ახალქალაქისა და კუმურდოს ეპარქიის მიტროპოლიტი, მეუფე ნიკოლოზ ფაჩუაშვილი აცხადებს, რომ მიხეილ სააკაშვილის მხრიდან სურვილი თუ იქნება, მზადაა, ის მოინახულოს.
„ეს დამოკიდებულია თავად სააკაშვილზე და მის სურვილზე. ჩემი ურთიერთობის ძირითადი შინაარსი იყო მასთან საეკლესიო საიდუმლოებების შესრულება და არავითარი სხვა პოლიტიკური საკითხების განხილვა. მთლიანად მასზეა ეს დამოკიდებული. როგორც კი მოითხოვს, რომ მე მასთან მივიდე, ვაზიარო თუ სხვა რამე შევასრულო, მე მზად ვარ“, – განაცხადა მეუფე ნიკოლოზმა.
კითხვაზე, – „რუსეთიდან დაბრუნების შემდეგ სააკაშვილთან არ ყოფილხართ?“ – მეუფე ნიკოლოზი პასუხობს: „მანამდეც არ ვყოფილვარ რამდენიმე ხანი. ასე რომ, არ ვიცი, შეიძლება არის ამასთან კავშირი, შეიძლება – არა“.
მეუფე ნიკოლოზი მიიჩნევს, რომ მიხეილ სააკაშვილს ამ მიმართულებით თუ რამე კითხვები ექნებოდა, ჰკითხავდა კიდეც.
„დარწმუნებული ვარ, რომ მესამე პრეზიდენტი, მიხეილ სააკაშვილი ღრმად მოაზროვნე ადამიანია და ვფიქრობ, ყურმოკვრით გაგონილს არავითარ შემთხვევაში ის ყურადღებას არ მიაქცევდა. ვფიქრობ, თუ რაიმე შეკითხვები ექნებოდა, მკითხავდა, რადგან ადრეც დავდიოდი მოსკოვში, ადრეც მიწირავს პატრიარქთან ერთად და მან ეს ყველაფერი მშვენივრად იცოდა“, – განაცხადა მეუფე ნიკოლოზ ფაჩუაშვილმა.
წყარო: 1tv.ge
