გუშინ, „ნაპოლის“ პრეზიდენტმა აურელიო დე ლაურენტისმა იტალიურ ტელეკომპანიას „Rai3“ დაუდასტურა, რომ ლუჩანო სპალეტი ოფიციალურად მიდის და ერთწლიან პაუზას იღებს.
რაც შეეხება ნეაპოლური კლუბის ახალ მთავარ მწვრთნელს, ცნობილი გახდა რომ ამ თანამდებობის დაკავების ყველაზე დიდი შესაძლებლობა ესპანელ ლუის ენრიკეს გააჩნია.
იტალიური მედიის მტკიცებით, დე ლაურენტისმა გარანტია მისცა 53 წლის ესპანელ სპეციალისტს, რომ ხვიჩა კვარაცხელია და ვიქტორ ოსიმენი გუნდში რჩებიან. რომ არა ეს გარანტია, ლუის ენრიკე „ნაპოლის“ არც დაელაპარაკებოდა. სხვადასხვა წყაროების ინფორმაციით, ლუის ენრიკე ხელს მოაწერს ორწლიან კონტრაქტს და ჯამურად მიიღებს 10 მილიონ ევროს. ელოდებიან, რომ ესპანეთის ნაკრებისა და „ბარსელონას“ ყოფილ მთავარ მწვრთნელთან ხელშეკრელუბა ამ კვირაში გაფორმდება.
იტალიური მასმედიის მტკიცებით, „ნაპოლის“ მიმდინარე სეზონის დასრულების შემდეგ ტანგი ნდომბელე და დიეგო დემე დატოვებენ.
ნდომბელე ნეაპოლურ კლუბში იჯარით თამაშობს და „ტოტენჰემიდან“ მის გამოსყიდვას არ აპირებენ. ფრანგმა ფეხბურთელმა ძირითად შემადგენლობაში დამკვიდრება ვერ მოახერხა და ბუნებრივია, რომ „ნაპოლი“ მას მომდევნო სეზონში არ დაეყრდნობა. მისი გადაბირება თურქულ „გალათასარაის“ სურს.
გადაწყვეტილია გუნდიდან დემეს წასვლაც. გერმანელი ფეხბურთელით ბერლინის „ჰერტაა“ დაინტერესებული, რომელიც მეორე ბუნდესლიგაში გავარდა. დემე „ნაპოლის“ უცვლელი წევრი იყო ჯენარო გატუზოს პერიოდში, მაგრამ ლუჩანო სპალეტიმ მას სტანისლავ ლობოტკა ამჯობია და სლოვაკის ბრწყინვალე სეზონიდან გამომდინარე დიეგოს მთელი სეზონის სათადარიგო სკამზე გატარება მოუწია.
გარდა ამისა ცნობილი გახდა, რომ ჯოვანი სიმეონეს ტრანსფერით რომის „ლაციოა“ დაინტერესებული. მაურიციო სარი ჩირო იმობილეს ალტერნატიულ ვარიანტს ეძებს, რისი ერთ-ერთი კანდიდატიც არგენტინელი ფორვარდია, რომელსაც კარგი სეზონი ჰქონდა.
გუშინ, საფრანგეთის პროფესიონალ ფეხბურთელთა კავშირმა სეზონი შეაჯამა და ლიგა 1-ში საუკეთესოდ კილიან მბაპე („პსჟ“), ხოლო ლიგა 2-ში გიორგი მიქაუტაძე („მეცი“) აღიარა.
„ლიგა 2-ში საუკეთესო ფეხბურთელი გიორგი მიქაუტაძე გახდა, რომელმაც ამ სეზონში დიდ პროგრესს მიაღწია. თავის ისედაც სრულ პალიტრას – ტექნიკურ ელეგანტურობას, ბურთის ფლობას, ფეთქებად ძალას, ქირურგიულ ეფექტურობას, მრავალფეროვნებას, რომელიც ქართული პოლიფონიური სიმღერის მსგავსია, საკუთარ არსენალს ბეჯითი შრომით დამატებითი სიმები შესძინა, რათა სიღრმისეულ თამაშში უფრო წარმატებული გახდეს“. – დაწერა საფრანგეთის პროფესიონალ ფეხბურთელთა კავშირის ვებგვერდმა.
მიქაუტაძემ მიმდინარე სეზონში 36 მატჩში 23 გოლი გაიტანა და 8 საგოლე გადაცემა მიითვალა, მისი გუნდი კი მეორე ადგილზეა და საფრანგეთის ელიტურ დივიზიონში დაბრუნებასთან ახლოსაა.
გუშინ, საფეხბურთო ანალიტიკოსმა ჰალიდ ალ-შენაიფმა განაცხადა, რომ 2023 წლის ზაფხულში საუდის არაბეთის „ალ-ჰილალი“ ლიონელ მესის, ანხელ დი მარიასა და სერხიო ბუსკეტსს გაიფორმებს.
ეს ინფორმაცია ესპანური გაზეთის „Marca“ მთავარმა რედაქტორმა ფელიქს დიასმა დაადასტურა:
„ალ-ჰილალი“ ახლოს არის მესის, დი მარიას, ბუსკეტსისა და ჟორდი ალბას გაფორმებასთან. გარწმუნებთ, მესი არ წავა „ბარსელონაში“, ხოლო მისი ჩასვლა „ალ-ჰილალში“ დი მარიასთან – დროის საკითხია. მესის მამა ამბობს, რომ მის ვაჟს გაუჭირდება „ბარსელონაში“ დაბრუნება. „პარი სენ-ჟერმენი“ მალე გამოაცხადებს მესის წასვლის შესახებ და ის „ალ-ჰილალში“ გადავა“. – განაცხადა ფელიქს დიასმა.
საფრანგეთის ნაკრებისა და „პსჟ“-ს თავდამსხმელმა კილიან მბაპემ კი ზაფხულის სატრანსფერო წასვლა-წამოსვლის შესახებ ისაუბრა და განაცხადა, რომ წასვლას არსად აპირებს:
„პსჟ“-ში ყოფნით ძალიან ბედნიერი ვარ. ჩემი არჩევანია, რომ მომავალ წელსაც ამ პროექტის ნაწილი ვიყო. მომავალ სეზონსაც აქ გავატარებ. ჩემთვის დიდი პრივილეგიაა „პსჟ“-ს რიგებში თამაში. მადლობა სტაფს, პრეზიდენტს და ხალხს, ვინც მხარში მიდგას, რადგან სწორედ მათი წყალობით ვაგრძელებთ საუკეთესო კონდიციებში ყოფნას და გამარჯვების მოპოვებას“, – განაცხადა მბაპემ.
ავტორი
