11 მაისს, ოზურგეთში, ონლაინგამოცემა „გურიის მოამბის“ კუთვნილი ბილბორდების დემონტაჟი გახორციელდა.
„გურიის მოამბის“ დამფუძნებელი, ჟურნალისტი ლადო მენაბდე „გურია ნიუსთან“ საუბრის დროს ამბობს, რომ ოზურგეთის მუნიციპალიტეტის მერიის შესაბამისმა სამსახურებმა მათ მფლობელობაში მყოფი ბილბორდების დემონტაჟი მოახდინა.
“ერთ-ერთ ბილბორდზე გაკრული იყო პლაკატი წარწერით „რუსკი კარაბლი იდი ნა ხ…“. ამით გამოვხატეთ უკრაინისადმი მხარდაჭერა, ოზურგეთის მუნიციპალიტეტის მერმა კი ამ მხარდაჭერის გამო დაგვსაჯა“, _ გვითხრა ლადო მენაბდემ.
„გურიის მოამბის“ ადვოკატის კახა ჩავლეშვილის თქმით, მედიასაშუალებას მუნიციპალიტეტთან 2009 წელს გაფორმებული ხელშეკრულების მიხედვით სარგებლობაში აქვს 4 მიწის ნაკვეთი (თითოეული 10 კვ/მ), რომლებზედაც ბილბორდებია განთავსებული:
„რამდენიმე დღის წინ, მერიამ მოგვთხოვა მიწის ნაკვეთების სარგებლობისთვის გადასახადების შესახებ დოკუმენტაციის წარდგენა, რაც შევასრულეთ და წარვადგინეთ 2018-2019-2020-2021-2022 წლის გადასახადების საბანკო ჩარიცხვის ქვითრები.
მერია ითხოვდა გადასახადებს 2009 წლიდან დღემდე, რაზეც განვუმარტეთ, რომ ბუღალტრულ/საანგარიშებო დოკუმენტაციას ვინახავდით, საგადასახადო კოდექსით დადგენილი წესით, 3 წლის განმავლობაში; ასევე განვუმარტეთ, რომ ადრეულ წლებში გადასახადებს ვიხდიდით „პრივატ–ბანკის“ ანგარიშიდან ან პირდაპირ შეგვქონდა ხაზინაში, რასთან დაკავშირებითac მუნიციპალიტეტს პრეტენზია დღემდე არ ჰქონია.
რადგან წარდგენილი გვქონდა მიმდინარე გადასახადების გადახდის დამადასტურებელი დოკუმენტები, მერიას არ ჰქონდა უფლება, შეეწყვიტა ხელშეკრულება, ხოლო თუ სურდა სადაო საკითხის გარკვევა, კანონით დადგენილი წესით უნდა მიემართა სასამართლოსათვის. მიუხედავად ამისა, მერიამ ბრძანებით შეგვიწყვიტა ხელშეკრულება. ამ ქმედების სასამართლოში გასაჩივრებისას, სასამართლომ არ მიიჩნია მერიის ბრძანება ადმინისტრაციული წესით განსახილველ საქმედ, რის შემდეგაც დავიწყეთ სამოქალაქო დავა _ წარვადგინეთ შესაბამისი სარჩელი, რომელიც სასამართლომ მიიღო წარმოებაში და სარჩელის უზრუნველყოფის მიზნით დააყადაღა ოთხივე ნაკვეთი.
მიუხედავად იმისა, რომ საქმის წარმოება სასამართლოში მიმდინარეობდა და ნაკვეთები დაყადაღებული იყო, ოზურგეთის მუნიციპალურმა ინსპექციამ, შეგვიდგინა ადმინისტრაციულ სამართალდარღვევათა ოქმები, რომელთა მიხედვითაც მუნიციპალური ქონების (4 მიწის ნაკვეთი თითოეული 10 კვ/მ) სარგებლობისათვის სახდელის სახით შეგვიფარდა გაფრთხილება.
ხსენებული სახდელის დაკისრება არის უკანონო და ის გასაჩივრებული იქნა. მიუხედავად ამისა, 11 მაისს, დაახლოებით 12 საათზე, კვლავ ჩაგვბარდა იგივე ნაკვეთების სარგებლობისათვის ადმინისტრაციული სამართალდარღვევის ოქმები, რომელთა მიხედვითაც დაჯარიმებული ვიყავით მთლიანობაში 8 000 ლარით. რამდენიმე საათში ეს ოქმებიც გავასაჩივრეთ, დაახლოებით 15 საათზე კი გვაცნობეს, რომ მერია აპირებდა ბილბორდი დემონტაჟს, ადგილზე მობილიზებული იყო ტექნიკა, იქვე იყვნენ მუნიციპალური ინსპექციის თანამშრომლები.
როდესაც მუნიციპალური ინსპექციის წარმომადგენლებისაგან მოვითხოვეთ რაიმე სახის დოკუმენტი, რომელიც მათ ბილბორდების დემონტაჟის უფლებას აძლევდა, ინსპექციის თანამშრომლებმა გვითხრეს, რომ მათ ასეთი დოკუმენტი არ ჰქონდათ და იქ იყვნენ იმისათვის, რომ ბილბორდი „დემონტაჟის დროს ვინმეს თავში რაიმე არ დასცემოდა“.
ასევე, ვერაფერი ვერ გავიგეთ იქვე არსებული ტექნიკის მძღოლებისაგან და სხვა პირებისაგან, რომლებიც აცხადებდნენ, რომ იქ უბრალოდ იყვნენ მისულები.
ვინაიდან რეალურად ხდებოდა ბილბორდი ქურდობა, გამოვიძახეთ პატრული, რომელიც მოვიდა ადგილზე, ასევე, მოვიდა პოლიციაც, რომლებსაც განვუმარტეთ, რაც ხდებოდა.
