ოზურგეთში, თხილის ფასი, სეზონის დაწყებიდან დღემდე, კვლავ გატეხვის პრინციპით განისაზღვრება. ყოველი ათი გატეხილი ცალიდან, 7 ან 8 ცალი თუ საღი გული ამოვა, ერთ ცალში 70 თეთრს იხდიან. ანუ ერთი კილოგრამი თხილი, შესაძლოა, 5-6 ლარად ჩააბარო.
_ახლა ხალხს შენახულ თხილი მოაქვს. ვისაც კარგად მოვლილი პლანტაცია ჰქონდა, მარცვალი საღია. ათი ცალიდან 7-8 ცალი საღი ნაყოფი გამოდის. ჰოდა, კი ვუხდით ერთ კილოგრამში 5-6 ლარს, – ამბობს ოზურგეთელი თხილის მიმღები ცირა ქილიფთარი.
თუმცა, ამ ფასს შემოდგომის მიწურულს სასაცილოს უწოდებენ გურულები.
_ამას ჰქვი მაღალი ფასი? ანუ ადამიანმა იშრომა, იწვალა, ძალიან კარგად მოუარა თხილის პლანტაციას და კარგ თხილში 5 ან 6 ლარს უხდიან? ორჯერ მეტი ფასი რომ ჰქონდა წლების წინ, ის სხვა ქვეყანაში ხდებოდა? მოკლედ, ამათი მოსატყუებელი თხილი, გურულებმა, დიდი ხანია, მიივიწყეს და არც გულმოდგინედ უვლიან, სწორედ ასეთი ტყუილების გამო. რეაბილიტაციის პროგრამაც წყალში გადაყრილი ფულია, ან ვირაცის ჯიბეში..._ ამბობს „გურია ნიუსთან“ ოზურგეთელი ვაჟა ხელაძე.
ახლახან, ოზურგეთში, პროექტ „მწვანე გურიას“ ერთ-ერთ ტრენინგზე, როცა ლაგის წევრებმა აქტიურად ისაუბრეს თხილის ღირებულების დასადგენ ამ მეთოდზე, სახტად დარჩნენ ტრენერები.
_ეს მეთოდი თაღლითობას უფრო ხომ არ ჰგავსო? -იკითხეს მათ.
ავტორი
