როგორც წესი, სადღესასწაულო დღეებში ფასების მატება, განსაკუთრებით, სოფლის პროდუქტზე, ჩვეულებრივი ამბავია. თუმცა, ზოგჯერ პირიქითაც ხდება _ ზოგიერთი პროდუქტის ფასი შედარებით იკლებს.
წინასააღდგომო ბაზარი ოზურგეთში გამორჩეულად განსხვავებულია.
ახლა, ბოლო ათი დღის მანძილზე, აქტიურად საუბრობენ შინაური ფრინველის ფასის მნიშვნელოვნად ზრდაზე.
_ გოჭი არ გაძვირებულა _ ცოცხალი წონა კვლავ 15 ლარი ღირს, ერთი კილოგრამი. ქათმების და ინდაურის ფასი კი, ლამის, გააორმაგეს, _ წუწუნებენ მომხმარებლები.
ოზურგეთის ბაზარში, წინასააღდგომო კვირაში, განსაკუთრებით ძვირი ღირს სოფლის ქათამი, ინდაური, გოჭი.
მამალ ინდაურს, რომელიც გალიაში ცალკე ჰყავთ დამწყვდეული და ხუმრობენ კიდეც მოვაჭრე ქალბატონები, “სამარტოო საკანში” გვყავსო, 120 ლარს აფასებენ.
_ დედალი ინდაურებიც აქვე გვყავს _ 100 ლარი ღირს. ეს კი მამალი ინდაურია _ 120 ლარი ღირს. ხომ ხედავთ, რამხელაა? თან საკმაოდ ავი აღმოჩნდა და ცალკე ამიტომ დავამწყვდიეთ, თორემ სხვები აქვე, შემოღობილში გვყავს გაშვებული. სიმინდს ვყიდულობთ და ისე ვკვებავთ. ერთ დღეში ხომ არ გაიყიდება ყველა? გაჭირვებისაა ჩვენი მუშაობა. ზოგს კი ჰგონია, ეს ქათმები და ინდაურები ციდან ცვივა და ჩვენ ვაფასებთ ამდენს, _ წუხან ფრინველზე მოვაჭრე ქალბატონები.
ასევე, შედარებით გაძვირებულია ქათამი _ “ძველი დედალი”, როგორც აქ უწოდებენ, 35-40 ლარი ღირს. აქამდე კი, მისი შეძენა 25 ლარად იყო შესაძლებელი.
კითხვაზე, თუ რატომ მოიმატა ასე უცბად შინაური ფრინველის ფასმა, რაზეც აქტიურად საუბრობენ მომხმარებლები, ასეთ კომენტარს აკეთებენ:
_ არ ვიცით, არ შემოჰყავთ. ვერც ჩვენ მოვიძიეთ სოფლებში. შესაძლოა, აღდგომის კვირაში შემოიყვანონ. ახლა კი, რაკი ნაკლებია, შესაბამისად, ფასიც გაძვირდა, _ გვითხრეს აქ.
საკმაოდ ძვირია სიმინდის ფქვილი. ერთი კილოგრამი ხუთი ლარი ღირს. ერთ კილოგრამ საქონლის ხორცს 20 ლარს აფასებენ.
შედარებით დაიკლო ყველის ფასმა. ერთი კილოგრამის ყიდვა 11 ლარადაც არის შესაძლებელი. ზოგადად კი, 12 ლარს აფასებენ.
_ დილით ადრე გამოვდივარ და სოფლების ავტობუსებს ვხვდები. მყავს ჩემი კლიენტები. ვიბარებ ყველს და შემდეგ ვყიდი. რა მრჩება? ერთ კილოგრამზე ერთი ლარი. ზოგჯერ ისიც არა, თუმცა, ჩემთვის ეს პურის ფულია. როგორ ფიქრობთ, რომ მქონდეს რაიმე სამუშაო, აქ დავდგები?! რომ მეკითხებით, როგორ ყიდიო, ის მკითხეთ, რატომ ვარ ასეთ გასაჭირში. ჯერ მოხუცი არ ვარ, რომ შინ დავჯდე. პურის და შაქრის ფული ხომ მინდა? ჩემთვის და ჩემნაირი ადამიანებისთვის სადღესასწაულო დღეები ცოტა უმჯობესია _ მეტი შემოსავალი გვაქვს, შედარებით, თუ ამას შემოსავალი ჰქვია! აღდგომა ადრე ძალიან გვიხაროდა, ახლაც ბედნიერად გაგითენოთ ღმერთმა ყველას, თუმცა, ასე პურის ფულისთვის საწანწალოდ არ ვიყავით გამოსული. იტყვი რაიმეს და კომუნისტები გენატრებათო. საშუალოდ მაინც გვაცხოვროს ხელისუფლებამ და რაში მედარდება, რომელი პარტია იქნება ზემოთ? _ გვეუბნება ბაზარში მოვაჭრე, ქეთინო ხაბულიანი, რომელიც მრავალი წელია, რძის ნაწარმით ვაჭრობს და მისივე თქმით, პურს ასე ყიდულობს.
დაიკლო რძის ფასმაც. სოფელ ნაგომრის მკვიდრი, დიმა ბერიძე გვეუბნება, რომ საკუთარი ფერმა ჰყავს.
_ ვწვალობთ, ვშრომობთ მთელი ოჯახი. თუმცა, არ გვიჭირს. ეს კი მწყინს _ ამ დილით ჩამოვიტანე გაკრიალებული რძე, ორ ლარს ვაფასებ ერთ ლიტრს და მეკითხებიან, ზოგიერთები, ნამდვილიაო? ბაზარში ორლარნახევარი და სამი ლარი ღირსო. შე დალოცვილო, ამდენი ყველი, რძე, მაწონი ჩამოვიტანე, ღამეებს ვათენებთ, შედარებით ნაკლები დაგიფასეთ, რომ შინ დროზე წავიდე და ასე უნდა მატკინო გული? _ შეწუხებულმა შემოგვჩივლა ბატონმა დიმამ და გვითხრა, ვისაც გსურთ, ჩაიწერეთ ჩემი ტელეფონის ნომერი და ნატურალურ რძეს და ყველს დროულად მოგაწვდით, სადაც გსურთ, იქ შეამოწმეთ მერეო.
სააღდგომო რიტუალის ყველაზე აუცილებელი ატრიბუტი, კვერცხი კვლავ 50 თეთრი ღირს ერთი ცალი.
_ ქათამი გაძვირდა, კვერცხი _ არა! სავარაუდოდ, ხალხი ქათმებს ვერ ელევა გასაყიდად. გაზაფხულია, სეზონია, კვერცხს დებენ და უმჯობესიც არისო, _ საუბრობენ ბაზარში.
ერთადერთი, რასაც ფასი არ მომატებია, კვერცხის საღებავებია. განსაკუთრებით, ბუნებრივი საღებავი _ ენდროს ფესვები, რომელიც ოზურგეთის ბაზარში, ძირითადად, იმერეთიდან ჩამოაქვთ და რომლის ერთი მოზრდილი კონა, ორი ლარი ღირს. იმავე რაოდენობით, იმავე ფასად იყიდებოდა შარშანაც.
ავტორი
