ჩემპიონთა ლიგაზე ბერლინის „უნიონთან“ შედარებით სუსტად ჩატარებული შეხვედრის შემდეგ, იტალიაში ხვიჩა კვარაცხელია გააკრიტიკეს.
გუშინ, ნეაპოლელმა ჟურნალისტმა პაოლო დელ ჯენიომ განაცხადა, რომ ხვიჩა კვარაცხელიამ „უნიონთან“ ცუდად ითამაშა.
„სალერნიტანასთან“ კვარაცხელია საუკეთესო იყო, „უნიონთან“ კი ცუდად ითამაშა. გასულ სეზონში კვარაცხელია ძალიან კარგი იყო, პოლიტანო ნაკლებად კარგი, ახლა თითქოს პირიქითაა, იმ გაგებით, რომ იტალიელი უფრო სტაბილურად გამოიყურება. როგორც ვთქვი, ბოლო მატჩში ქართველი არ მომეწონა და მას შემდეგ, რაც „ნაპოლის“ მაისური აცვია, ჩემი აზრით, ასე ცუდად ძალიან იშვიათად თუ უთამაშია, მაგრამ არ მგონია ამ გუნდის პრობლემა კვარაცხელია იყოს, პირიქით“, – განაცხადა პაოლო დელ ჯენიომ.
“პარმას” ყოფილმა სპორტულმა დირექტორმა და საფეხბურთო აგენტმა ენრიკო ფედელემ “ნაპოლისა” და “უნიონ ბერლინის” მატჩი შეაფასა და კომენტარი ხვიჩა კვარაცხელიაზეც გააკეთა.
“ნაპოლის” ქომაგებს ჰგონიათ, რომ გუნდში შესანიშნავი ფეხბურთელები ჰყავთ, თუმცა ეს მხოლოდ ილუზიაა, რა თქმა უნდა, ნეაპოლელთა წარმატება მხოლოდ ლუჩანო სპალეტის დამსახურება იყო.
რა შეიცვალა კვარაცხელიასა და დი ლორენცოსთვის? ეს უკანასკნელი იმავე სტილით თამაშობს და შეტევაში აქტიურად ერთვება, თუმცა სივრცეებს, რომლებიც უკან რჩება, არავინ აკონტროლებს. კვარაცხელია ამ მომენტისთვის ძალიან ეგოისტურად თამაშობს. ასე არ შეიძლება. იმის ნაცვლად, რომ თანაგუნდელი საკუთარ თავზე წინ დააყენოს, ბურთის მიღებისთანავე დრიბლინგს იწყებს და არაფერი გამოსდის, თუმცა წარუმატებლობის მთავარი მიზეზი რუდი გარსიაა.
ფრანგმა სპეციალისტმა სპალეტის მიერ დანერგილი სისტემა შეცვალა, გარსია ცვლილებებსაც აგვიანებს და გუნდის ორგანიზებასაც ვერ ახერხებს”, – განაცხადა ენრიკო ფედელემ.
“ნაპოლისა” და “უნიონ ბერლინის” დაპირისპირებას გამოეხმაურა გამოცემა „La Gazzetta dello Sport“ და ხვიჩა კვარაცხელიას თამაში შეაფასა.
“ქართველის თამაშმა შოკში ჩაგვაგდო, “კვარამ” ამ მატჩში ყველაფერი ჩადო, მისმა დრიბლინგებმა გერმანული გუნდის მცველებს პრობლემები შეუქმნა, თუმცა ეგოისტობის გამო ბოლო ბარიერის გადალახვას ვეღარ ახერხებდა ან თანაგუნდელისთვის პასის გაკეთების ნაცვლად, კარისკენ ნაადრევად ურტყამდა.
ძველი “კვარა” მინდორზე ბევრად უფრო მსუბუქად გამოიყურებოდა, ახლანდელი “კვარა” კი კბილებს აკრაჭუნებს და მუდამ უკმაყოფილოა, ქართველმა “უნიონ ბერლინის” ფეხბურთელებს კვლავ აჯობა, თუმცა გერმანელებმა შეხვედრაში გარდატეხის შეტანა მოახერხეს”, – დაწერა გამოცემამ.
ამავე გამოცემის ინფორმაციით, „ნაპოლიმ“ ორი მილიონი ევრო დაკარგა.
უეფა ჯგუფურ ეტაპზე მოგებისთვის გუნდებს 2,8 მილიონ ევროს უხდის, ფრისთვის კი – 900 000 ევროს. გერმანულ გუნდთან კვარაცხელიას გუნდს ორი მილიონით მეტის გამომუშავება შეეძლო, რადგან აშკარა ფავორიტი გახლდათ.
კრიტიკის პარალელურად, იტალიურ მედიაში ხვიჩა კვარაცხელიაზე დადებითი მასალაც გამოქვეყნდა.
იტალიური და მსოფლიო ფეხბურთის ლეგენდა ჯანლუიჯი ბუფონი მიიჩნევს, რომ ხვიჩა კვარაცხელიას ოქროს ბურთის მოგება შეუძლია.
„იუვენტუსის“ და იტალიის ნაკრების ყოფილი მეკარე ემანუელე ჯულიანელის დაწერილი წიგნის პრეზენტაციას დაესწრო, რომელიც იტალიელმა ჟურნალისტმა ცოტა ხნის წინ გამოსცა. წიგნი ხვიჩა კვარაცხელიაზეა, სათაურით – „კვარადონა, ქართული სასწაული“.
ბუფონმა სწორედ ამ წიგნის პრეზენტაციაზე ილაპარაკა ხვიჩაზე:
„კვარაცხელიამ ჩემი ყურადღება მაშინვე მიიქცია, იმის გამო, თუ რა სწრაფად და სიმარტივით მოახერხა იტალიურ ფეხბურთში დამკვიდრება. ფიზიკურად მაგონებს ლენტინის, ამ ტიპის ფეხბურთელია. ალბათ, ჯანლუიჯი უფრო სწორხაზოვანი ფეხბურთელი იყო, კვარაცხელიას კი დრიბლინგის ისეთი უნარები და სხეულის მოძრაობები აქვს, რაც მართლაც იშვიათად მინახავს.
თქვენ თქვით, რომ შეუძლია ოქროს ბურთის მოგება და ეს სიმართლეა. ცხადია, ოქროს ბურთის მოსაგებად საჭიროა „ისტორიული მომენტები“ და თუ ის ასეთ მომენტში მოხვდება, როგორც ფეხბურთელს, ყველანაირი თვისება აქვს ამ ჯილდოს მოსაგებად. მით უფრო, როცა მესის, რონალდუს და ნეიმარის ეპოქა დასრულდა, რომლებიც კანიბალები არიან, მიუხედავად იმისა, რომ ნეიმარს ოქროს ბურთი არასდროს მოუგია. კვარაცხელიას ნამდვილად ყველა თვისება აქვს საიმისოდ, რომ მბაპეს, ჰოლანდს და მსგავსი ტიპის ფეხბურთელებს კონკურენცია გაუწიოს“, – განაცხადა ბუფონმა.
ავტორი
