“ლანჩხუთის მერმა სოფელ გულიანსა და მამათში სტიქიის ზონები დაათვალიერა და ადგილობრივ მოსახლეობას შეხვდა”, _ ეს ინფორმაცია ლანჩხუთის მერიის პრესსამსახურმა რამდენიმე დღის წინ გამოაქვეყნა საკუთარ ოფიციალურ გვერდზე და იქვე ფაქტის ამსახველი ფოტოებიც დაურთო.
მერიის მიერ გასაჯაროებულ ამ ინფორმაციას არაერთი გამოხმაურება მოჰყვა, რომელთა ნაწილი მადლიერებას გამოხატავს ადგილობრივი ხელისუფლების მისამართით, მეორე ნაწილი კი, სოფელ მამათში არსებულ პრობლემებზე ამახვილებს ყურადღებას.
ნარიკო კილაძე-დარჩია: “მამათში მე-4 ბრიგადამდე ვერ ჩამოხვედით? წლებია, გზას ვითხოვთ და ახლა ხომ საერთოდ აღარ გვაქვს. წყალიც წაიღო მეწყერმა და უწყლოდ დარჩა კუთხე. იქნებ მოგვხედოთ! სოფელ მამათში ადამიანები ცხოვრობენ და სჭირდებათ გზა და კვალი, წყალი.
ჯერ არაფერი გაუკეთებიათ, არც სტიქიამდე და არც _ მერე. არც სტიქიამდე იყო გზები და რომ ვითხოვდით, ტყუილებით აგვავსეს, ახლაც თვალში ნაცარს გვაყრიან. ტექნიკა სამი დღე იდგა მამათის ცენტრში და გზები გაუწმენდავი იყო.
მეწყერმა და სტიქიამ დააზიანა წყლის მოწოდების სისტემა. 12 ოჯახს აღარ აქვს საარსებო წყალი. მოიძიეს ადგილობრივებმა და იპოვეს ალტერნატიული ადგილი, ანუ წყლის სათავე, სადაც უნდა დამონტაჟდეს ავზი თავისი ატრიბუტიკით. საკუთარი სახსრებით ამის გაკეთება გაგვიჭირდება და ვერც შევძლებთ. იქნებ დაგვეხმაროთ ხმის მიწვდენაში იმათთან, ვისაც ეს ხელეწიფებათ. ზამთარი მოდის, რა ვქნათ, ავიდგათ ჩვენც ფეხი აქედან დედაწულიანად?!”
ნინო ლომსაძე: “რაო მერე, რომ დაათვალიერა? მაგით მოგვარდა პრობლემა? დიდი პატივი კი უციათ სოფლისთვის, თუ დაათვალიერეს. საქმეს მიხედეთ და ხალხს შეუქმენით სოფლებში ელემენტარული ადამიანური პირობები. სულ ერთი თვით, აგვისტოში მიწევს სოფელ მამათში ყოფნა და გავანადგურე ავტომობილი იმ გზებზე სიარულით და სოფლის დეპუტატი ისე უფრთხილდება თავის ჯიპს, თვალით არ მინახავს მაგ გზაზე გავლითაც კი, არამც ხალხის გულისტკივილის გასაცნობად მოსული.
ერთი სოფლის ყოფით რეალობაზეა საუბარი, რომელიც სტიქიამდეც ნასტიქიარს ჰგავდა და არავინ ზრუნავს პრობლემის მოგვარებაზე. კონკრეტულ სახელსა და გვარზე კი არაა საუბარი, ვსაუბრობ თანამდებობაზე, რომელსაც ხელეწიფება იმ პრობლემის მოგვარება, რომლის წინაშეც სტიქიამდეც და მით უმეტეს, სტიქიის შემდეგაც დგას სოფელი მამათი.
მე-4 ბრიგადაში რომ მიგვეღწია, თბილისიდან ჩასულებს, ჩოხატაურის და ოზურგეთის გავლით დაგვჭირდა მისვლა. ორშაბათს სკოლის მიკროავტობუსმა ბავშვები რომ ჩაიყვანა აღნიშნულ კუთხეში, უკან ვეღარ დაბრუნდა და ოზურგეთის გავლით წავიდა, რომ თემში ასულიყო და ახლა თქვენ განსაზღვრეთ, როგორი გზაა. ერთხელ მე-4 ბრიგადაშიც რომ ჩამოსულიყვნენ ხალხთან შესახვედრად და მოესმინათ ჩვენი პრობლემებიც, იქნებ დაგვეჯერებინა, რომ სოფლის ყველა კუთხეში დადიან. მე მხოლოდ სტიქიის შედეგად დაზიანებულ გზებზე არ მაქვს საუბარი. ზოგადად, მაგ ბრიგადაში სტიქიამდეც სავალალო მდგომარეობაში იყო გზები, უწყლობაზე რომ აღარაფერი ვთქვათ.
ყველაზე კარგი პერიოდი სოფლის პრობლემების მოსაგვარებლად ახლაა, რადგან, როგორც მეწყრული ზონა, შესაძლებელია მთავრობიდან დაფინანსების მოპოვება და იმ პრობლემების აღმოფხვრა, რაც მეწყერამდეც და მეწყრის შემდეგაც არსებობს. იმედია, შედეგს ვიხილავთ და სალაპარაკოც აღარაფერი გვექნება”.
ლელა კუჭაშვილი: “მარტო დათვალიერება არ შველის, ქვემო მამათს მიხედეთ, მანქანა ვერ გამოგვყავს”.
მერიის პიარი, მაკა სულაბერიძე მოქალაქეთა მხრიდან გაჟღერებული ბრალდებების პასუხად განმარტავს:
“სტიქიის პირველივე წუთებიდან ლანჩხუთის მერი სტიქიის ზონაშია. ყველა ცხელ წერტილში, სადაც გეოლოგები ამის საშუალებას გვაძლევენ, მუშაობს მძიმე ტექნიკა. ეტაპობრივად, ყველა უბანში დაიწყება აღდგენითი სამუშაოები. ამ დროისთვის გადაადგილების პრობლემა არც ერთ სოფელში არ არსებობს.
სოფელ მამათში წყლის სათავე ნაგებობა არ არსებობს, მეწყერმა ისე დააზიანა, აღდგენასაც აღარ ექვემდებარება. საჭიროა ახალი სათავე ნაგებობის მშენებლობა. რაც შეეხება გზას, გადაადგილება არა მარტო მამათში, არამედ მუნიციპალიტეტის არც ერთ სოფელში შეზღუდული არ არის”, _ ამბობს სულაბერიძე.
ავტორი
