ოზურგეთში ქალების მარში გაიმართა. ეს აქცია სხვა აქციებთან შედარებით იმით გამოირჩეოდა, რომ სიტყვით მხოლოდ ქალები გამოდიოდნენ.
ყველა გამომსვლელმა სიტყვით გამოსვლისას აღნიშნა, რომ ქვეყანაში არაერთი პრობლემაა, რომლის მოგვარებაზეც ხელისუფლებამ უნდა იზრუნოს. ასევე აქციაზე აღინიშნა, რომ “რუსული კანონის” მიღების შემთხვევაში ადამიანებისთვის ყველაზე საჭირო პროექტები შეჩერდება, რომელსაც ქვეყნის პარტნიორი დონორი ორგანიზაციების დაფინანსებით ხერხდება.
აქციის ერთ-ერთმა ორგანიზატორმა ნინო ურუშაძემ ქალების მარშისთვის სპეციალურად დაწერილი ტექსტი წაიკითხა.
„რუსული კანონით ვერ დაგვადუმებთ ამ ქვეყნის ამომრჩეველ 53% ქალს! ჩვენი ხმა არის ყველა ქალის ხმა: ემიგრანტი და მარტოხელა დედების, საქართველოს სხვადასხვა რეგიონში მცხოვრები რელიგიური და ეთნიკური უმცირესობის ქალების, შშმ ბავშვების დედების და თავად შშმ ქალების, ხანდაზმულების, ახალგაზრდების, ძალადობა გამოვლილი, დევნილი, ქვიარი, კონფლიქტის ზონაში მცხოვრები და ყველა იმ ქალის ხმა, ვისაც ჩვენი ქვეყნის ისტორიის ყველა ეტაპზე მნიშვნელოვანი ეროვნული მისია შეუსრულებია! ჩვენ ვცხოვრობთ სახელმწიფოში, რომელიც სათანადოდ არასდროს იცავდა ქალების უფლებებს და ინტერესდებოდა ჩვენი პრობლემებით. “რუსული კანონით” კი საბოლოოდ გვდევნიან ყველა სივრციდან.
ჩვენ ვეღარ გაგაგონებთ ხმას, როდესაც განვიცდით ძალადობას, ვითხოვთ მკურნალობას, ჩვენს შვილებს სჭირდებათ წამალი, ონკოპაციენტი ქალები და ოჯახის წევრები ითხოვენ შველას ან სხვა პრობლემის წინაშე ვდგავართ. რამეთუ არც პარლამენტში იქნებიან ჩვენი ინტერესების დამცველები, და არ იარსებებს არც დამოუკიდებელი მედია, რომ თქვენ და ერთმანეთს მივაწვდინოთ ხმა! რუსულ კანონს და გენდერული კვოტების გაუქმებას საერთო მიზანი აქვთ – ძალაუფლების შენარჩუნება, რაც კიდევ უფრო დიდ საფრთხეს უქმნის საქართველოში მცხოვრებ ყველა ქალს. გენდერული კვოტის გაუქმებით პარლამენტმა უგულებელყო საქართველოს ამომრჩევლის 65%-ის აზრი, რომლებიც ემხრობოდნენ კვოტებს. მოვუწოდებთ პარლამენტს, მოუსმინონ ქალების ხმას, გაითვალისწინოს პრეზიდენტის ვეტო და მოტივირებული შენიშვნები. არ გააუქმოთ გენდერული კვოტები!“ აქციის ერთ-ერთმა ორგანიზატორმა, ნათია ვაშალომიძემ დამსწრე საზოგადოებას მადლობა გადაუხადა აქციაში მონაწილეობისთვის.
„მადლობა გიხდით გამბედაობისთვის. “რუსული კანონის” მიღების შემთხვევაში შეიძლება ეს ბოლო აქცია იყოს. “რუსული კანონის” მთავარი მიზანი არის ალტერნატიული ხმა და ალტერნატიული აზრი გააქროს ამ ქვეყნიდან. “რუსული კანონი” არის მიმართული იმისთვის, რომ სამარცხვინო იარლიყი მიაკრას ადამიანებს და დასაჯოს ისინი. მსგავსი ქმედებები უკვე დიდი ხანია ამუშავებულია რუსეთში. ეს კანონი არ უნდა მიიღონ პარლამენტარებმა,“ – თქვა ნათია ვაშალომიძემ.
აქციის ბოლოს კი საქართველოს ჰიმნი გაჟღერდა.
აქციის გამომსვლელების ვიდეო შეგიძლიათ ნახოთ აქ https://www.facebook.com/gurianews/videos/464986649289499.
ავტორი
