25 მაისს, ოზურგეთში, ბაზრის შიდა ტერიტორიაზე, ძაღლმა კიდევ ერთი ადამიანი დაკბინა. ასაკოვანი მამაკაცს, რომელიც ბაზრის ტერიტორიაზე პროდუქტის საყიდლად შევიდა, ძაღლი მოულოდნელად ეცა.
ადგილზე მყოფმა მოქალაქეებმა სასწრაფო დახმარების ბრიგადა გამოიძახეს და დაკბენილი მამაკაცი საავადმყოფოში გადაიყვანეს. როგორც მოგვიანებით გავიგეთ, მას გადაუდებელი დახმარება გაუწიეს, დაუნიშნეს მკურნალობის კურსი და შინ გაუშვეს.
_ მამაკაცს ეს შავი ძაღლი უკნიდან მიეპარა. ისე უცებ ეცა, ვერც მივეშველეთ. ყვიროდა საწყალი _ ფეხზე უკბინა. გამოვიძახეთ სასწრაფო დახმარება. 112-ში დავრეკეთ. სხვა რა გზა იყო. ძლივს მოვაშორეთ ძაღლი ადამიანს. ის გადაიყვანეს საავადმყოფოში და კი აღმოუჩინეს დახმარება, თუმცა, არავინ იცის, ეს ძაღლი კიდევ როდის გაბრაზდება და რამდენ ადამიანს დაკბენს. სანამდე ვუყუროთ ასეთ ამბავს? როგორც ახასიათებს, მოულოდნელად მისდევს მისთვის “საინტერესო” კაცს თუ ქალს, მეტი ვერაფერი გავიგეთ, რა ზნისაა და რა უნდა, _ გვეუბნებიან ბაზრის ტერიტორიაზე განლაგებულ სასურსათო მაღაზიებში დასაქმებული ადამიანები.
_ ასაკოვანი კაცი რაღაცას ყიდულობდა. ეტაკა ფეხში ძაღლი, შარვალი შემოახია. დაარტყა მერე იმ კაცმაც ჯოხი. თქვენ რომ გეცეთ ძაღლი, რაც ხელთ გექნებათ, არ დაარტყამთ თუ აკბენინებთ? ეს ხომ ინსტიქტურად ხდება? სამი დღის შემდეგ, კიდევ ერთ მამაკაცს უკბინა, _ გვეუბნება ლალი ნაკაშიძე.
მკითხველს შევახსენებთ, რომ ძაღლზე, რომელზეც ჩვენი რესპონდენტები საუბრობენ, “გურია ნიუსი” არც თუ ისე დიდი ხნის წინ წერდა.
მაშინ ჩვენ ბევრი მოქალაქე მოგვმართავდა. ამბობდნენ, რომ ძაღლი ძალიან აგრესიულია და ითხოვდნენ დახმარებას. გვეუბნებოდნენ, რომ მხოლოდ ეს ერთი ძაღლი გამოირჩეოდა ყველასგან, მოულოდნელი წამოხტომით და ადამიანისკენ აგრესიული გაწევით.
“გურია ნიუსი” მაშინ ოზურგეთის მომსახურების ცენტრის ხელმძღვანელს, გია ანთაძეს დაუკავშირდა. აღნიშნულ სამსახურში დახმარება აღგვითქვეს. როგორც შემდგომში ბატონმა გია ანთაძემ გვითხრა, ძაღლი გადაიყვანეს დროებით თავშესაფარში. რამდენიმე დღეში კი ისევ ბაზრის ტერიტორიაზე დააბრუნეს. როგორც მაშინ გვითხრეს, ძაღლს ჩაუტარდა სათანადო კვლევა. ის ცოფით დაავადებული არ იყო და უკანვე დააბრუნეს.
აღნიშნულმა ძაღლმა, დაახლოებით, ერთ თვეში ასაკოვან მამაკაცს უკბინა. შემდეგ, როგორც თვითმხილველები გვეუბნებიან, კიდევ ერთ მამაკაცს ეცა ფეხში და შარვალი შემოახია. ბაზრის ტერიტორიაზე მომუშავეები “გურია ნიუსთან” ამბობენ, რომ ძაღლს არ აკლია კვება _ ამას მისი გარეგნული მხარეც მოწმობს.