დაახლოებით ერთ საათში, მუნიციპალურმა ინსპექციამ ადგილზე მოიტანა და პოლიციას გადასცა მერიის მიერ 2023 წლის 11 მაისს გამოცემული აქტი, რომელიც წაგვიკითხეს. შინაარსიდან გავარკვიეთ, რომ დადგენილი იყო ბილბორდების დემონტაჟი და რომ ამ აქტის გასაჩივრება არ აჩერებდა დემონტაჟს.
ხსენებული აქტი მანამდე ჩვენთვის არ გადმოუციათ, ასევე, არ გადმოგვცეს ადგილზეც.
ამის შემდეგ წავედით მერიაში სადაც მოვითხოვეთ აქტის გადმოცემა, მაგრამ არ გადმოგვცეს _ გვითხრეს, რომ უნდა დაგვეწერა განცხადება და გამოგვიგზავნიდნენ, რაც სრული უკანონობაა. ანუ ბილბორდების დემონტაჟი ისე დაიწყეს, რომ დემონტაჟზე აქტი გამოცემული არ იყო და, შესაბამისად, არც ინსპექციას გააჩნდა. ასევე, უნდა აღინიშნოს, რომ მერიის მიერ განხორციელდა იძულებით აღსრულება ისეთ პირობებში, როდესაც ჩვენ არ მოგვეცა ვადა, თუნდაც ნებაყოფლობით აღგვესრულებინა გადაწყვეტილება. ასევე, არასწორია ის, რომ დემონტაჟის შეჩერება შეუძლებელი იყო, რადგანაც ადმინისტრაციულ საპროცესო კოდექსის 29-ე და 31-ე მუხლები ითვალისწინებს ასეთი ტიპის აქტების შეჩერებას.
აქედან გამომდინარე, სრულ უკანონობასთან გვაქვს საქმე _ ძალიან მანკიერ პრაქტიკას დაუდო სათავე მუნიციპალიტეტმა, რაც სერიოზულ საშიშროებას წარმოადგენს საზოგადოებისათვის, ვინაიდან ასეთი პრაქტიკის მიხედვით, მუნიციპალიტეტმა შეიძლება დაანგრიოს ყველაფერი, შემდეგ კი გითხრას, რომ წახვიდე სასამართლოში და იჩივლო, სადაც საქმის განხილვას 3-4 წელი მაინც სჭირდება.
ასეთ ფაქტებს საზოგადოების მხრიდან სათანადო შეფასება და რეაგირება სჭირდება, ვინაიდან ასეთი ქმედების მსხვერპლი სამომავლოდ შესაძლებელია ნებისმიერი გახდეს.
ჩვენ არ ვაპირებთ შევეგუოთ იმ უსამართლობას, რასაც ადგილი ჰქონდა. ასევე, მოვუწოდებთ ოზურგეთის მუნიციპალიტეტის ყველა თანამშრომელს, რომ არ შეასრულონ მუნიციპალიტეტის ხელმძღვანელობის უკანონო მითითებები, რადგანაც ასეთ შემთხვევაში პასუხისმგებლობა ყველაზე ნაწილდება“, _ ასეთია „გურიის მოამბის“ კახა ჩავლეშვილის პოზიცია ბილბორდების საქმეზე.
“გურია ნიუსი“ ამ საკითხთან დაკავშირებით ოზურგეთის მუნიციპალიტეტის მერიის პრესსამსახურს დაუკავშირდა, საიდანაც ასეთი პასუხი მივიღეთ:
„ქალაქ ოზურგეთში, მუნიციპალური ინსპექციის თანამშრომლებმა უფლებამოსილების ფარგლებში, შპს „გურიის მოამბის“ მიერ განთავსებული ბილბორდების დემონტაჟი მოახდინა.
ვინაიდან შპს „გურიის მოამბეს“ მუნიციპალიტეტის წინაშე წლების განმავლობაში დაგროვილი საიჯარო ქირის დავალიანება უფიქსირდება, დაერიცხა შესაბამისი პირგასამტეხლო.
ამასთანავე გაცნობებთ, რომ „გურიის მოამბეს“ ოთხივე ბილბორდზე იჯარის სახით უნდა გადაეხადა თვეში 25 ლარი (ანუ თითოეულ ბილბორდზე თვეში 6 ლარი და 25 თეთრი), წელიწადში კი ჯამურად, ყველა ბილბორდზე 300 ლარი.
აღნიშნულის თაობაზე შპს–ს დირექტორს წერილობით არაერთხელ ეცნობა, ჩატარდა ადმინისტრაციული წარმოება და მიეცა ვადა, როგორც დავალიანების დასაფარად, ასევე, დოკუმენტების წარმოსადგენად, თუმცა, მისი მხრიდან დავალიანების დაფარვა და დოკუმენტაციის წარმოდგენა არ მომხდარა.
მოქმედი კანონმდებლობის ყველა მოთხოვნის დაცვით, გახორციელდა ხელშეკრულების შეწყვეტა და ამის შესახებაც ეცნობა ვლადიმერ მენაბდეს. ასევე, ჩაბარდა ოფიციალური შეტყობინება ქონების მუნიციპალიტეტისათვის დაბრუნების თაობაზე, რაც მისი მხრიდან უგულებელყოფილ იქნა.
ყველა მოიჯარემ პირნათლად უნდა შეასრულოს აღებული ვალდებულება და დაიცვას კანონი“, _ წერია ოზურგეთის მუნიციპალიტეტის მერიის მიერ გამოგზავნილ წერილში.
ავტორი
