ოზურგეთში დაწყებული პროტესტი თბილისში, პარლამენტთან გრძელდება. სამი შვილის დედა, თამთა ჟვანია, სამართლიანობის აღდგენას და მისი ყოფილი მეუღლის მიერ წართმეული შვილის დაბრუნებას ითხოვს.
“რატომ არ არის მოძალადე დასჯილი ამდენი ხანი? სამართალო სად ხარ? დამიბრუნეთ ძალით წართმეული შვილი! არა ძალადობას! არა დედა-შვილის დაშორებას!”_ წერია ბანერზე, რომელიც თამთამ დღეს პარლამენტის წინ დადგა და როგორც “გურია ნიუსს” ეუბნება, არ იცის მისცემენ თუ არა პარლამენტთან კარვის გაშლის უფლებას, მაგრამ ვიდრე მისი მოთხოვნები არ ასრულდება, ტერიტორიის დატოვებას არ აპირებს.
ინფორმაციისთვის, კორონავირუსის პერიოდში თამთა ჟვანია ემიგრაციაში წავიდა. როგორც თვითონ გვიამბობს, სამუშაოდ წასვლა ქმრის ოჯახმა აიძულა, ბავშვებზე მზრუნველობა კი ოჯახმა თავის თავზე აიღო. (პირველი ქორწინებიდან მას ორი შვილი ჰყავს და მეორედან _ ერთი) 11 და 2 წლის შვილები მან მეუღლეს დაუტოვა, ვაჟი კი თბილისში დარჩა. მოგვიანებით მისთვის გახდა ცნობილი, რომ მისი მეუღლე ძალადობდა მის 11 წლის შვილზე. მისივე თქმით, თამთას მიერ ემიგრაციიდან გამოგზავნილი თანხებს არამიზნობრივად ხარჯავდა მისი მეუღლე.
საქართველოში დაბრუნებულმა ვერ მოახერხა მესამე შვილის დაბრუნება მასთან. როგორც ჩვენი რესპონდენტი გვიყვება, თითქმის ორი წელია გრძელდება ეს ტანჯვა-წამება და სამართალს ვერ მიაღწია.
“მინდა ავღნიშნო, რომ მარტო ჩემი პრობლემის გამო არ ვდგავარ აქ, რადგან მსგავსი პრობლემა შეიძლება დაემართოს სხვასაც. შეიძლება დედა ემიგრაციიდან ჩამოვიდეს და შვილი ვერ დაიბრუნოს. ვითხოვ სიმართლის დადგენას. უკვე სამი წელია ოზურგეთის რაიონული სასამართლო განიხილავს სისხლის სამართლის საქმეს, ახლახანს ჩაინიშნა პროცესი და ალბათ კარავი რომ არ გამეშალა იქაც, პროცესი არ ჩაინიშნებოდა. საქმე ეხება ქალზე და 11 წლის გოგოზე ძალადობას მამინაცვლის მხრიდან”,_ ამბობს თამთა ჟვანია.
რაც შეეხება მცირეწლოვანი შვილის ამბავს, თამთა ჟვანია გვიამბობს:
_ფაქტი სახეზეა, რომ ორი წლის წინ ჩამოვედი და გულში ჩახუტებული ბავშვი გამგლიჯეს. იქვე იდგა პოლიციაც, ადვოკატიც, მაგრამ ვერავინ დამეხმარა. მითხრეს, რომ სასამართლოსთვის უნდა მიმემართა და თუ ბავშვს წამოვიყვანდი მამამისის სახლიდან, კანონდარღვევად ჩაითვლებოდა. მამამისმა მითხრა, რომ ბავშვს არ გამომატანდა”,_ ამბობს თამთა ჟვანია და აღნიშნავს, რომ ამ საქმეზე სასამართლომ ბავშვი ჯერ მას მიაკუთვნა, თუმცა მონიტორინგი ბავშვის წამოსაყვანად ვერ შედგა.
“პირველ ვიზიტზე ბავშვი ჩამეხუტა, შემდეგ ვიზიტებზე კი კიოდა, არ მეკარებოდა”,_ ამბობს თამთა ჟვანია. შემდეგ კი ფსიქოლოგებმა დაადგინეს, რომ ბავშვზე ფსიქოლოგიური ძალადობა ხდება. ხელახალ სასამართლო პროცესზე მოსამართლემ ბავშვის საცხოვრებელ ადგილად ოზურგეთში მამის სახლი განსაზღვრა, მას კი ალიმენტი დააკისრა და ბავშვთან ურთიერთობისთვის დრო განუსაზღვრა, მაგრამ გადაწყვეტილება დღემდე ძალაში არ შესულა და ვერც შვილთან ურთიერთობას ვერ ახერხებს.
“ჩემი მოთხოვნებია, რომ დავადგინოთ რატომ კივის ბავშვი, თუ რატომ არ მიბრუნებენ შვილს. სოციალურმა სამსახურმა დაწერა, რომ ბავშვი მიჩვეულია მამას, თუმცა ფსიქოლოგების დასკვნაში ცალსახად წერია, რომ დედასთან ბავშვის დაშორება ცუდ შედეგს გამოიღებს.
ვითხოვ დადგინდეს სიმართლე. სისხლის სამართლის საქმე რომელიც უკვე მიმდინარეობს 2 წელზე მეტია, რატომ არ არის დასრულებული. თუ იმიტომ არ არის დასრულებული, რომ როგორც მოსამართლე იძახის მას დრო არ აქვს, მაშინ გადმოიგზავნოს საქმე ისეთ სასამართლოში, რომელიც მას მალე განიხილავს. კიდევ მინდა, რომ მთავარი მტკიცებულებები, რომელიც საქმეში იყო და გამქრალია, გაირკვეს სად გაქრა. თუ ეს მოთხოვნები არ შესრულდება, სამართალი სანამ არ იქნება დამდგარი, აქედან ფეხს არ მოვიცვლი. რატომ ? იმიტომ რომ საქმე ეხება შვილს, ცოცხალ არსებას და მე ვარ დედა, ვარ პასუხისმგებელი რომ ის გაიზარდოს ჯანმრთელი, როგორც ფიზიკურად, ასევე ფსიქოლოგიურად.
_ ვისთვის მიგიმართავთ ამ მოთხოვნებით?
_მივმართე პროკურატურას, სახალხო დამცველსაც , პრემიერ-მინისტრსაც მივწერე, მაგრამ არანაირი შედეგი, არანაირი გამოხმაურება. პროკურატურამ ერთადერთი რაც გააკეთა, ბავშვი ჩამოიყვანა სამხარაულის ექსპერტიზის ბიუროში, მაგრამ მე ვუთხარი, რომ სანამ ბავშვი არ იქნება მოძალადე ოჯახიდან გამოყვანილი, ექსპერტიზა ვერ ჩატარდება. არ დამიჯერეს და ნახეს თავიანთი თვალით. ვითხოვ, კანონის შესაბამისად იმოქმედონ. ოზურგეთი ცალკე სახელმწიფო არაა, ეს საქართველოა და როგორ შეიძლება ქალზე და ბავშვზე ძალადობის საქმე ამდენი ხანი იყოს განუხილავი.
