“გურიის ამომრჩეველი საკმაოდ კარგად არის ინფორმირებული ქვეყანაში არსებული მდგომარეობის შესახებ”

საპარლამენტო არჩევნებამდე ორ კვირაზე ნაკლები რჩება. გურიაში წინასაარჩევნო შეხვედრებს მმართველი პარტია და ოპოზიცია თითქმის ყოველდღე ატარებენ.

“გახარია საქართველოსთვის” პოლიტსაბჭოს წევრი გიორგი შარაშიძე “გურია ნიუსთან” საუბრის დროს ამბობს, რომ გურიაში წინასაარჩევნო შეხვედრების ჩატარებაში დაბრკოლება არ აქვთ:

“მაგრამ ეს არ ნიშნავს იმას, რომ საარჩევნო გარემო სამართლიანია _ “ოცნებას” არჩევნების გაყალბების პროცესი დიდი ხნის წინ აქვს დაწყებული, რაზეც ჩვენ არაერთხელ გვისაუბრია. ამომრჩევლის დაშინება, ადმინისტრაციული რესურსის გამოყენება, სოციალური დახმარებისა თუ საჯარო სამსახურის დაკარგვით დამუქრება არის თუ არა არჩევნების წინასწარ გაყალბება? რა თქმა უნდა, არის, რადგან სახეზეა მოქალაქის თავისუფალ ნებაზე უხეში ზემოქმედება.

“ოცნების” მიერ ყველა სახელმწიფო ინსტიტუტის მიტაცება და პარტიულ ვერტიკალზე დაქვემდებარება, ასევე, სისტემური პოლიტიკური კორუფცია, საიდანაც ხდება მმართველი პარტიის საარჩევნო კამპანიის დაფინანსება, არის თუ არა არჩევნების გაყალბების მცდელობა? რა თქმა უნდა არის.

სულ ახლახან ვიხილეთ სუს–ის მიერ დადგმული მორიგი უნიჭო სპეცოპერაცია გურიაში, თითქოს პარტია “გახარია საქართველოსთვის” ერთ–ერთმა პირმა დატოვა. სინამდვილეში ეს ადამიანი ბოლო წლებია საერთოდ არ მონაწილეობდა პარტიულ საქმიანობაში. ასეთი დეზინფორმაციებისა და ყალბი ამბების გავრცელებით ცდილობს “ოცნება” ძალაუფლების გახანგრძლივებას, რაც არ გამოუვათ, რადგან ხალხი ყველაფერს ხვდება!”

კითხვაზე, კონკრეტულად რა საკითხების მოგვარებას ითხოვს ამომრჩეველი პოლიტიკოსებისგან, ამ კითხვაზე შარაშიძე გვპასუხობს:

“ამომრჩეველს ძირითადად საბაზისო პრობლემების მოუგვარებლობა აწუხებთ. გურიის სოფლების უმრავლესობას ჯერ კიდევ არ აქვს სასმელი წყალი, ბევრი სოფელი საბავშვო ბაღისა და საშუალო სკოლის გარეშეა დარჩენილი და ბავშვებს კილომეტრების გავლა უწევთ. ოზურგეთის მუნიციპალიტეტის ერთ–ერთ ყველაზე დიდ სოფელს _ ნატანებს, სადაც ასზე მეტი ბავშვია, ბაღი არ აქვს, სოფელ გურიანთაში კი “ოცნების” დეპუტატის ოჯახის წევრის კომპანიამ მილიონ ორასი ათასი ლარი გაფლანგა და როცა ივლისში ბაღის მშენებლობა უნდა დასრულებულიყო, ჯერ კიდევ არაფერია გაკეთებული. ასე იფლანგება ხალხის ფული, რასაც ჩვენი გუნდი წერტილს დაუსვამს და კორუფციას ერთხელ და სამუდამოდ აღმოფხვრის.

ასევე, ჩვენი საარჩევნო პროგრამის ნაწილია კრიტიკული ინფრასტრუქტურის მოწესრიგება _ მომდევნო ოთხ წელიწადში ყველა სოფელს უნდა ჰქონდეს სასმელი წყალი, ამისთვის კი საჭიროა, პრიორიტეტების სწორად განსაზღვრა.

როგორ შეიძლება ორ მილიონ ლარს ოზურგეთის ცენტრალური მოედნის რეაბილიტაციასა და კუბოს ფორმის საყვავილეებში ხარჯავდე, ამ დროს კი სოფლებს წყალი არ ჰქონდეთ და უსახლკაროთა ადამიანურ პირობებში ცხოვრების პრობლემა გადაუჭრელი იყოს?! ნამდვილად შემზარავი სურათი დაგხვდა სოფელ მერიაში, სადაც უსახლკარო ადამიანებს ელემენტარული პირობები არ აქვთ“, _ ამბობს გიორგი შარაშიძე.

