ქუთაისში ახალდაფუძნებულმა სამოქალაქო თეატრმა მაყურებელს პირველი სპექტაკლი შესთავაზა. სამოქალაქო თეატრმა მაყურებლის წინაშე ახალგაზრდა საბა კლდიაშვილის ისტორია გაითამაშა, რომელიც ებრაელების დევნას უკავშირდება.
„გურია ნიუსი“ „სამოქალაქო თეატრის“ დამფუძნებელს ზეკო ხაჩიძეს დაუკავშირდა და ინტერვიუ ჩაწერა.
_ როდის და სად გაჩნდა პირველად სამოქალაქო თეატრის დაარსების იდეა?
_ 6 წელია ეს ოცნება მაქვს და რამდენიმე პროექტი ჩემს მეგობრებთან ერთად გავაკეთე, როცა მესხიშვილის თეატრში მივედი. მაშინაც მინდოდა ჟურნალისტებთან ერთად, მაგრამ პროფესიონალი მსახიობებით დავიწყეთ მაინც და სამოქალაქო თეატრის ფორმატში პირველი პროექტი იყო ,,ისწავლე თავისუფლება – იკითხე კონსტიტუცია”. სხვათაშორის, ძალიან წარმატებული. ჩემი კონცეფცია, რეზი ქაროსანიძის რეჟისურა, მესხიშვილის მსახიობები, ღამის კლუბი ,,რეფლექტორი” და ქუთაისელი რეპერების კოლაბორაცია იყო. ამის შემდეგ მეორე პროექტი ჩვენი პატარა ჯგუფისგან – რეზო გაბრიაძის ,,უცხო ჩიტის” გადაფრენა თეთრ ხიდზე. ორივე იდეას ფინანსური მხარდაჭერა მაშინდელმა მერებმა გიორგი ჭიღვარიამ და იოსებ ხახალეიშვილმა გაუკეთეს. მაგრამ მე მინდოდა უფრო სამოქალაქო, ენთუზიაზმზე, თეატრალური მედიის ფორმით და ქუთაისურ ლეგენდებზე, ქრონიკებზე, ქუთაისურ ისტორიებზე და 4 თვის წინ ისევ გავბედე, უკვე დამოუკიდებლად მეთხოვა გვერდით დგომა მეგობრებისთვის. ჩვენი ნიჭიერი ჟურნალისტებისთვის. ტექსტი(სცენარი) მალე გავამზადე, რადგან საბა კლდიაშვილზე ინსცენირება ჩემი ოცნება იყო სულ.
_ პირველ სპექტაკლზე რას გვეტყოდით?
_ საბა მსოფლიო მოქალაქეა. მიყვარს მას შემდეგ, რაც გავიგე მისი სახელი და ისტორია. სხვათაშორის, ეს მიშა ჩოგოვაძის დამსახურებაა. მერე გუბერნიიდან თეატრში რომ მივედი, იქ გავაგრძელე უფრო რეალური ოცნება ამ თემაზე. ქეთი მამუკელაშვილმა ეფრო – საბას დედის ამბები შემომაშველა (წიგნიც აქვს ეფროზე). დავთქვი, რომ ეს ისტორიები ახალი თაობებისთვის უნდა გაგვეცოცხლებია. ასეთი სავსე და საოცარი ოჯახი, იშვიათია. ოღონდ ინსცენირება მხოლოდ 5 თვის წინ დავწერე და გავბედე- ჩემი მეგობრებისთვის მეჩვენებია. ფუ მოეწონებოდათ, რეპეტიციებს დავიწყებდით. და დავიწყეთ.
_ ვინ არიან სამოქალაქო თეატრის მსახიობები?
_ ჟურნალისტები: ეკა ფხაკაძე, ირაკლი ვაჩიბერაძე, დათო ლიკლიკაძე, ია იაშვილი, ხვიჩა ვაშაყმაძე, ნესტან ჩაგელიშვილი, ნათია მკერვალიშვილი, მარიამ ირემაძე, გეგი ნემსიწვერიძე. ახალგაზრდა და ნიჭიერი მოხალისეები: ლუკა სვანიძე და გიო ჩუბინიძე. ქუთაისელი მუსიკოსი, გამორჩეული გიორგი არაბიძე. ასევე, ჩვენი ჟურნალისტები- ქეთი ბერძენიშვილი და ხათუნა მაისურაძე, რომლებიც დროდადრო შემოგვიერთდებიან და დასაწყისიდან გვერდით გვედგნენ. ტექნიკური ჯგუფიც მოხალისეებით დაკომპლექტდა. სომალიმ აპარატურა მოიტანა ,,თქვენს გვერდით ვარო” და ჩემი შვილის და თანამოაზრის, ნიტა ხაჩიძის ორგანიზებით შედგა მისი მეგობრებისგან ,,სამოქალაქო თეატრის” პირველი ტექნიკური ჯგუფი.
_ რას გეგმავთ მომავალში და რამდენად აქტიურად შესთავაზებთ მაყურებელს ახალ სპექტაკლებს?
_ აქტიურები ვიქნებით. პირველი პერფორმანსიც არა მარტო წარმოდგენა, სამოქალაქო აქტი იყო და ებრაელი ხალხის სოლიდარობას ვუძღვენით. თემაც ესაა. საბა კლდიაშვილმა ებრაელი ხალხის გადასარჩენად გასწირა თავი. საოცარი გმირია. ვითამაშებთ ყოველ თვეში ამ ,,ქუთაისურ ისტორიებს” როგორც შევძლებთ და სადაც შევძლებთ. ჩვენი და სხვების ენთუზიაზმით როგორც გამოვა. და რათქმაუნდა ახალ ტექსტზე დავიწყებ მუშაობას. იმდენ ნიჭიერ ადამიანს უნდა- შემოგვიერთდეს, რომ მგონია, გამოგვივა!
_ არის თუ არა გეგმაში საქართველოს რეგიონებში ტურნეების ჩატარება დაგეგმილი?
_ ძალიან გვინდა რეგიონებში გასვლა. ამაზე ბედნიერება რა უნდა იყოს. დაგეგმილ ხაზს არ მივყვებით ოღონდ. გეგმას დაფინანსება და სხვანაირი ფუნდამენტი სჭირდება. იღბალს ვართ მინდობილი. ასე დავიწყეთ და იმდენად ღია გულით ვაკეთეთ ყველაფერი, მგონი გასვლაშიც რამდენჯერმე მაინც გაგვიმართლებს. რაც მთავარია, ჩვენი ,,სამოქალაქო თეატრი” დაიბადა და ოცნება აგვიხდა. აწი, ჩვენს გონიერებაზეა მისი მოვლა.
ავტორი
