საქართველო – ნორვეგიის შეხვედრა ფრედ – 1:1 დასრულდა. შედეგის გამო ნორვეგიელთა ქომაგები იმედგაცრუებული გახლდნენ და ეს განწყობა იქაურ სოციალურ ქსელებში კარგად აისახა:
„მატჩების მოგება შეუძლებელია, თუ კარგად მხოლოდ 45 წუთის განმავლობაში ითამაშებ“.
„მეტოქეს ვერ ვაჯობეთ“.
„სამწუხაროდ, ევროპის ჩემპიონატი უნდა დავივიწყოთ, საკმარისად ძლიერები არ ვართ“.
„იმედგაცრუებული ვარ, თუმცა ამას უკვე 20 წელია მივეჩვიე. კარგი შანსები გვქონდა, მაგრამ გოლის გატანა 5 მეტრიდან ვერ შევძელით“.
„გამარჯვებას არ ვიმსახურებდით“.
„საქართველოს ნაკრები ასეთი თამაშის გამო ქებას იმსახურებს“.
„ხუთი გოლი უნდა გაგვეტანა, მაგრამ მომენტები ვერ გამოვიყენეთ“.
ბათუმში ჩატარებული შეხვედრის შემდეგ, ნორვეგიის ეროვნული გუნდისა და „ნაპოლის“ ცენტრალურმა მცველმა ლეო ოსტიგორმა გამოცემასთან „Calcionapoli“ საქართველოს ნაკრებსა და ხვიჩა კვარაცხელიას შესახებ ისაუბრა:
„პირველ ტაიმში უკეთესად ვითამაშეთ, თუმცა მომენტები ვერ გამოვიყენეთ, უფრო მეტი გოლი უნდა გაგვეტანა. ცხადია, საქართველოს ნაკრებისა და „ნაპოლის“ თამაში განსხვავდება. ყველაფერი გავაკეთეთ, რომ ხვიჩა შეგვეჩერებინა. „კვარა“ დიდებული ადამიანი და შესანიშნავი ფეხბურთელია, მიხარია, რომ ჩემი თანაგუნდელია. მის წინააღმდეგ თამაშიც სასიამოვნო იყო.
რაც შეეხება საკლუბო სეზონს, ყველა ტიტულის მოგებას ვეცდებით. ქალაქი, ფანები, სტადიონი, ნეაპოლში ყველაფერი შესანიშნავია“, – განაცხადა ლეო ოსტიგორმა.
გუშინ, გამოცემამ „Foot Mercato“ გაავრცელა ინფორმაცია, რომ ხვიჩა კვარაცხელიამ იტალიური „ნაპოლისთან“ ახალი კონტრაქტის დეტალები უკვე შეათანხმა და კლუბში ხანგრძლივი პერიოდით დარჩენაზე თანახმაა.
გაირკვა, რომ კვარაცხელია მზადაა ნეაპოლელებთან ხელშეკრულება 2028 წლამდე გააფორმოს. მისი ხელფასი მილიონი ევროს ნაცვლად, 2.5 მილიონი გახდება, ხოლო ბონუსების ჩათვლით 4 მილიონს მიიღებს.
„ეს ანაზღაურება, შესაძლოა, სასაცილოდ მოსჩანდეს ევროპული ფეხბურთის სხვა ვარსკვლავებისთვის, თუმცა, „ნაპოლისთვის“, სადაც დიდი ფული არ ტრიალებს, მნიშვნელოვანი თანხაა. მაგალითად, ოსიმენი, რომელიც ნეაპოლელთა ყველაზე მაღალანაზღაურებადი მოთამაშეა, ბონუსებთან ერთად მხოლოდ 5 მილიონ ევროს იღებს“, – დაწერა იტალიურმა ვებგვერდმა.
ამავე გამოცემის მტკიცებით, იტალიური კლუბი არ აპირებს კვარაცხელიას კონტრაქტში გამოსასყიდი თანხა ჩაწეროს, თუმცა, ფეხბურთელს ჰპირდება, რომ 2024 წლიდან სატრანსფერო მოლაპარაკებებისთვის მზად იქნება.
ამჟამინდელი ინფორმაციით, „ნაპოლი“ ქართველი ლეგიონერის სანაცვლოდ მინიმუმ 100 მილიონ ევროს მოითხოვს.
საკალათბურთო ევროლიგაში გამართული მატჩის დროს საქართველოს ნაკრებისა და ბოლონიის „ვირტუსის“ თავდამსხმელი თორნიკე შენგელია „მაკაბის“ გულშემატკივრებს დაუპირისპირდა.
გუშინ ქართველმა მოთამაშემ სოციალურ ქსელში შემდეგი განცხადება გამოაქვეყნა:
„ისრაელში თამაში ჩემთვის ყოველთვის დიდი სიამოვნება იყო, იქნებოდა ეს კლუბში „მაკაბის“ წინააღმდეგ, თუ FIBA-ს შეჯიბრებებზე. ისრაელში გულშემატკივრები ყოველთვის თბილად მეგებებოდნენ და მათგან მუდამ მხარდაჭერას ვგრძნობდი, რისთვისაც მადლიერი ვარ. „მაკაბი“ და მისი გულშემატკივრები ყოველთვის პატივისცემას იმსახურებდნენ ჩემგან და გუშინდელი დღე ამას ვერ შეცვლის. უმცირესობა ვერ განსაზღვრავს უმრავლესობის პოზიციას. მადლობა ყველა გულშემატკივარს მხარდასაჭერი წერილებისთვის“.
თორნიკე შენგელიამ ევროლიგის მორიგ ტურში, თელ ავივის „მაკაბის“ წინააღმდეგ 21 წუთი ითამაშა, რა დროშიც 5 ქულა, 2 მოხსნა და 2 შედეგიანი გადაცემა დააგროვა. შეხვედრა მისმა „ვირტუს ბოლონიამ“ 111:80 წააგო – 80:111.
მატჩის მეოთხე პერიოდის დაწყების წინ, კი შენგელია მეტოქე გუნდის გულშემატკივრებს დაუპირისპირდა, რადგან ისინი ქართველის მიმართ შეურაცხმყოფელ ფრაზებს ისროდნენ.
ავტორი