პარტია “ძლიერი საქართველოს” საარჩევნო შტაბის წევრი მალხაზ ჩხიკვაძე ჩვენთან საუბრის დროს აღნიშნავს, რომ გურიაში წინასაარჩევნო გარემოს მხრივ არაფერი მოულოდნელი და განსაკუთრებული არ არის:

“რაიმე სიახლე და ახალი მეთოდი ჯერ ხელისუფლებას არ შემოუთავაზებია. როგორც ხდება ხოლმე, ხშირია ოპოზიციიდან დანიშნულ კომისიის წევრებთან არც თუ ისე მისაღები და სასიამოვნო გასაუბრება, ჩვეული დაშინება… ჩვენგან დანიშნულმა კომისიის რამდენიმე წევრმა ამის გამო უარი თქვა კომისიაში მუშაობაზე. თუმცა, ეს არც ახალი და არც მოულოდნელია. რაც შეეხება წინასაარჩევნო შეხვედრებს, უფრო კარდაკარის კამპანიას ვატარებთ, როდესაც ყველა გემოვნების ამომრჩეველი გვხდება. ამ გზით ვიცავთ ოპოზიციურად განწყობილ ამომრჩეველს ხელისუფლების წარმომადგენლების და მათი გულშემატკივრების მომაბეზრებელი და შემაწუხებელი სტუმრიანობისგან“, _ ამბობს მალხაზ ჩხიკვაძე,

ჩვენს მთავარ კითხვაზე _ კონკრეტულად რა საკითხების მოგვარებას ითხოვს ამომრჩეველი პოლიტიკოსებისგან, მან ვრცელი პასუხი გაგვცა:

“გურიის ამომრჩეველი საკმაოდ კარგად არის ინფორმირებული ქვეყანაში არსებული მდგომარეობის შესახებ და მოსაგვარებელ საკითხებიც მკვეთრად არ განსხვავდება სხვა რეგიონის მოქალაქეების პრობლემებისგან. ყველას საერთო სურვილია, იცხოვრონ ძლიერ და მდიდარ სახელმწიფოში, სადაც დაფასებული იქნება ღვაწლმოსილი და ასაკოვანი მოქალაქეები, ახალგაზრდებს კი საკუთარი ნიჭისა და შესაძლებლობების რეალიზაციის მაქსიმალურად ხელსაყრელი პირობები ექნებათ; საშუალო და უფროსი ასაკის მოქალაქეებისთვის მნიშვნელოვანია 1000-ლარიანი პენსია, რაც რეალურია და ჩვენს კოალიციას ამ  დანაპირების შესრულების გეგმა დეტალურად აქვს გაწერილი.

გარდა 1000-ლარიანი პენსიისა, მოსახლეობას არანაკლებად აწუხებს უმუშევრობა, მაღალი პენსია ძალიან კარგია, ამას ყველა ხვდება, მაგრამ მათ ამ პენსიით საკუთარი შვილიშვილებისათვის საჩუქრების ყიდვაც უნდათ და შეწუხებულები არიან იმ არასასურველი პერსპექტივით, რაც “ქართული ოცნების” ხელისუფლებაში დარჩენის შემთხვევაშია მოსალოდნელი, რასაც შეიძლება ახალგაზრდების ემიგრაციაში მასობრივად წასვლა მოჰყვეს _ რამდენად მძიმეა, როდესაც სხვა ქვეყანაში ეგულებათ შვილი ან შვილიშვილი და წლობით შეიძლება ვერ ნახონ.

ყველას აწუხებს უმუშევრობა, სამუშაო ადგილების სიმცირე, რის გამოც იძულებულები არიან ან დაბალანაზღაურებად სამუშაოს დათანხმდნენ, ან ბედი ისევ ემიგრაციაში სცადონ. იმისთვის, რომ შეჩერდეს საქართველოდან ყოველწლიურად მზარდი ემიგრაცია, სასიცოცხლოდ აუცილებელია ახალი სამუშაო ადგილების შექმნა _ 200 000 ათასი სამუშაო ადგილი, ღირსეული ანაზღაურებით ამ პრობლემის მოგვარებისკენ გადადგმული საკმაოდ სერიოზული ნაბიჯი იქნება, ანაკლიის პორტის უმოკლეს ვადაში აშენება იქნება ეს თუ ქუთაისში ფინანსური და ლოჯისტიკური ცენტრის შექმნა. თანაც ქუთაისი საკმაოდ ახლოსაა ჩოხატაურთან….