_ რაღაცნაირი, მოულოდნელი რეაქცია ახასიათებს _ გეგონება, ძინავს ან თვლემს. ამ დროს წამოხტება და შედარებით უღონო პირს _ მოხუცს ან უძლურად მიმავალს მისდევს. ადამიანზე მეტად ატყობს, ვინ არის სუსტი და უმწეო. უცნაური თვისება აქვს ამ ძაღლს. უკვე შიშით ვუყურებთ, _ ერთმანეთს არ აცლიან ლაპარაკს ქალბატონები.
_ ზოგიერთი ჩვენი თანამოქალაქე ისე ჩაგვიდგება კრიჭაში და გვასწავლის ძაღლის პატივისცემას, თითქოს, მათზე ნაკლებად გამოგვეკვებოს ან მათზე ნაკლებად გვიყვარდეს ძაღლი. ერთხელ და ორჯერ თუ დაკბინა ვინმე, ალბათ, მოქალაქეებიც ტყუოდნენო, _ იძახიან. ასე მიდგომა შეიძლება? ესე იგი, ყოველდღე უნდა კბენდნენ ძაღლები ადამიანებს? _ ამბობენ “გურია ნიუსთან” გაბრაზებული ქალბატონები, რომლებიც ოზურგეთის ბაზარში მუშაობენ.
ჩვენ ვესაუბრეთ ვეტერინარ გოგი მაღლაფერიძეს, რომელიც მომსახურების ცენტრში მუშაობს.
_ თქვენი ზარი და თხოვნა კი იცით, უყურადღებოდ არ დაგვიტოვებია. ეს იყო დაახლოებით, ერთი თვის თუ ცოტა მეტი ხნის წინ. გადავიყვანეთ თავშესაფარში. ეს ძაღლი ავადმყოფი არ არის, საჭირო პროცედურა ჩაუტარდა. შემდეგ კი დავაბრუნეთ ისევ ბაზრის ტერიტორიაზე. ხომ არ მოვკლავთ? ახლა, რაკი ასე ხდება, კვლავ მოვიკვლევთ, _ გვითხრა მაღლაფერიძემ.
_ ბატონო გოგი, ძაღლი მოულოდნელად იკბინება. არის თუ არა უფრო ქმედითი ღონისძიება გასატარებელი? მოქალაქეებმა უკვე მერამდენედ მომართეს “გურია ნიუსს”. არ გვჯერა მაგათიო, გვეუბნებიან.
_ კი, ბატონო და აუცილებლად გავატარებთ ღონისძიებას, _ გვითხრა მან.
“გურია ნიუსი” ოზურგეთის მომსახურების ცენტრის დირექტორს, გია ანთაძეს ესაუბრა.
აქვე აღვნიშნავთ, რომ წინა შემთხვევის დროს, ბატონმა გიამ ოპერატიულად კი დაავალა სამსახურს და ძაღლი დროებით თავშესაფარში გადაიყვანეს, თუმცა ეს რომ საკმარისი არ გამოდგა, უკვე ფაქტი სახეზეა. ძაღლმა ერთ თვეში ადამიანი დაკბინა, მეორეს შარვალი შემოახია. არავინ იცის, რა მოხდება უახლოეს მომავალში, რადგან ძაღლი ბაზრის ცენტრალურ ადგილზე, ხანაც შესასვლელში წევს, ან იქვე მოძრაობს.
ამჯერად გია ანთაძე სერიოზული ღონისძიების გატარებას დაგვპირდა:
_ ჩვენ რაც შეგვეძლო, გავაკეთეთ. თუ ძაღლი ასე აგრესიულია და ამ ფაქტის მოწმეები არიან ადგილზე, მაშინ უფრო სერიოზული ღონისძიების გატარება მოგვიწევს. ჩვენ უნდა შევხვდეთ და ხვალვე შევხვდებით ამ მოქალაქეებს. ასევე, ვნახავთ იმ მოქალაქესაც, რომელიც დაკბინა. საჭიროა, მანაც ფორმა 100 წარმოადგინოს. მოკლედ, მივხედავთ ამ საქმეს და ჩვენც ასევე შეგატყობინებთ, _ გვითხრა ანთაძემ.
“გურია ნიუსი” თვალს მიადევნებს თუ რა ღონისძიება გატარდება, ამ საკმაოდ საშიში მდგომარეობიდან გამოსასვლელად და ძაღლის აგრესიულობის აღსაკვეთად.
ავტორი
