ლანჩხუთში მომხდარი უმძიმესი მკვლელობის დეტალებს ახლა სამართალდამცავები არკვევენ. შემზარავი დანაშაული 8 აგვისტოს ლანჩხუთში, სარჯველაძეების ფერმაში მოხდა. გამოძიების ინფორმაციით, იმ საბედისწერო დღეს თემურ სარჯველაძეს მისი თანაკლასელის შვილი სასტიკად გაუსწორდა და წამებით მოკლა.
შინაგან საქმეთა სამინისტრომ მომხდარზე ოფიციალური ინფორმაცია უკვე გაავრცელა. უწყების ინფორმაციით, დამნაშავის დაკავება ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად მოხდა. გამოძიებით დადგინდა, რომ ბრალდებულმა მიმდინარე წლის 8 აგვისტოს, ურთიერთშელაპარაკების ნიადაგზე 1958 წელს დაბადებულ თ.ს.- ს ფიზიკური დაზიანება მიაყენა. მიყენებული დაზიანების შედეგად თ.ს. ადგილზე გარდაიცვალა.
სამართალდამცველებმა ჩატარებული ოპერატიული ღონისძიებების შედეგად, ბრალდებული ცხელ კვალზე დააკავეს.
როგორც ადგილობრივები ამბობენ, მკვლელობაში ბრალდებული ყოფილი სპეცრაზმელია, რომელსაც მკვლელობამდე ფერმაში მოკლული თემურ სარჯველაძე გაუმასპინძლდა და ამის შემდეგ არაფხიზელმა ბრალდებულმა მას ჯერ ხელ-ფეხი შეუკრა, ფიზიკურად გაუწორდა და მერე ე.წ სპიცით წამებით მოკლა. რა გახდა მკვლელობის რეალური მიზეზი, ამას სამართალდამცავები ადგენენ. ერთ- ერთი ვერსიით, ფერმაში სავარაუდოდ, მიწის ნაკვეთის გამო დაიწყო კონფლიქტი, მეორე ვერსიით, ბრალდებულს პათოლოგიური სიმთვრალე ჰქონდა და მთვრალმა სისასტიკე ჩაიდინა.
ნონა გიგინეიშვილი ოჯახის ახლობელი:
– უმძიმესი, ენით აღუწერელი დანაშაულია ჩადენილი. მოკლული ძალიან კარგი ადამიანია, თემურ სარჯველაძე. თემური დიდხანს თბილისში ცხოვრობდა, მაგრამ მამის გარდაცვალების შემდეგ, ლანჩხუთში დაბრუნდა და უვლიდა მამის საქონლის ფერმას. სწორედ იქ მოხდა ეს შემზარავი ამბავი. დამნაშავე ამ ოჯახის ახლობელია, ახალგაზრდა ბიჭია ბრალდებული, დათო ტუღუში. მისი დედა მოკლულის თანაკლასელი და მეგობარია. ოჯახები ახლობლობდნენ. დამნაშავის ბებია ცოტა ხნის წინ გარდაიცვალა და გასვენებისთვის საკმარისი ყველი და არაყი თემურს მიუტანია.
ოჯახს ყურადღებას აქცევდა, მათ შორის რაიმე დაპირისპირება რომ ყოფილიყო, გვეცოდინებოდა. მკვლელობაში ბრალდებული ყოფილი სპეცრაზმელია, ის ლანჩხუთში არ ცხოვრობს, მაგრამ პერიოდულად ჩამოდიოდა ხოლმე. ხელ- ფეხი შეუკრავს და წამებით ჰყავს მოკლული. თავიდან გაჩნდა ეჭვი, თანამზრახველი ხომ არ ჰყავდა, მაგრამ როგორც ერთ-ერთმა პოლიციელმა მითხრა, დანაშაული მხოლოდ ტუღუშის ჩადენილია. თემური ძალიან ნაწამებია…
ამის შემდეგ წამოსულა დამნაშავე თემურის კუთვნილი მანქანით კლინიკაში და იქ უთქვამს, ესა და ეს პიროვნება ამ ადგილას არის ცუდად და მიხედეთო. სასწრაფო და პოლიცია მივიდა შემთხვევის ადგილას და იქ უმძიმესი სურათი დახვდათ. იქვე დააკავეს ეტყობა დამნაშავეც. ამბობენ სისხლში ამოთხვრილი იყოო. ისიც ითქვა, 4 პოლიციელი აკავებდა ხელბორკილები რომ დაედოთო, ზოგმა თქვა თვითონ ჩაბარდა პოლიციასო. იმდენად მძიმე მდგომარეობაში დახვდათ ცხედარი, რომ ფაქტის ადგილას მისულმა პოლიციელმა დეტალებზე საუბრისგან თავი შეიკავა. ხელ-ფეხი ჰქონდა შეკრული გარდაცვლილს, ძვლები სულ დამტვრეულია, ნაწამებია… ეტყობა ფიზიკურად გაუსწორდა და მერე ჭრილობები აქვს მუცლის არეში. ვარაუდობენ რომ ე.წ სპიცი გაუყარა რამდენიმე ადგილას.
