დღეს, საქართველოს ახალგაზრდული ნაკრები მეოთხედფინალურ შეხვედრაში ისრაელს დაუპირისპირდება. წარმატების შემთხვევაში ქართველი ახალგაზრდები ნახევარფინალურ სტადიაზე იასპარეზებენ და რაც განსაკუთრებით გასახარია, პარიზის ოლიმპიური თამაშების საგზურს კიდევ უფრო მიუახლოვდებიან.
ისრაელთან მეოთხედფინალური მატჩის წინ საქართველოს ახალგაზრდული ნაკრების მთავარმა მწვრთნელმა რამაზ სვანაძემ პრესკონფერენცია გამართა:
„რა თქმა უნდა, რთულ თამაშს ველოდებით – ევროპის ჩემპიონატის მეოთხედფინალში სხვაგვარად წარმოუდგენელია. ისრაელი ასაკობრივ ნაკრებებში წარმატებული გუნდია. მაგრამ მთავარია, შევინარჩუნოთ გუნდურობა და სათამაშო დისციპლინა, რაც წინა მატჩებში გამოგვარჩევდა…
მეთხედფინალში გუნდი შემთხვევით ვერ გავა. გამოსარჩევია მათი გუნდურობა. მივიღეთ ის მეტოქე, რომელმაც ჯგუფიდან გასვლა დაიმსახურა. სამწუხაროდ, ისრაელთან გორში ამხანაგური მატჩი წავაგეთ. მაგრამ ახლა სხვა თამაში იქნება, ჩვენც გვაქვს კოზირები, რომლის გამოყენებასაც ვეცდებით…
მნიშნელოვანია, რომ აღდგენისთვის დრო გვქონდა. ადრეც ვთქვი, ჩვენი გუნდი ასეთი გრაფიკით თამაშისთვის მზად არ იყო და ნიდერლანდებთან ზოგიერთ მოთამაშეს დაღლილობა დაეტყო. მაგრამ ახლა შემიძლია განვაცხადო, რომ ისრაელთან მატჩისთვის მზად ვართ!..
პირველად ვართ ევროპის ჩემპიონატზე და თან – მეოთხედფინალში. ცხადია, ეს განწყობაზე აისახება. ჩვენ “მეორე ნომრად” ვთამაშობთ, მაგრამ მთავარია, ერთად მივაღწიოთ იმ შედეგს და რაც შეიძლება დიდხანს გაგრძელდეს ის ბედნიერება, რაც ახალგაზრდული ნაკრების გამოსვლითაა გამოწვეული…
მოლოდინებს რაც შეეხება, ჩვენ ყველა თამაშში უნდა დავამტკიცოთ, რომ მოლოდინების გამართლება შეგვიძლია. ეს ჩემს ცხოვრებაშიც ყველაზე ბედნიერი პერიოდია, რადგან დიდი ხანია ჩვენი ფეხბურთის გარშემო ასეთი ერთიანობა არ გვინახავს. ჩემი მუშაობის პერიოდში პირველად ხდება, რომ საქართველოს ახალგაზრდული ნაკრები ფავორიტია და ჩვენი ვალია, ეს მოლოდინი გავამართლოთ…
ისრაელის ნაკრებში ყველაზე თვალშისაცემია ერთსულოვნება და გუნდურობა. მინდა, პატივისცემა გამოვხატო ამ გუნდის მიმართ…
ბოლო პერიოდში ქართულ ფეხბურთში არსებული პოზიტიური დინამიკისთვის ევრო 2023-ზე გამოსვლა დამატებითი სტიმულია. საბოლოო მიზანია წარმატება ეროვნული ნაკრების დონეზე. ჩვენს გუნდში ახლა ბევრი ისეთი მოთამაშეა, ვისაც მაღალ დონეზე თამაში შეუძლია. ასე რომ, მხოლოდ დადებით დინამიკას ველოდებით…
დიდი სამუშაო იქნა ჩატარებული ჩვენს ნაკრებში და წინსვლაც არის. წინასწარ ვერ ვიტყოდით, რომ მეოთხედფინალში გავიდოდით, მაგრამ ამისთვის ვმუშაობდით. ისრაელმა კი იმდენად რთული საკვალიფიკაციო ეტაპი გაიარა, მისი მეოთხედფინალში გასვლა არანაირი სიურპრიზი არ ყოფილა“.
