მინდა ვთქვა, რომ ისინი არ იმსახურებდნენ ასეთი ანგარიშით წაგებას, ბოლო ორი გოლი მატჩის მიწურულს გაუშვეს. ძალიან კარგად ითამაშეს. ჩემს ფეხბურთელებს კარგად ესმით, რომ რთული თამაში იქნება, რისთვისაც მზად ვართ.
ხვიჩა ოსტიგორს კარგად იცნობს, მაგრამ მთავარია გუნდი, არა ინდივიდები. ხვიჩა „ნაპოლიში“ ხშირად განსხვავებულ პოზიციებზე თამაშობს, ვიდრე საქართველოს ნაკრებში. ერთა ლიგის ჯგუფთან შედარება? ბულგარეთისა და ჩრდილოეთ მაკედონიის პატივისცემის მიუხედავად, ეს ჯგუფი უფრო ძლიერია და უფრო ძლიერი მეტოქეები გვყავს. ჩვენ გავაანალიზეთ ერთა ლიგის მატჩები, მაგრამ ახლა ძალიან მაინტერესებს, როგორ ვითამაშებთ ძლიერი მეტოქეების წინააღმდეგ და მოუთმენლად ველოდებით მატჩებს.
როგორც ფეხბურთის მოყვარულს, მინდა, რომ მოედანზე ყოველთვის საუკეთესო მოთამაშეები იყვნენ. ეს ჩვენი ფეხბურთელებისთვისაც დიდი მოტივაციაა. ნორვეგიის ნაკრებისთვის ჰოლანდის არყოფნა დიდი დანაკლისია, ამიტომ, სავარაუდოდ, სისტემას შეცვლიან, რაც ჩვენთვის გამოწვევაა, რისთვისაც მზად ვართ.
საქართველოს ნაკრები განსხვავებულად თამაშობს, ვიდრე „ნაპოლი“, ამიტომაც ვთქვი, რომ კვარაცხელია ნაკრებში სხვანაირად თამაშობს, ვიდრე კლუბში. ერთა ლიგაზე მან დაამტკიცა, რომ ნაკრებში ისეთ მაღალ დონეს აჩვენებს, როგორც „ნაპოლიში“, – განაცხადა ვილი სანიოლმა.
გუშინ, ნორვეგიულმა გამოცემამ „VG“ საქართველო-ნორვეგიის მატჩის წინ სპეციალური წერილი გამოაქვეყნა:
„შესაძლოა, კვარაცხელია ამჟამად ევროპის საუკეთესო ფეხბურთელია,“ – ასე დაიწყო საუბარი სტალე სოლბაკენმა, ნორვეგიის ნაკრების მთავარმა მწვრთნელმა ესპანეთთან 0:3 წაგებიდან მეორე დღეს. სამშაბათს, ჩვენს გუნდს საქართველო და ერთი ბიჭი ელოდებიან, მეტსახელად „კვარადონა“. 22 წლის შემტევი წამყვანი საფეხბურთო ხელოვანია მსოფლიოს ერთ-ერთ ყველაზე ლამაზად მოთამაშე გუნდში. ჩემპიონთა ლიგის მიმდინარე სეზონის პირველ ტურში „ნაპოლიმ“ „ლივერპული“ 4:1 დაამარცხა, საფეხბურთო სამყარომ კი, კვარაცხელიაზე დაკვირვება ამ დღიდან დაიწყო.
ნეაპოლში დიეგო მარადონა ყველას ახსოვს – ის კლუბში მივიდა და გუნდს იტალიის ჩემპიონობა მოუტანა, პირველად კლუბის ისტორიაში. ახლა „ნაპოლი“ „სერია ა“-ს 19-ქულიანი ჰანდიკაპით ლიდერობს და მცირე შანსიც არ არის, რომელიმე მეტოქემ სამხრეთელთა ტრიუმფს ხელი შეუშალოს. ამ წარმატებაში უდიდესი წვლილი, სწორედ ხვიჩა კვარაცხელიას შეაქვს, ვის გამოც საქართველოს ნაკრები საშიშ მეტოქედ აღიქმება. შარშან ამ გუნდმა შვედეთს 2:0 მოუგო, ორივე გოლი ხვიჩამ გაიტანა.
