ხვნა-თესვასთან დაკავშირებული პრობლემები ლანჩხუთის მოსახლეობას დიდი ხანია, აწუხებს. გარდა იმისა, რომ მუნიციპალიტეტში სახნავ-სათესი ტექნიკის დიდი დეფიციტია, რის გამოც, ხშირ შემთხვევაში, მოსახლეობა ყანის გარეშე და შემოდგომა-ზამთრისთვის სიმინდის გარეშე რჩება, ერთ-ერთი მთავარი ფაქტორი, რატომაც ვერ ახერხებს სოფლის მოსახლეობა ყანის დახვნა-დათესვას, როგორც თავად ამბობენ, მატერიალური სიდუხჭირეა. მათი თქმით, არანაირი შესაძლებლობა არ აქვთ, რომ ხვნა-თესვისთვის საჭირო თანხა მოიძიონ.
“ძალიან რთული მდგომარეობაა. სურვილი დიდია, რომ ყანა დავთესოთ და წლის სარჩო მოვიყვანოთ, მაგრამ, სამწუხაროდ, ფინანსების მოძიება ჭირს. 1000 მეტრი მიწის დამუშავება-დათესვა 60-70 ლარი ჯდება. მერე სასუქიც ხომაა საჭირო?! ბევრისთვის ეს თანხა შეიძლება არც არაფერია, მაგრამ ჩვენ გვკითხონ, პენსიის იმედად რომ ვართ თვიდან თვემდე, როგორია ამ ხარჯის გაღება?! ზოგ ოჯახს ეს პენსიაც არ აქვს. როგორ უნდა შეწვდეს სოფლად მცხოვრები ადამიანი ამხელა ფასებს?! ლანჩხუთი აგრარული მუნიციპალიტეტია და ჩვენთან სასიცოცხლოდ მნიშვნელოვანია მიწის დამუშავება აგროვადებში. ბაზარზე ერთი კილო მჭადის ფქვილი ხუთი ლარი ღირს, თუ მასობრივად მოხდა ფართობების გაჩერება, მაშინ შეიძლება მისი ფასი უფრო მაღალი დარჩეს”, _ ამბობენ ადგილობრივები.
ლანჩხუთის წარმომადგენლობითი ორგანოს წევრმა მმართველი გუნდიდან ელისო ჭიჭინაძემ სწორედ ამ კუთხით არსებულ პრობლემებზე გააკეთა აქცენტი საკრებულოს ბოლო სხდომაზე. დეპუტატმა, როგორც სახნავ-სათესი ტექნიკის დეფიციტზე, ასევე, მოსახლეობის მატერიალურ სიდუხჭირეზეც გაამახვილა ყურადღება. მისი თქმით, მოსახლეობის უმრავლესობა საკუთარი სახსრებით ვერ შეძლებს ხვნა-თესვის სამუშაოების ჩატარებას, თუ სახელმწიფოსგან ფინანსური ხელშეწყობა არ იქნა.
ხვნა-თესვის საკითხს სხდომაზე საკრებულოს ოპოზიციონერი წევრი გოჩა ჯანაშიაც გამოეხმაურა: “მუნიციპალიტეტს ყოველწლიურად უნდა ჰქონდეს მონაცემები, თუ რამდენი ჰექტარი მიწა დამუშავდა, რა მოსავალი მივიღეთ, რომ ანალიზი გაკეთდეს _ რომელ სოფელში რა პრობლემაა და ამის საფუძველზე მომზადებულები შევხვდეთ საგაზაფხულო სამუშაოებს. ამისთვის მერიას სულაც არ სჭირდება დიდი ძალისხმევა. ერთი ადამიანიც საკმარისია, რომ ამ კუთხით კომუნიკაცია ჰქონდეს ადმინისტრაციული ერთეულების წარმომადგენლებთან”.
თემის პასუხად სხდომაზე მყოფმა მერის პირველმა მოადგილემ, ეკატერინე გუჯაბიძემ განმარტა, რომ მუნიციპალიტეტში ხვნა-თესვის მხრივ წინა წელთან შედარებით წინსვლაა:
“გამოკვეთილი მიმართულება ამ მხრივ არსებობს, თუმცა, შარშანდელზე უკეთესი მდგომარეობაა”, _ განმარტა მერის მოადგილემ, თუმცა, არ დაუკონკრეტებია, რა აძლევს ასეთი ოპტიმიზმის იმედს.
ცნობისთვის, შარშან საქართველოს მთავრობის მიერ სასოფლო-სამეურნეო დანიშნულების მიწის ნაკვეთების მესაკუთრეთა ხელშეწყობის სახელმწიფო პროგრამა ამოქმედდა, რომლის ბიუჯეტიც 35 მილიონ ლარზე იყო გათვლილი და მისით 300 ათასამდე ფერმერმა ისარგებლა. პროგრამის ფარგლებში, სასოფლო-სამეურნეო მიწაზე სუბსიდიის მოცულობა განისაზღვრა 1ჰა-ზე 300 ლარით. სუბსიდია მიიღეს 0.25 ჰა-დან 1.25 ჰა-ს ჩათვლით მიწის მესაკუთრეებმა.
ბენეფიციარებს სუბსიდია სპეციალურ აგრობარათებზე ქულების სახით დაერიცხათ, რომლის გამოყენება სასოფლო-სამეურნეო საქმიანობის გახორციელებისთვის საჭირო საქონლის შესასყიდად შეეძლოთ.
როგორც მაშინ მთავრობაში განმარტეს, პროგრამის დამტკიცების ერთ-ერთ მნიშვნელოვან წინაპირობას ქვეყანაში სასოფლო-სამეურნეო სამუშაოების დროული და ეფექტური გახორციელების ხელშეწყობა, წარმოებისთვის საჭირო საშუალებებზე ხელმისაწვდომობის გაუმჯობესება და აგრარული სამუშაოების მიმართულებით აქტივობის სტიმულირება წარმოადგენდა და რომ სასოფლო-სამეურნეო დანიშნულების მიწის ნაკვეთების მესაკუთრეთა ხელშეწყობის სახელმწიფო პროგრამა დადებით გავლენას მოახდენდა წარმოებული პროდუქციის თვითღირებულების შემცირებაზე.
მთავრობამ ფერმერების დასახმარებლად 2021 წელსაც გასწია დახმარება და მთელი საქართველოს მასშტაბით, ანტიკრიზისული გეგმის ფარგლებში, აგროდიზელის პროგრამა აამუშავა, რომლითაც ფერმერებმა დიზელის საწვავის შეძენისას შეღავათები მიიღეს.
ოფიციალური ინფორმაციით, პროგრამით 5 000-ზე მეტმა ფერმერმა ისარგებლა. რეგიონულმა საინფორმაციო-საკონსულტაციო სამსახურებმა გასცეს 2 700 000 ლიტრზე მეტი საწვავის ტალონი.
მაშინ გარემოს დაცვისა და სოფლის მეურნეობის მინისტრი ამბობდა, რომ აგროდიზელის სახელმწიფო პროგრამა მომდევნო წლებშიც გაგრძელდებოდა, თუმცა, ფაქტია, წელს მსგავსი არაფერი ხდება, არადა, მოსახლეობა სწორედ რომ ფინანსური სიდუხჭირის გამო იკავებს თავს საყანე ფართობების დამუშავებისგან.
ავტორი
