,,აკეთის თემის წარმომადგენლები საკრებულოზე არ შეუშვიათ!“- ამის შესახებ ფეისბუქჯგუფში „აკეთის განვითარებისთვის“ დაწერა ახალგაზრდა აქტივისტმა და ჟურნალისტმა გიორგი მორჩილაძემ.
,,მოკლედ, რამდენიმე დღის წინ დავწერე ინფორმაცია, რომ ლანჩხუთში ჩამოირიცხა თანხა, რომელიც სოფლებზე უნდა განაწილებულიყო. ჰოდა, ისიც დავწერე, რომ ჩავიდეთ და საკრებულოზევე მოვითხოვოთ ამ თანხიდან ნაწილის აკეთის თემისთვის გამოყოფა-მეთქი.
თურმე ჩასულან ჩვენი თემიდან ადამიანები ლანჩხუთში და მერის წარმომადგენელს საკრებულოზე არ შეუშვია. ასე უთქვამს, წინასწარ უნდა მოგემართათ დასწრების თხოვნითო!
აქვე, გიზიარებთ ამონარიდს ადგილობრივი თვითმმართველობის კოდექსიდან, სადაც ყველაფერი ნათლად წერია! არანაირი წინასწარი გაფრთხილება არ სჭირდება სხდომაზე დასწრებას! სხვათა შორის, მსგავსი პრობლემები მეც შემექმნა, მაგრამ როგორც კი ვუთხარი რომ ჟურნალისტი ვიყავი, კეთილი ინებეს და რიტორიკა შეცვალეს!“
გიორგი მორჩილაძე ლანჩხუთის საკრებულოს ოპოზიციონერ წევრებსა და თემის მაჟორიტარ დეპუტატს მოუწოდებს, რომ დაინტერესდნენ ამ საკითხით.
„მოვუწოდებთ, ლანჩხუთის საკრებულოს ოპოზიციონერ წევრებს, უახლოეს სხდომაზე დააყენონ საკითხი, ვინ გაბედა აკეთელებისთვის თვითმმართველობის კოდექსის თავზე გადახევა! რატომ არ შეუშვეს ხალხი სხდომაზე და რა უფლებით?!
მოვუწოდებთ, ჩვენი თემის დეპუტატს დაინტერესდეს საკითხით და გაარკვიოს ვინ გაბედა მისი სამაჟორიტარო ოლქიდან ლანჩხუთში ჩასული ხალხის მოტყუება!
პ.ს. მერის მოადგილეს ეს ხალხი ცალკე გაუყვანია და იქ გაუცია პასუხი კითხვებისთვის! ჰოდა, რა უპასუხია, მაგას ცოტა მოგვიანებით მოგახსენებთ, სხვა ამბებთან ერთად!“- წერს მორჩილაძე.
მისი განმარტებით, საკრებულოს სხდომაზე დასასწრებად მისულ აკეთის თემის წარმომადგენლებს მათთვის უცნობი მამაკაცი მერის მოადგილედ გაეცნო –„კაცი იყოო და უბრალოდ სახელი არ ახსოვთ ამათ. მე ვვარაუდობ, რომ შესაძლოა რომელიმე საკრებულოს წევრი ყოფილიყო და მოიტყუა, თუმცა სად დაიმალება ეგ ამბავი, მაინც გაირკვევა. ფაქტია, ესენი სხდომაზე არ შეუშვა და ცალკე ელაპარაკა“.
გიორგი მორჩილაძის ამ პოსტს საკრებულოში “ერთიანი ნაციონალური მოძრაობის” წარმომადგენელი კახა ასკურავა ეხმაურება.
,,მერის წარმომადგენელს არანაირი სამართლებრივი უფლება არ აქვს(მორალურს რომ შევეშვათ)ვინმეს აუკრძალოს საკრებულოს სხდომაზე ან დასწრება ან/და სიტყვით გამოსვლით სარგებლობა. საკრებულო თავისი შინაარსით და კანონმდებლობით პირიქით,ზედამხედველი და მაკონტროლებელი ორგანო უნდა იყოს აღმასრულებელი (მერიის) ორგანოს და თუ ეს მართლაც გააკეთა მერის თანაშაწემემ, მას გადაუჭარბებია თავისი უფლება-მოსილებისთვის,“– განმარტავს ასკურავა და დასძენს, რომ აუცილებლად მოიკითხავს ამ შემთხვევის შესახებ.
გიორგი მორჩილაძის ზემოთ ნახსენებ განაცხადს აკეთის მაჟორიტარი დეპუტატი ემზარ თევდორაძეც პასუხობს-
„ პირველად მესმის, მაგრამ თუ სხდომაზე სიტყვით უნდა მოქალაქეს გამოსვლა, წინასწარ უნდა იყოს ცნობილი, დასწრებაზე პრობლემა არ არის.
ან სახელი არ უთხრა ვინ იყო?! მერე მოიტყულა, რომ საკრებულოს წევრი იყო. არადა, თქვენ ამბობთ კაცი იყო, თან მერის მოადგილეო. მერე ვიღაცას გვერდზე გაუყვანია ეს ხალხი იქ და დამუქრებია თუ რაღაც ამდაგვარი, ცოტა რთული ამბავია, გავერკვევი აუცილებლად.“
ავტორი
