„სანახაობით „ოცნება” ცდილობს, საზოგადოების თვალში მოახდინოს პრეზიდენტის სტრატეგიისა და ტაქტიკის დისკრედიტაცია, მაგრამ როგორც უნდა დასრულდეს სასამართლო პროცესი, სალომე ზურაბიშვილი ხელისუფლების პრობლემა იქნება,” – ამის შესახებ პოლიტოლოგმა იგორ კვესელავამ “რეზონანსთან” განაცხადა.
_ საკონსტიტუციო სასამართლოს 9-კაციანმა კოლეგიამ უნდა დაადგინოს, დაარღვია თუ არა პრეზიდენტმა კონსტიტუცია, როდესაც ის მთავრობის ნებართვის გარეშე ევროპულ ტურნეში გაემგზავრა. თქვენ როგორ შეაფასებდით იმპიჩმენტან დაკავშირებულ პროცესს?
_ მე, როგორც საზოგადოების წევრს, მაქვს უფლება, სასამართლო სისტემაზე, მათ შორის საკონსტიტუციო სასამართლოზე, გამოვთქვა ჩემი მოსაზრება. მიმაჩნია, რომ ქართული სასამართლო სისტემა მოითხოვს გამართვას, რადგან დღეს ჩვენი სასამართლო არის პოლიტიზებული ხელისუფლების მიერ, დღევანდელი სასამართლო პროცესი კი არის სანახაობა. „ქართულ ოცნებას” სურს, აჩვენოს, რომ სალომე ზურაბიშვილი არღვევს კონსტიტუციას და არ იზიარებს ხელისუფლების პოლიტიკას. უფრო მეტიც, ცდილობს, საზოგადოების თვალში დისკრედიტაცია მოახდინოს პრეზიდენტის სტრატეგიისა და ტაქტიკის.
სალომე საკმაოდ გაბედული აღმოჩნდა, ის იცავს დასავლეთის კურსს, ანუ იცავს ქართველი საზოგადოების დიდი ნაწილის ინტერესებს. მას აქვს ძალიან დიდი ავტორიტეტი დასავლეთში. საყვედურები იმასთან დაკავშირებით, რომ პრეზიდენტი არ გამოცხადდა და პატივს არ სცემს სასამართლოს, სიცრუეა. ზურაბიშვილი დგამს სწორ ნაბიჯებს, რადგან ის ვერ გახდება სათამაშო ბურთი, რომელიც უნდათ, ხან – ერთ კარში, ხან მეორე კარში შეაგდონ.
_ როგორ დასრულდება, როგორც თქვენ ამბობთ, ეს სანახაობა?
_ სანახაობა დასრულდება ისე, როგორც უნდა კობახიძეს. სასამართლო მიიღებს პრეზიდენტის საწინააღმდეგო გადაწყვეტილებას.
_ სხვაგვარად ფიქრობს სალომე ზურაბიშვილის ძმა ოთარ ზურაბიშვილი, რომელიც ამბობს, რომ სცენაზე დგას კობახიძე, ფარდის უკან კი ბიძინა ივანიშვილიაო.
_ ბიძინა არავის არაფერს აპატიებს. შეიძლება ეს ბევრმა არ იცის, მაგრამ როდესაც პრეზიდენტის არჩევნები იყო, ბევრი კანდიდატურა დასახელდა, მათ შორის ირაკლი ალასანიასი, მაგრამ დასავლეთმა რეკომენდაცია სალომე ზურაბიშვილის კანდიდატურას გაუწია, ბიძინაც დათანხმდა. როგორც უნდა დასრულდეს პროცესი, სხვათა შორის იმ სასამართლოში ბევრი გამოცდილი, “ეშმაკი” მოსამართლეა და შეიძლება დასკვნა სხვაგვარიც იყოს, დარწმუნებული ვარ, რომ სალომე ზურაბიშვილი დიდი პრობლემა იქნება ამ ხელისუფლებისა.
_ “ოცნება” ეჭვობს, რომ იმპიჩმენტის თემით ოპოზიცია პრეზიდენტთან პოლიტიკურად ვაჭრობს და ხმების სანაცვლოდ სააკაშვილის გათავისუფლებას ითხოვს.
_ პოლიტიკა დიდი უბედური საქმეა და ყველაფერი შეიძლება დაუშვა, მაგრამ სალომე ზურაბიშვილი ამას არ გააკეთებს, რადგან ძალიან კარგად იცის, რომ ეს ხელისუფლება სააკაშვილს ციხიდან არ გამოუშვებს, რომც შეიწყალოს, ისევ ციხეში დატოვებენ. ამიტომაც არ გააკეთებს. რაც შეეხება ოპოზიციის ხმებს, აქ სავაჭროც არაფერია, რადგან ოპოზიცია სალომე ზურაბიშვილის იმპიჩმენტს პარლამენტში ხმას არ მისცემს.
_ “შეკრებისა და მანიფესტაციის” კანონში შესატან ცვლილებას ოპოზიცია აპროტესტებს და დარწმუნებულია, რომ ხელისუფლებას რევოლუციის ეშინია. ხელისუფლებაში კი ამბობენ, რადიკალურ ოპოზიციას ხალხის იმედი არ აქვს და კარვების იმედად რჩებიანო.
_არა მგონია, ამ კანონმა იმუშაოს, რადგან საზოგადოების დიდი ნაწილი თუ შეიკრიბება და პროტესტი იქნება შეუქცევადი, კანონი ვერ შეაჩერებს. ამ კანონის მიღებაც, ისევე როგორც პრეზიდენტის იმპიჩმენტი, ცუდად შემოუბრუნდება ხელისუფლებას, გაჩნდება აზრი, რომ ქვეყანაში რეპრესიებია.
_ ნიკა მელია 7 ოქტომბერს საზოგადოებას გააცნობს, ბრძოლას როგორ გააგრძელებს. თქვენ რას ფიქრობთ, დატოვებს მელია “ნაციონალურ მოძრაობას”?
_ არ ვიცი, რა განცხადებას გააკეთებს მელია, მაგრამ შეუძლებელია, ხაბეიშვილი და მელია შერიგდნენ. ხაბეიშვილს თავისი ლიდერები ჰყავს – მერაბიშვილი და კეზერაშვილი, მელიას – თავისი ინტერესები აქვს. არ გამოვრიცხავ, რომ მელიამ თავისი პოლიტიკური გუნდი შექმნას და თემატური თანამშრომლობა ჰქონდეს ნიკა გვარამიასთან, რომელიც პოლიტიკაში ბრუნდება და, სავარაუდოდ, თავის მოძრაობას შექმნის. ამაზე მიუთითებს მისი ვიზიტები დასავლეთსა და აშშ-ში.
