27 სექტემბერს, ოზურგეთის მუნიციპალიტეტის საკრებულოს მორიგი სხდომა წუთიერი დუმილით დაიწყო. საკრებულოს თავმჯდომარემ დავით დარჩიამ, დარბაზში მსხდომთ მიმართა, პატივი მიეგოთ სოხუმის დაცემისას, საომარი მოქმედებების დროს და 8 სექტემბერს, გურიაში მომხდარი სტიქიის შედეგად დაღუპულთა ხსოვნისთვის.
შემდეგ, დავით დარჩია, საკრებულოს წევრებს ქვემო ნატანების სკოლაში განვითარებულ მოვლენებზე ესაუბრა, როცა სკოლაში ჭერის გარკვეული ნაწილი ჩამოვარდა და ორი პიროვნება დაზიანდა:
_არ შემიძლია, არ შევეხო ორი დღის უკან ნატანებში მომხდარ ფაქტს, როცა ბათქაში ჩამოინგრა და დაზარალდა ორი ადამიანი. აქ გარკვეული ინფრასტრუქტურული პრობლემები იყო და ამის შესახებ საქმის კურსშიც ჩავაყენეთ , როგორც განათლების სამინისტრო, ისე ყველა სამსახური. იცოდნენ მასწავლებლებმა! ამის შემდეგ შემიძლია გითხრათ, რომ 9 ოქტომბერს დასრულდება და გამოცხადდება საბოლოოდ ტენდერში გამარჯვებული და დაიწყება სარეაბილიტაციო სამუშაოები, _ განაცხადა მან.
საკრებულოს ნაციონალმა დეპუტატმა, თათია ნიკოლაშვილმა, დარჩიას სიტყვით გამოსვლას „მიაბა“ თავისი რეპლიკა: „ადამიანების პრობლემებზე უნდა გესაუბროთ“…
_როდის იყო თქვენ გაინტერესებდათ ადამიანთა უფლებები? ომის პარტიას?…ეს ხულიგანი, ეს მაიმუნი…ეს ხაბეიშვილის ციყვი…_ სასწრაფოდ მიიჭრა ნიკოლაშვილთან ოცნების დეპუტატი, ქეთი ხომერიკი, დაავლო ხელი ქალღალდებს და ნაკუწებად ქცეული მიაყარა ნიკოლაშვილს…
_ციყვი არა ბოცვერი, რას ამბობს ტყუილს? _ შეეპასუხა ბესო ქათამაძე.
_რა არის, რა ზრდილობაა, ვზივარ და გადამახტა თავზე, ბატონო დავით, _ უხმობდა საკრებულოს თავმჯდომარეს ნაციონალი დეპუტატი , თავდაჭერილობით ცნობილი, რაინდი დუმბაძე.
_სად გადაგახტა? როდის გადაგახტა, _ ჰკითხა მას “ოცნების” დეპუტატმა ნუგზარ სარჯველაძემ.
“ოცნების” დეპუტატთა უმეტესობა ნიკოლაშვილის მაგიდასთან მიიჭრა და დავა ძირითადად სტიქიის დროს განვითარებულ მოვლენებს და ოპერატიულ ქმედებებს ეხებოდა.
თათია ნიკოლაშვილი ასახელებდა ფაქტებს, დაზარალებული ოჯახების თაობაზე, რომ ჯუმათში ოთხ ოჯხს მიწა აქვს სახლთან ჩამოშლილი, ნაღობილევში 8 სულიანი ოჯახია უჭეროდ…
_ენა როგორ გიბრუნდებათ, საერთოდ? სტიქიის დროს სახლში არ შევსულვართ, პირველი წუთებიდანვე იქ ვიყავით, – დავაში ჩაერთო დეპუტატი მარიკა ჩხიკვიშვილი.
_მეგობრებო, ამხელა ღვაწლმოსილი ადამიანი, სამი მოწვევის საკრებულოს თამჯდომარე, დავით დარჩია ამბობს, რომ ნატანების სკოლაში მომხდარი ფაქტის თაობაზე ყველა საქმის კურსში იყო, _ ხმას აუწია ნაციონალმა თორნიკე გოგუაძემ, – არა, რა წინასწარ იცოდა ხელისუფლებამ, რომ სკოლაში რომ ავარიული მდგომარეობა იყო და ზომები არ მიიღეს…ეს დანაშაულია და საქმე უნდა აღიძრას, _დაჟინებით იმეორებდა გოგუაძე.