საკუთარი მოსაზრება დააფიქსირეს ფეხბურთელებმაც.
გიორგი მოისწრაფიშვილი:
„ევროპის ჩემპიონატის მეოთხედფინალია, ამიტომ რთულ თამაშს ელოდებით. ვიცით, რომ ისრაელს ძლიერი ნაკრები ჰყავს. ჩვენ რა თქმა უნდა, გამარჯვებისთვის ვიბრძოლებთ, რომ კიდევ ერთხელ გავახაროთ ქართველი გულშემატკივარი და გამარჯვება ერთად ვიზეიმოთ.
დასვენებისთვის ერთით მეტი დღე რომ გვქონდა, ეს კარგი იყო. რაც შეეხება თამაშს, ჩემი აზრით, ბურთი უფრო მეტად ჩვენ გვექნება და შეგვეძლება უფრო მეტად შეტევაში თამაში. ვფიქრობ, ჩვენი ძლიერი მხარეც სწორედ ბურთის ფლობა და შეტევაა. ვიცით, რომ სტადიონი სავსე იქნება და ჩვენთვის ეს დიდი მოტივაციაა, რადგან ისინი თამაშის მიმდინარეობისას დიდ ძალას გვაძლევენ“.
ზურიკო დავითაშვილი:
„ნიდერლანდებთან ძალიან ემოციური მატჩი იყო ყოველმხრივ, მაგრამ ეს უკვე წარსულია და უნდა გადავერთოთ მეოთხედფინალზე. ისრაელი ძალიან კარგი გუნდია, ვნახეთ მათი თამაშები, ჩემი აზრით, ვიცით სუსტი წერტილები, პლუსებიც აქვთ, მაგრამ ვფიქრობ, შეგვიძლია მათი ბარიერი დავძლიოთ და უფრო დიდი ისტორია დავწეროთ, რასაც ევროპის ჩემპიონატის ნახევარფინალსა და ოლიმპიადაზე გასვლა ჰქვია“.
ირაკლი აზაროვი:
„ძალიან რთული ჯგუფი გვქონდა. ბიჭებმა ყველაფერი გავაკეთეთ და თავდაუზოგავი შრომის წყალობით პირველ ადგილზე გავედით, რაც სასიხარულოა და მეოთხედფინალში გრანდებს ავცდით. ვიცით, ისრაელი როგორი მებრძოლი გუნდია, ბევრს დარბიან, მაგრამ ჩვენი გაჩერება ახლა რთულია და ვფიქრობ, რომ ამ ბარიერს დავძლევთ. ოლიმპიადა ყველა ჩვენგანის ოცნებაა და ერთ-ერთი მოტივაცია იქნება, რომ ოლიმპიადის საგზური მოვიპოვოთ“.
გიორგი გაგუა:
„გუნდში ასე თუ ისე, დაღლილობა იგრძნობა, რადგან ჯგუფში სამი ძალიან ძლიერი მეტოქე გვყავდა, რის გამოც უფრო მეტად უბურთოდ მუშაობა გვიწევდა, რაც ძალიან რთულია, როგორც ფსიქოლოგიურად, ასევე ფიზიკურად, მაგრამ უქმე დღეებს იმისთვის ვიყენებთ, რომ აღვიდგინოთ ძალები და თამაშიდან თამაშამდე მოვემზადოთ. მეოთხედფინალისთვის ერთი დღით მეტი რომ გვაქვს დასვენება, ძალიან მნიშვნელოვანია. ისრაელს ვიცნობთ, მათთან ერთხელ უკვე ვითამაშეთ, ძალიან ძალისმიერ თამაშს ველოდებით. დიდი იმედი მაქვს, რომ მატჩი ჩვენი გამარჯვებით დასრულდება“.
საქართველოსა და ისრაელის ნაკრებთა მატჩი დღეს, „დინამო არენაზე“ 20:00 საათზე დაიწყება.
ავტორი