„ხვიჩას თამაშს თვალს რუსეთსა და საქართველოში ვადევნებდი. ის ბრწყინვალედ მოქმედებდა, მაგრამ ეჭვი მქონდა, ნუთუ ის იყო ასეთი კარგი, ან იქნებ სხვები იყვნენ დაბალ დონეზე,“ – ამბობს ტორ-კრისტიან კარლსენი, საფეხბურთო მენეჯერი და ქართული ფეხბურთის მოყვარული, რომელმაც საკუთარ პოდკასტს „ჩივაძე“ დაარქვა.
კიდევ ერთი ადამიანი, რომელსაც თვალები მალე აეხილა, ეს ლეო სკირი ოსტიგორი გახლავთ, კვარაცხელიას თანაგუნდელი ნაპოლიში.
„ნაპოლიში“ ერთად მივედით და ჩემი ყურადღება ძალიან მალე მიიპყრო. უკვე ერთი კვირის შემდეგ მეგობრებს ვუთხარი, მისთვის თვალი უნდა მიედევნებინათ და მართალიც ვიყავი. გუნდში მოსვლის დღიდან ის ძალიან მაგრად თამაშობს, თითქმის ყველა კომპონენტში ძალიან ძლიერია და მატჩის ბედის გადაწყვეტა დამოუკიდებლად შეუძლია,“ – გვითხრა ლეო ოსტიგორმა.
საქართველოს ნაკრები ჩვენს გუნდს ბათუმში უმასპინძლებს, რომლის 20 000 მაყურებლიანი სტადიონის ბილეთები რამდენიმე საათში სრულად გაიყიდა. ეს ადგილობრივებს ერლინგ ჰაალანდისა და მარტინ ედეგორის სანახავად არ გაუკეთებიათ, არამედ იმიტომ, რომ საქართველოში კვარაცხელიას ეიფორია არსებობს. რამდენიმე ასეული ქართველი ნაპოლის ყველა საშინაო შეხვედრას ესწრება.
„ნაპოლის“ მატჩზე დასასწრებად იტალიაში ჩვენც ჩავედით, იმ დღეს ნეაპოლიტანელები „ატალანტას“ მასპინძლობდნენ. ხვიჩას ჩაწერა ვცადეთ, მაგრამ კლუბის პრესსამსახურმა უარი გვითხრა. თუმცა, ამას ხელი არ შეუშლია აღვფრთოვანებულიყავით მისი თამაშით. კვარაცხელია მოედანზე სრულად უნიკალურად მოქმედებს, მისი ტემპი, მოძრაობები, მოწინააღმდეგეზე ისე მიდის, თითქოს საკუთარ ეზოში თამაშობდეს. ეს ბიჭი მცირე არეულობასაც მარტივად იყენებს, აკეთებს იმას, რაც უნდა.
„ატალანტას“ პირველი გოლი ქართველმა გაუტანა. მეტოქის 3-4 ფეხბურთელი ისე გამოიყვანა, თითქოს ყინულზე სრიალებდნენ. მოძრაობები ისე სწრაფად და დახვეწილად შეიცვალა, რომ ულამაზესი გოლის გატანაში ხელი ვერავინ შეუშალა.
„აი, როგორ თამაშობს. ხვიჩა განსაკუთრებული ფეხბურთელია, რომელსაც ძალიან კარგი სისწრაფე აქვს, მთელი მატჩის მანძილზე ძალიან სახიფათოა და უცებ აფეთქდება ხოლმე,“ – გვითხრა ოსტიგორმა თამაშის შემდეგ.
„არ ვფიქრობ, რომ ხვიჩას პერსონალურად ერთი ფეხბურთელი უნდა მივამაგროთ. მის წინააღმდეგ თავი გუნდურად უნდა დავიცვათ. ადვილი ნამდვილად არ იქნება, მაგრამ შეუძლებელი არაფერია,“ – ურჩევს ნაკრებს ლეო სკირი ოსტიგორი.“
საქართველოსა და ნორვეგიის ნაკრებთა მატჩი დღეს, ბათუმში, „აჭარაბეთ არენაზე“ 20:00 საათზე გაიმართება. ვილი სანიოლის გუნდი საკვალიფიკაციო ეტაპს ამ თამაშით დაიწყებს, ხოლო ნორვეგიამ 25 მარტს, სტუმრად ესპანეთის ნაკრებთან 0:3 წააგო.
ავტორი
