“იმისთვის, რომ ქართველი ხალხის პოლიტიკური ქცევა განსაჯო პარტიების კონტექსტში და ამაზე კვალიფციური დასკვნები წარმოადგინო, ერთი მარტივი პირობა უნდა არსებობდეს – პარტიები უნდა არსებობდნენ.
რეალობა კი ისაა, რომ საქართველოში პოლიტიკური პარტიები არ არსებობენ.
რასაც ჩვენ პოლიტიკურ პარტიებს ვუწოდებთ, ისინი არა პარტიები არამედ – უკეთეს შემთხვევაში საძმოები, ხოლო უარეს შემთხვევაში ოლიგარქის და დეგრადირებული ბელადის განგრენად ქცეული უჯრედებია.
საქართველოს მოსახლეობას არ ჰქონია შესაძლებლობა აერჩია პარტია თანამედროვე გაგებით.
პარტიაში ვგულისხმობ სუბიექტს, რომელსაც გააჩნია:
1) იდეოლოგია;
2) იდეოლოგიის საფუძველზე შექმნილი პოლიტიკური პროდუქტი;
3) ამომრჩეველი, რომელიც ამ პარტიის შინაარსით და პოლიტიკური პროდუქციითაა მოტივირებული;
4) არჩევნებიდან არჩევნებამდე ამომრჩეველთან კომუნიკაციის რესურსი;
5) ორგანიზაციული სტრუქტურა რომელიც ახალ წევრებს დამსახურებებზე დაფუძნებული კარიერული წინსვლის ბილიკს სთავაზობს;
6) დემოკრატიული მექანიზმი, რომელიც პარტიის ამომრჩეველს ლიდერშიფის ცვლის სამართლიან გზას სთავაზობს
(ნაცმოძრაობას ჰქონდა შანსი, არჩევნების წაგების შემდეგ – გიგა ამას ცდილობდა. მაგრამ ეს პარტია მისმა მშობელმა შეჭამა და მუცელში უდევს, ვიდრე კანალიზაციას გააყოლებს)
ევროპული საქართველო ახლა იქმნება.
დანარჩენები ისევ ოლიგარქის და ბელადის წყალობას ინაწილებენ, ან სადღეგრძელოებს სვამენ ერთიან ფრონტებზე.
ტყუილად ბრაზობთ კალაძეზე.
თუ პოლიტიკური სპექტრი კეზერაშვილის ჭკუაზე სირბილს გააგრძელებს, გვარამიას იმედის თვალით შეხედავს და მიშაზე ბღავლის გარდა სათქმელს არ დაიტოვებს, ბიძინა იქნება, იქნება, იქნება… იქამდე სანამ საკუთარი ზვიგენი არ აუმხედრდება და შეჭამს.
ამასობაში, ევროპული საქართველო • European Georgia თანამედროვე პარტიად ჩამოყალიბებას გააგრძელებს.
ანუ ისინი ვინც იძახით რომ ჩვენი გზა, გრძელი გზაა, დარწმუნდებით, რომ ყველაზე მოკლე ყოფილა.
იმიტომ რომ სხვა გზა არ არსებობს, _ ასე გამოეხმაურა ტაბულას დამფუძნებელი თამარ ჩერგოლეიშვილი კახა კალაძის განცხადებას.
“საერთოდ არ მაინტერესებს თუ რა ფორმულირებით იქნებიან ისინი [ოპოზიცია] წარმოდგენილი არჩევნებზე. ერთი რამ შემიძლია ვთქვა – დღეს ყველაზე ძლიერი გუნდი ვისაც ყველაზე მეტი მხარდაჭერა აქვს საქართველოში მოსახლეობის მხრიდან ეს არის “ქართული ოცნება დემოკრატიული საქართველო”, დარწმუნებული ვარ იმაშიც, რომ 2024 ქართული ოცნება გაიმარჯვებს დამაჯერებელი ანგარიშით, ძალიან დიდი ანგარიშით, დარწმუნებული ვარ იმაშიც, რომ 2025 წლის ადგილობრივი თვითმმართველობის არჩევნებშიც მივაღწევთ გამარჯვებას და 2028 წლის საპარლამენტო არჩევნებშიც გაიმარჯვებს ქართული ოცნება”. _ განაცხადა თბილისის მერმა.