გარდა ამ საკითხებისა, ჩვენმა მოსახლეობამ საკმაოდ კარგად იცის, თუ რამდენად მნიშვნელოვანია საქართველოს ევროკავშირში გაწევრიანება. ევროკავშირი რომ ქვეყნის განვითარების სულ სხვა დონის შესაძლებლობაა, ამის ახსნისთვის დიდი დრო არც გვეხარჯება. ხალხი შეწუხებულია მთავრობის ანტიევროპული ქმედებებით, და მშვენივრად ხვდებიან, რომ თუ ევროკავშირისკენ და დასავლური ცივილიზაციისკენ მჭიდრო ურთიერთობით არ განვითარდა ქვეყანა, მაშინ რუსეთის, ამ ბოროტების და სისხლიანი იმპერიის წინაშე, მარტო დავრჩებით. ყველასთვის ნათელია, რომ მხოლოდ ძლიერ მოკავშირეებთან თანამეგობრობით გახდება ჩვენი ქვეყანა ძლიერი, მშვიდობიანი და აყვავებული. მხოლოდ ძლიერი საქართველო შეძლებს მიმზიდველი ქვეყნის აშენებას, რაც ტერიტორიული მთლიანობის აღდგენის ყველაზე კარგი წინაპირობაა. არავის მოსწონს თავზე ნაცარწაყრილი მთავრობა, რომელიც მზადაა ოკუპანტს ბოდიში მოუხადოს“, _ ამბობს მალხაზ ჩხიკვაძე.

სამოქალაქო აქტივისტი, ოთარ რევიშვილი “გურია ნიუსთან” საუბრის დროს ამბობს, რომ ხელისუფლება ყველაფერს აკეთებს იმისთვის, რომ ადამიანებმა განსხვავებული აზრი არ დააფიქსიროს:

“პირველ რიგში, შევაფასებ სახელისუფლებლო პარტიის კამპანიას, რომელიც აწყობილია სიძულვილზე და შიშზე. ამის მაგალითია ის სამარცხვინო პლაკატები, რომლებიც ამ დღეებში ვიხილეთ ქუჩებში. ხელისუფლება ცდილობს კაპიტალიზაცია მოახდინოს მხოლოდ ადამიანის შიშებზე და ამით შეძლონ ხმების მოპოვება _ ოზურგეთში გამართულ შეხვედრებზე თუ ვისაუბრებთ, მათ არც ერთ შეხვედრაზე არც ეკონომიკურ, არც სოციალურ და ჯანდაცვის პოლიტიკის მიმართულებით დაპირებები არ გაუციათ.

მოკლედ რომ ვთქვა, წინასაარჩევნო პერიოდი მძიმეა _ ხელისუფლება ცდილობს, გააჩუმოს სამოქალაქო საზოგადოებრივი ორგანიზაციები და გამოთიშოს საარჩევნო პროცესებიდან. კარგად დავინახეთ, როგორი შეტევა განახორციელეს “საერთაშორისო გამჭვირვალობა საქართველოზე” და კოალიცია “ჩემი ხმა“-ზე, მაგრამ საბოლოოდ არაფერი გამოუვიდათ _ მეგობარი ქვეყნების და ადგილობრივი სამოქალაქო ორგანიზაციების ძალისხმევით ეს საკითხი ამ ეტაპისთვის შეჩერებულია. ასევე, არის თავდასხმები არის ოპოზიციური პარტიების წევრებზე.

რაც შეეხება ოპოზიციის ნაწილს, თუ შევადარებთ სახელისუფლებლო პარტიის აქტივობებს, ოპოზიციური პარტიების აქტივობები, ჯერჯერობით, პასიურია. ალბათ, არჩევნების მოახლოებასთან ერთად, მეტად გააქტიურდებიან. ოპოზიციის სხვადასხვა ჯგუფებს აქვს რაღაცა სახის დაპირებები და კონკრეტული გზავნილებიც და ხედვებიც ღიად დააფიქსირეს. თუმცა, რამდენად მიდის ეს ეს გზავნილები და მათი ხმა ამომრჩევლებამდე, ამაზე პასუხის გაცემა მიჭირს. ისინი არ არიან ისეთი აქტიურები, როგორც მმართველი პარტია. მმართველ პარტიას აქვს დიდი ადმინისტრაციული რესურსი და ამას კარგად იყენებს თავისთვის _ იგი ცდილობს, ყველანაირი განსხვავებული აზრის მქონე ადამიანებს ხელი შეუშალოს“, _ აღნიშნა ოთარ რევიშვილმა ჩვენთან საუბრის დროა.

“გურია ნიუსი” ეტაპობრივად სხვა პარტიების წარმომადგენლების მოსაზრებებსაც შემოგთავაზებთ.