ევროკავშირის უმაღლესი წარმომადგენელი ჯოზეფ ბორელი და ევროკომისია საქართველოს პარლამენტის მიერ „უცხოური გავლენის გამჭვირვალობის შესახებ“ კანონის მიღებასთან დაკავშირებით განცხადებას ავრცელებენ.
„ევროკავშირი მხარს უჭერს ქართველ ხალხსა და მათ არჩევანს დემოკრატიისა და საქართველოს ევროპული მომავლის სასარგებლოდ. მიუღებელია სამოქალაქო საზოგადოების წარმომადგენლების, პოლიტიკური ლიდერებისა და ჟურნალისტების, ასევე მათი ოჯახების მიმართ დაშინება, მუქარა და ფიზიკური შეურაცხყოფა. მოვუწოდებთ საქართველოს ხელისუფლებას, გამოიძიოს ეს დოკუმენტირებული ქმედებები.
ევროპულმა საბჭომ საქართველოს მიანიჭა კანდიდატი ქვეყნის სტატუსი იმის გათვალისწინებით, რომ 2023 წლის 8 ნოემბრის ევროკომისიის კომისიის რეკომენდაციით გათვალისწინებული შესაბამისი ცხრა ნაბიჯი იქნება გადადგმული. ეს ნაბიჯები მოითხოვს, რომ ადამიანის უფლებები იყოს დაცული და სამოქალაქო საზოგადოებას, ასევე მედიას, შეეძლოს თავისუფლად მუშაობა. ისინი ასევე ეხება დეპოლარიზაციის საჭიროებას და დეზინფორმაციის წინააღმდეგ ბრძოლას.
ამისა მიუხედავად, და დიდი პროტესტისა და საერთაშორისო საზოგადოების მხრიდან ცალსახა მოწოდებების მიუხედავად, საქართველოს მთავრობის მმართველმა უმრავლესობამ პარლამენტში მესამე მოსმენით მიიღო კანონი „უცხოური გავლენის გამჭვირვალობის შესახებ“. ევროკავშირმა მკაფიოდ და არაერთხელ განაცხადა, რომ კანონის სულისკვეთება და შინაარსი არ შეესაბამება ევროკავშირის ძირითად ნორმებსა და ღირებულებებს. ეს ძირს გამოუთხრის სამოქალაქო საზოგადოებისა და დამოუკიდებელი მედიის მუშაობას, მაშინ როდესაც შეკრების თავისუფლება და გამოხატვის თავისუფლება არის ფუნდამენტური უფლებები, რომლებიც საფუძვლად უდევს საქართველოს ვალდებულებებს ასოცირების შეთანხმების და ევროკავშირში გაწევრიანების გზის ფარგლებში.
ამ კანონის მიღება უარყოფითად აისახება ევროკავშირის გზაზე საქართველოს პროგრესზე. წინსვლის გზასთან დაკავშირებული არჩევანი საქართველოს ხელშია. ჩვენ მოვუწოდებთ საქართველოს ხელისუფლებას, გაიწვიოს კანონი, დაიცვას ევროკავშირის გზისადმი ერთგულება და წინ წაწიოს აუცილებელი რეფორმები, რომლებიც დეტალურად აღწერილია ცხრა ნაბიჯში.
ევროკავშირი მზადაა, გააგრძელოს ქართველების მხარდაჭერა, რომლებიც ევროპული მომავლისკენ მიისწრაფვიან“, – ნათქვამია განცხადებაში.
