გუშინ, ვეტერანმა ფეხბურთელმა დარიო მარკოლინმა ხვიჩა კვარაცხელიაზე ისაუბრა.
„კვარას „ატალანტასთან“ თამაშიდან ორმა რაღაცამ მოახდინა ჩემზე შთაბეჭდილება: მაძარის კოცნა მატჩის ბოლოს, რაც ცხადყოფს, რომ რაღაც შეიცვალა და ის ფაქტი, რომ მან მოედნის ყველა წერტილში ითამაშა. არა მხოლოდ მან, ლობოტკამ და ანგისამაც შესანიშნავად ითამაშეს. „ნაპოლის“ ფეხბურთელების მოტივაცია შეიცვალა, მაძარის სწორედ ფეხბურთელების მენტალური დამოკიდებულება უნდა შეეცვალა და მან ეს გააკეთა“. – განაცხადა დარიო მარკოლინმა.
იტალიელმა ჟურნალისტმა პაოლო ძილიანიმ კი კომენტარი გააკეთა „ატალანტას“ მცველის, ჰანს ჰატებურის უხეშობაზე, რომელმაც ხვიჩა კვარაცხელიას ფეხებში რამდენჯერმე ჩაარტყა.
„საბედნიეროდ ჰატებური მოედანზე მხოლოდ 33-ე წუთზე შევიდა, რადგან მატჩის ორი მესამედი მხოლოდ კვარაცხელიაზე უხეშობაში გაატარა, ხოლო მსაჯს არც კი გაუფრთხილებია. როგორც ჩანს, იტალიის სამსაჯო კორპუსში ფიქრობენ, რომ ხალხი სტადიონზე არა კვარას თამაშის სანახავად, არამედ ჰატებურის თამაშის სანახავად დადის“, – დაწერა პაოლო ძილიანიმ.
„ატალანტასთან“ მატჩის მიმდინარეობისას ტრავმა მიიღო „ნაპოლის“ მოთამაშე მატიას ოლივეირამ, რომელიც მოედნიდან საკაცით გაიყვანეს. საინტერესოა, რომ მარიო რუიც ტრავმირებულია და გუნდი მარცხენა მცველის გარეშე დარჩა.
ოლივეირა გუშინ, ყავარჯნებით რომის კლინიკაში სამედიცინო გამოკვლევაზე მივიდა. ურუგვაელი თავს მშვიდად გრძნობდა, მას კლუბის ექიმები ახლდნენ და კლუბის ვებგვერდის ცნობით, მარცხენა მუხლის კოლატერალური მყესის მეორე ხარისხის დაზიანება დაუდგინდა. ცნობილი გახდა, რომ ის მარტამდე თამაშს ვერ შეძლებს.
გუშინ, ვალტერ მაძარიმ აღდგენითი ვარჯიში ჩაატარა. მარიო რუიმ დაბრუნება ნავარაუდევზე ადრე შეძლო, გუნდთან ერთად ივარჯიშა და არაა გამორიცხული 30 ნოემბერს მადრიდის „რეალთან“ ითამაშოს. ნახევარმცველი იესპერ ლინდსტრიომი თერაპიის კურსს გადის და სატრენაჟორო დარბაზში დაიტვირთა.
ესპანურმა გამოცემამ „Mundo Deportivo“ „ვალენსიას“ ბოლო საშინაო მატჩები შეაფასა და დაწერა, რომ საკუთარ კედლებში გუნდი თავს ძალიან ორგანიზებულად იცავს, რისი ერთ-ერთი მთავარი შემოქმედიც ქართველი კარის დარაჯია.
„შაბათს „ვალენსიასა“ და რაფა ბენიტესის „სელტას“ მატჩი უგოლოდ დასრულდა და ეს ზედიზედ მესამე მატჩი იყო „მესტალიაზე“, რომელშიც რუბენ ბარახას გუნდმა კარი მშრალად შეინახა. ამ ფაქტს მატჩის შემდგომ პრესკონფერენციაზე მწვრთნელმა ხაზი განსაკუთრებით გაუსვა.
სულ ცოტა ხნის წინ, მამარდაშვილმა მადრიდის „რეალთან“ გასვლით მატჩში ხუთი გოლი გაუშვა, თუმცა, შინაურ კედლებში ისიც შეუდარებელია. ქართველმა მეკარემ სრულად დაბლოკა მისი კარის მისადგომები „მესტალიაზე“ და ის ფაქტობრივად, აუღებელ ციხე-სიმაგრეც აქცია.
ბარახამ მაინც მიაღწია იმას, რომ თუნდაც ქაოსური თამაშის ფონზე „ვალენსია” მომატებას ახერხებს. ამის ნიშნები არ გვქონია გასულ სეზონში, როდესაც ლამის ყველა უხეში შეცდომა გაშვებული გოლით სრულდებოდა, იქნებოდა ეს, „მესტალიაზე“ თუ გასვლით შეხვედრებში.
ახლა, გუნდის თამაშში მეტი სოლიდურობა შეინიშნება და 2020 წლის შემდეგ პირველად მოხდა, რომ „ვალენსიელებმა“ ზედიზედ სამ საშინაო მატჩში გოლი არ გაუშვეს. მაშინ ეს ალბერტ სელადესის ხელმძღვანელობით მოხერხდა: 1:0 – „ეიბართან“, 2:0 – „ბარსელონასთან“ და 1:0 – „სელტასთან“.
ამჯერად, წარმატებული სერია „კადისთან“ მოგებით (2:0) გაიხსნა, შემდეგ იყო 1:0 „გრანადასთან“ და ახლა უგოლო ფრე „სელტასთან“. ამჟამად, მთავარი კითხვა ისაა, მოახერხებენ თუ არა ვალენსიელები ამ სერიის გარძელებას, რაც ურთულესი საქმე იქნება. საქმე ის გახლავთ, რომ 17 დეკემბერს „მესტალიას“ „ბარსელონა“ ესტუმრება, რომელსაც იქ ბოლო სამი მატჩი მოგებული აქვს”.
„ვალენსიას“ 19 ქულა აქვს და „ლა ლიგის“ სატურნირო ცხრილში მე-9 ადგილზე იმყოფება, კატალონიელებთან შეხვედრამდე კი, 2 გასვლითი თამაში ელის: 2 დეკემბერს – „ჟირონასთან“, ხოლო 9-ში – „ხეტაფესთან“.
ავტორი
