გუშინ, გამოცემამ „Calciomercato“ გაავრცელა ინფორმაცია, რომ ხვიჩა კვარაცხელია და „ნაპოლი“ კონტრაქტს ოფიციალურად გააგრძელებენ. მხარეებმა მიაღწიეს შეთანხმებას, რომელიც 2028 წლამდეა გათვლილი და ქართველი ფეხბურთელის ხელფასი წელიწადში 2,5 მილიონ ევროს მიაღწევს.
„ნაპოლის“ ამჟამინდელი მთავარი მწვრთნელი ლუჩანო სპალეტი კი 2022/23 წლების სეზონის იტალიის „სერია ა“-ს საუკეთესო მწვრთნელად დასახელდა.
სპალეტი საუკეთესოდ აღიარა ჟიურიმ, რომელიც სპორტული გაზეთების ხელმძღვანელთაგან შედგება.
ნეაპოლური გუნდის მწვრთნელს პრიზს 4 ივნისს, „სამპდორიასთან“ მატჩის წინ გადასცემენ.
„ეს სეზონი, „ნაპოლის“ სათავეში მყოფი ლუჩანო სპალეტით, ექსტრაორდინალური გახლდათ. ნეაპოლელთა მიერ ისტორიული მესამე სკუდეტოს მოპოვება, კლუბის დიდი თავდადებისა და დიდი ქარიზმის მქონე, კარგად მომზადებული სპეციალისტის მუშაობის შედეგია. სპალეტის საუკეთესოდ შეუძლია ახლების ინტეგრირება და გუნდში უკვე მყოფი მოთამაშეების გაძლიერება.
„ნაპოლიმ“ პირველივე დღეებიდან შეძლო ხმამაღალი განცხადება გაეკეთებინა არამარტო შედეგით, არამედ სანახაობრივი თამაშითაც, აჩვენა რა, ერთ-ერთი ყველაზე მაღალი დონის ფეხბურთი საერთაშორისო არენაზე“, – განაცხადა „სერია ა“-ს გენერალურმა დირექტორმა ლუიჯი დე სერვომ.
გამოცემა „RMC“-ის მტკიცებით, ფრანგული „პსჟ“ „ნაპოლის“ მცველის, კიმ მინ ჯეს შეძენას არ შეეცდება, ვინაიდან თვლის, რომ ზედმეტად ძვირი ღირს. დიდი ალბათობით, კორეელს „მანჩესტერ იუნაიტედი“ 65 მილიონ ევროდ შეიძენს და სეზონურ გასამრჯელოდ 9 მილიონს დაუნიშნავს
გუშინ, „პარი სენ-ჟერმენის“ მთავარმა მწვრთნელმა, კრისტოფ გალტიემ, განაცხადა, რომ ფრანგული „ლიგა 1“-ის 38-ე ტურის მატჩი „კლერმონთან“, თავდამსხმელ ლიონელ მესისთვის პარიზული კლუბის შემადგენლობაში ბოლო იქნება.
ესპანურ გამოცემა „Mundo Deportivo“-სთან ლეო მესის თემაზე ისაუბრა „ბარსელონას“ მთავარმა მწვრთნელმა ჩავიმ:
„უკვე ბევრჯერ მითქვამს, რომ მისთვის „ბარსელონას“ კარი ღიაა. ის სეზონს „პარი სენ-ჟერმენში“ დაასრულებს, რადგან იმ გუნდს პატივს სცემს, ამის შემდეგ კი ის გადაწყვეტს სად უნდა წავიდეს. ეს მომდევნო კვირას მოხდება და „ბარსელონაში“ მის დაბრუნებას მე 100%-ით ვემხრობი“, – განაცხადა ჩავიმ.
მესის მომავალი ჯერ-ჯერობით გაურკვეველია, თუმცა მთავარ კანდიდატებად „ბარსელონა“ და „ალ-ჰილალი“ განიხილებიან.
გუშინ, ამ ორ გუნდს დევით ბექჰემის „ინტერ მაიამი“ შეუერთდა, რომელმაც მესის ტრანსფერზე მუშაობა უკვე დაიწყო.
გამოცემა „Diario Sport“-ის მტკიცებით, ამერიკულმა კლუბმა მესის 4-წლიანი კონტრაქტი და წელიწადში 50 მილიონი ევრო შესთავაზა.
ამ კლუბის წინადადება ფინანსურად ისეთი მომგებიანი არაა, როგორიც საუდის არაბეთის „ალ-ჰილალის“ კონტრაქტი, მაგრამ „ინტერ მაიამის“ შესაძლოა დაეხმაროს ის ფაქტი, რომ მესის მაიამიში სახლი აქვს და ამერიკაში მისი ადაპტაცია უფრო იოლად ჩაივლის.
არაა გამორიცხული ისიც, რომ „ინტერიდან“ მესი ერთწლიანი იჯარის წესით „ბარსელონაში“ გადავიდეს.
გუშინ, საქართველოს საუკეთესო ჩოგბურთელმა ნიკოლოზ ბასილაშვილმა მარჯვენა ხელზე ოპერაცია გაიკეთა.
ქართველ ჩოგბურთელს ხელის ქრონიკული ტრავმა აწუხებს და დიდი ხანია სასურველ ჩოგბურთს ვეღარ თამაშობს. მსოფლიო რეიტინგის ყოფილი მე-16 ნომერი ამჟამად, 218-ე ადგილს იკავებს.
რამდენიმე დღის წინ ბასილაშვილმა სოციალურ ქსელში გულშემატკივრებს მიმართა, გულშემატკივრებს რთული პერიოდის შესახებ მოუყვა და მხარდაჭერისთვის მადლობა გადაუხადა:
„დიდი ხანია, არაფერი დამიწერია. ამიტომაც მსურს ქომაგებს და იმ ხალხს, ვინც ჩემზე ზრუნავს, მცირე სიახლე მივაწოდო. ჩემთვის ბოლო 3-4 წელიწადი ძალიან რთული პერიოდი იყო, როგორც პირად ცხოვრებაში, ასევე პროფესიულ კარიერაში…
ბოლო სამი წელია, რაც ვებრძვი იდაყვის ტრავმას, რომელიც სრული ენერგიით თამაშის საშუალებას არ მაძლევს. მხოლოდ ჩემი შესაძლებლობების ნახევარს ვიყენებ, ყოველდღე ვსვამ ტკივილგამაყუჩებლებს და ახალ-ახალი გამოსავალის ძიებაში ვარ. კორტზე ყოველი გასვლა ენით აუწერელ ტკივილს მაყენებდა, რომელიც თავდაჯერებულობას მიკარგავს და ენერგიას მართმევს. არადა, ადრე ჩოგბურთის თამაშით სიამოვნებას ვიღებდი. მე მაინც არ ვნებდები, მჯერა, გამოსავალს ვიპოვი, რისთვისაც ყველაფერს გავაკეთებ. გმადლობთ მხარდაჭერისთვის“.
ავტორი