_ფაქტია, აღიარა თავად, რომ სკოლაში ავარიული მდგომარება იყო. აგერ, კაცი ღიად ამბობს, მეტი რა უნდა თქვას? ამაზე მეტი მტკიცებულება რა გინდათ? _ გვითხრა ნაციონალმა დეპუტატმა ბესო ქათამაძემ.
_თქვენ სად იყავით, თუ ასე იყო? _ ლოგიკური კითხვა გაისმა „ქართული ოცნების“ დეპუტატების მხრიდანაც.
მართლაც საინტერესოა, თუკი მმართველი პარტია ასეთი მოსალოდნელი საგანგაშო ფაქტის შესახებ ინფორმაციას ფლობდა, მუდამ პრობლემებზე აქცენტირებულ ოპოზიციური პარტიის წარმომადგენლებსაც უნდა ჰქონოდათ ინფორმაცია.
ხანგრძლივი ჩხუბის, დავის, ერთმანეთის სალანძღავი „ეპითეტებით“ შემკობის შემდეგ, ნაციონალებმა დარბაზი დატოვეს.
_ასეთი მასშტაბური სტიქია გურიას არ ახსოვს. პირველივე წუთებიდანვე ვიმყოფებოდით ჯუმათში…ყველგან, სადაც სტიქია დატრიალდა. დღეის მდგომარებით 500-ზე მეტი სახლია შემოწმებული და 200-ზე მეტი ოჯახი ექვემდებარება გასახლებას. ვმუშაობთ დღესაც და ვიმუშავებთ სულ, რათა არცერთი ადამიანი არ დარჩეს უყურადღებოდ. 1300-მდე ოჯახს გადაეცა დახმარება მედიკამენტების და ტვირთის სახით. ამ სტიქიამ აჩვენა ისიც, რომ, ასეთ დროსაც უიმედობის დათესვა და ყველანაირად ხელის შეშლა სურთ დესტრუქციულ ძალებს. თათია ნიკოლაშვილი, სოფელ შრომაში, როცა მის უკან მუშაობდა ტექნიკა, ხალხში უიმედობას თესავდა და გამხნევების ნაცვლად, ზაფრავდა ადამიანებს. ჩვენ ყველა მათ უღირს ქმედებას, ღირსეულად ვუპასუხებთ, _ თქვა სიტყვით გამოსვლისას ოზურგეთის მუნიციპალიტეტის მერის პირველმა მოადგილემ, გიორგი ღურჯუმელიძემ და ყველას მადლობა მოუხადა, სამთავრობო სტრუქტურებიდან დაწყებული, რიგით მოხალისემდე, სტიქიის დროს გამოჩენილი თანადგომისა და დახმარებისთვის.
_როგორც არ უნდა იმართლონ თავი, აღმაშფოთებელია საკრებულოს თავმჯდომარის, დავით დარჩიას განცხადება, რომ წინასწარ იცოდნენ ნატანების სკოლაში მომხდარი ფაქტის შესახებ. ჩამოიქცა ჭერი, დამლაგებელს ტვინის შერყევა აქვს, მძიმე მდგომარეობით დღემდე საავადმყოფოშია. ახლა წარმოიდგინეთ, რომ გარდაცვლილიყო, რა მოხდებოდა. ამ საქმით გამოძიება უნდა დაინტერესდეს. უნდა დაისაჯოს ყველა, ვინც ამის შესახებ იცოდა და არ მიიღო დროული ზომები. დღეს საკრებულოს სხომაზე განვითარებული მოვლენები და ხმაური უფრო ამ ფაქტმა გამოიწვია. ეს სტიქიაზე უარესი ამბავია. სტიქია, ბუნება არ გეკითხება, როდის რას მოიმოქმედებს. სკოლაში არსებული ავარიული მდგომარების შესახებ კი, განათლების სამინისტროც საქმის კურსში ჩავაყენეთო, თავად ამბობს თავმჯდომარე, _ ამბობენ „გურია ნიუსთან“ ოზურგეთის საკრებულოს ნაციონალი დეპუტატები.
ავტორი
