„კი ჰქონია ფასი ბიძინას ჩამოსვლას, მალადეც“:  თხილის და ადამიანის „ფასების   შეფასება“ ასკანელი პედაგოგისგან

გურიაში,  ახლა,  თხილის ფასის საგრძნობლად დავარდნის, თითქმის განახევრების გამო, გურულების თქმით, „სიცილ-ტირილა“ სჭირთ და ადვილი გასარკვევი არაა, თხილის მისაღებ პუნქტებთან  მდგარი   ადამიანები, როდის ხუმრობენ და როდის  „იკბინებიან“  ჩვეული სარკაზმით.

თხილის ფასი კი ორი ლარია („გულშიშველა“), 2,50 („ბერძნულა“). ისიც აქა-იქ. მიმღები ოპერატორები ხან ფულის უქონლობას ასახელებენ მიზეზად და დაცდას თხოვენ კლიენტებს. ხანაც საერთოდ უარს ეუბნებიან.

_ შვილო, ლეილა მელუა ვარ ასკანიდან, 86 წლის. პროფესიით პედაგოგი, მთელი ცხოვრება მასწავლებლად ვიმუშავე, ახლა კი ამ აკანკალებული ხელებით ვხიკავდი ამ თხილს. ძლივს ჩამოვათრიე და როგორ დავარდნილია ფასი. მალადეც, ბიძინას ოზურგეთში ჩამოსვლას  კი ჰქონია ფასი. გადასაყრელად წამომიღია. უკან რანაირად წავიღო. არ შემიძლია ამის წათრევა. ჩამოვივლი ისევ ყველასთან. იქნებ, ცოტა მეტი მომცენ. ვიტირო ახლა ამხელა ქალმა? _ აცახცახებული ხელები გამოგვიწოდა მან და კარგად დამხედეთო, გვითხრა.

_არ ვიცი არაფერი, როგორი ფასი იქნება. შესაძლოა, უფრო დაიკლოს და სად წავიღო ეს ჩემხელა ტომრები, აგერ, სავსე მაქვს საწყობი, _ მიგვახედა ტომრებით სავსე ოთახისკენ   მიმღებმა ცირა ქილიფთარმა. მისივე თქმით, რამდენიმე დღეა, თხილი არავის მიაქვს და ასე ავსებული აქვთ საწყობები.

დღის განმავლობაში, ოზურგეთში, ბევრმა უკან წაიღო გასაყიდად ჩამოტანილი თხილი.