ცნობილია, რომ მიმდინარე სეზონის დასრულების შემდეგ, 54 წლის იტალიელი სპეციალისტი, ანტონიო კონტე სამწვრთნელო კარიერას დაუბრუნდება.
გუშინ, გამოცემამ „CalcioMercato” დაასახელა ის კლუბები, რომლებიდანაც ერთ-ერთში კონტე, სავარაუდოდ, დაინიშნება.
ამ ჩამონათვალში პირველი მიუნხენის „ბაიერნია“. ამ გუნდის უმთავარი სამიზნე ლევერკუზენის „ბაიერის“ ამჟამინდელი დამრიგებელი ჩაბი ალონსოა და ბოლო ცნობების თანახმად, გერმანული გრანდი ესპანელი სპეციალისტისთვის ბრძოლაში დაწინაურდა. მეორე კანდიდატად ანტონიო კონტე განიხილება და იტალიელ მწვრთნელსაც ბაიერნში მისვლა სურს.
სიაში მეორე „ნაპოლია“, რომელსაც გასულ წელთან შედარებით ცუდი სეზონი აქვს. ხვიჩა კვარაცხელიას გუნდი ევროზონაში მოხვედრას ცდილობს და თუ ნეაპოლურ გუნდს კონტეს დანიშვნა უნდა, მაშინ ჩემპიონთა ლიგის საგზური უნდა მოიპოვოს. აურელიო დე ლაურენტისი მთელი სეზონის განმავლობაში კონტეს დათანხმებას ცდილობდა, მაგრამ, ჯერჯერობით, უშედეგოდ.
მესამე ვარიანტი „მილანია“, საიდანაც დიდი ალბათობით, სეზონის ბოლოს სტეფანო პიოლი წავა.
გუშინ პოპულარულმა გამოცემამ „Gazzetta Dello Sport“ ხვიჩა კვარაცხელიასთან კონტრაქტის განახლების შესახებ დაწერა.
„კონტრაქტის განახლებაზე სეზონის ბოლოს ისაუბრებენ, მაგრამ დე ლაურენტისი მაქსიმალურად შეეცდება ხვიჩას დაკმაყოფილებას, რომელიც დღეს „სერია A“-ს ყველაზე დაბალანაზღაურებად ფეხბურთელებშია, მიუხედავად იმისა, რომ „სერია A“-ს მოქმედი MVP-ია. თუმცა, როგორც ამბობენ, ფული ადამიანს არ აბედნიერებს და კვარა არ ელოდა, რომ „ნაპოლიში“ ასეთ მოკლე დროში ასეთი ბედნიერი იქნებოდა. კვარას მამამ თქვა, რომ ძალიან რცხვენია, როდესაც მას მარადონას ადარებენ, მაგრამ გულშემატკივრებს მადლობა გადაუხადა“, – დაწერა გამოცემამ.
გუშინ, ვეტერანმა ფეხბურთელმა ჯანი იმპროტამ ხვიჩა კვარაცხელიასა და ვიქტორ ოსიმენს ურჩია, რომ „ნაპოლი“ არ დატოვონ.
„ფეხბურთელმა „ნაპოლი“ რატომ უნდა დატოვოს? აქ მათ ყველაფერი აქვთ, რატომ უნდა წავიდნენ? ფეხბურთელმა „ნაპოლი“ მხოლოდ ფულის გამო შეიძლება დატოვოს, მაგრამ მე ამის გამოც არ წავიდოდი. ცხოვრებაში უფრო მნიშვნელოვანი რაღაცეებიცაა, ეკონომიკური ასპექტი არ არის მნიშვნელოვანი. აქ ისინი გრძნობენ სიყვარულს, ისეთი მნიშვნელოვანი ფეხბურთელები არიან, როგორიც სხვაგან არსად იქნებიან“, – განაცხადა იმპროტამ.
გუშინ, „პსვ ეინდჰოვენის“ ფეხბურთელმა ირვინგ ლოზანომ განაცხადა, რომ „ნაპოლის“ მიერ მიმდინარე სეზონში ნაჩვენები შედეგები სეზონის წინ მიღებული არასწორი გადაწყვეტილებების ნაყოფია.
„ნაპოლის“ წლევანდელი შედეგები სეზონის წინ მიღებული არასწორი გადაწყვეტილებების ნაყოფია. ჩემს შემთხვევაში სურდათ ხელფასის შემცირება და კიდევ იყო რაღაც, არასასიამოვნო. „ნაპოლის“ კარგი ფეხბურთელები ჰყავს და თუ მოუმატებენ, ოთხეულში შესვლა შეუძლიათ“, – თქვა ლოზანომ.
ირვინგ ლოზანო „ნაპოლიში“ 2019-2023 წლებში თამაშობდა და 155 შეხვედრაში 30 გოლის გატანა მოახერხა.
ცნობილი გახდა, რომ „ბარსელონას“ ფრენკი დე იონგი და პედრი „ნაპოლისთან“ ჩემპიონთა ლიგის მერვედფინალში ვერ დაეხმარებიან.
ორივე ფეხბურთელმა ტრავმა „ბილბაოსთან“ შეხვედრაში მიიღო და როგორც გამოკვლევამ აჩვენა, უახლოეს პერიოდში ისინი მოედანზე ვერ გავლენ. ჯერჯერობით, უცნობია უქმობის ზუსტი დრო, მაგრამ იტალიურ გუნდთან 12 მარტს გასამართ შეხვედრაში ისინი ვერ ითამაშებენ.
„ნაპოლისა“ და „ბარსელონას“ პირველი მატჩი ნეაპოლში ფრედ, 1:1 დასრულდა.
ავტორი
