დღეს, ოზურგეთის მუნიციპალიტეტის სოფელ შემოქმედში„პარვუს 1“, „პარვუს 2“, „პარვუს 3“, „პარვუს 4“ გზშ-ის განხილვა მოეწყო. შეხვედრაზე დამოუკიდებელმა ექსპერტმა, სოფლის და გარემოს დაცვის სამინისტროს და გარემოს ეროვნული სააგენტოს წარმომადგენლებმა დამსწრე საზოგადოებას ესაუბრნენ ჰესის დეტალებზე.
საზოგადოებისთვის ჩვენი სააგენტოდან კარგად არის ცნობილი, რომ „პარვუს ჯგუფი“, პირველ რიგში, სამი მცირე ჰესის მშენებლობას აპირებდა. წელს კი ცნობილი გახდა, რომ სამ ჰესს კიდევ ერთი ჰესი დაემატება და მთლიან ჯამში, ოცი, დაახლოებით, 30-მეგავატიან ჰესს ააშენებენ.
2-საათიანმა შეხვედრამ მშვიდ გარემოში ჩაიარა. ყველაზე მეტი კითხვები სოციალურ პროექტებზე გამოყოფილ თანხებზე იყო.
„შემოქმედის საჯარო სკოლა არის ამ სოფლის ერთ-ერთი სავიზიტო ბარათი. ამ ეტაპისთვის ყველაზე მეტად გვჭირდება წყლის პრობლემების მოგვარება და იმედი მაქვს, სოციალური პროექტებისთვის გამოყოფილი თანხებით ეს საკითხიც მოგვარდება“, _ აღნიშნა თავისი სიტყვით გამოსვლის დროს ნინო სადრაძემ.
შეხვედრაზე კომპანიის წარმომადგენლებისგან ითქვა, რომ ჰესების აშენებამდე სოციალურ პროექტებისთვის 700 000 ლარი დაიხარჯება, ხოლო ჰესების მშენებლობის დასრულების შემდეგ კი ყოველწლიურად 200 000 მოხმარდება სოფელს.
ამ ეტაპზე მიდის საუბარი იმ ფორმებზე, თუ როგორ მოხდება ამ ფულის გახარჯვა. კომპანიის წარმომადგენლებმა აღნიშნეს, რომ სოფელში მცხოვრებლებისგან პრობლემურ საკითხებს შეისწავლან და იმის მიხედვით მოხდება პროექტების შესრულება.
შეხვედრაზე მოსული სტუმრები _ ვახუშტი მენაბდე და გიორგი მეხუზლა დაინტერესდნენ, რა რაოდენობის წყალს დატოვებენ ეკოსისტემის საარსებოდ?
„ეკოლოგიურ ხარჯად ითვლება წყლის ის რაოდენობა, რომელიც მუდმივად უნდა მიედინებოდეს კალაპოტში მდინარის ეკოსისტემის შესანარჩუნებლად. ჰიდროტექნიკური ნაგებობების პროექტირებისას გამოიყენება გავრცელებული პრაქტიკაა, რომელიც ითვალისწინებს საშუალო მინიმალური ჩამონადენის 10% დატოვებას მდინარის კალაპოტში, ან ხარჯს საშუალო წლიური ჩამონადენის 90-99% უზრუნველყოფის სიდიდეებს შორის. ზემოქმედებას დაქვემდებარებულ მდინარესთან დაკავშირებული, მათ შორის იქთიოფაუნის და ზოგადად მდინარის ეკოლოგიური გარემოსთვის განსაზღვრული ეკოლოგიური ხარჯ(ებ)ის საკმარისობის საკითხის შეფასება და შესაბამისი შემარბილებელი ღონისძიებები ასახულია გზშ-ს ანგარიშში, ამასთან აღსანიშნავია, რომ საერთაშორისო სტანდარტებით (FAO) რეკომენდებული 10%_ზე მეტი წყალი რჩება რეალურად კალაპოტში, წლის ჭრილში თუ განვიხილავთ ესაა: ბასრა 1-ის შემთხვევაში 21%, ბასრა 2- 27%, ბასრა 3- 15%, ბასრა 4- 18%,“ – უპასუხა კითხვის ადრესატებს „პარვუს ჯგუფის“ წარმომადგენელმა.
რა ხდება გზშ-ს განხილვის შემდეგ? _ამ კითხვით გარემოს ეროვნული სააგენტოს წარმომადგენელს მივმართეთ. მისი თქმით, სააგენტო ექსპერტების დახმარებით მოხდება დღევანდელი შეხვედრის შესწავლა, რის შემდეგ გახდება ცნობილი მიიღებს თუ არა „პარვუს ჯგუფი“ ჰესების მშენებლობის ნებართვას მდ.ბჟუჟას ხეობაში. შეხვედრაზე ასევე ითქვა, რომ ხეობაში ოთხი ჰესის შენობის მშენებლობა თითქმის დასრულებულია.
„გურია ნიუსი“ ვრცელ სტატიას შეხვედრის შესახებ მოგვიანებით შემოგთავაზებთ.
