ოზურგეთში, ფოლკლორის ცენტრში, ოზურგეთელი ავთანდილ ბერიშვილის წიგნის “ნაგომრიდან ლევილამდე” პრეზენტაცია შედგა.
წიგნის, რომლის შესახებაც „გურია ნიუსი“ ადრეც წერდა, ამჯერად საზოგადოების წინაშე საინტერესოდ წარდგენა მოხდა. ის მოიცავს გასული საუკუნის დასაწყისიდან ვიდრე დღემდე, გურიის, სრულიად საქართველოს და მეორე საქართველოდ წოდებული ”ლევილის” მკვიდრთა ცხოვრებას.
„პროფესიონალი ლიტერატორი ვარ და მეტ-ნაკლებად შესაფერისად ვიცნობ მსოფლიო ლიტერატურის ისტორიას, ლიტერატურულ პროცესებს და არ მახსენდება მწერალი, რომელსაც 68 წლისა და 6 თვისას აეღოს ხელში პირველად კალამ-კალმისტარი, გარდა ავთანდილ ბერიშვილისა…“ _ კეთილი იუმოროთ მიესალმა პოეტი, მთარგმნელი და ლიტერატორი ჟურნალისტი თამაზ ხარაიშვილი მეგობრის წიგნის განხილვას.
როგორც ავთანდილ ბერიშვილი ამბობს, პერსონაჟები ცნობილი თუ არაცნობილი რეალური ადამიანებია, სიუჟეტები ნამდვილ ამბებზეა დაფუძნებული და რაც მთავარია, მკითხველს წასაკითხად იწვევს.
_თავი არ დამიზოგავს და უამრავი დოკუმენტური მასალის მოძიებით და მომარჯვებით ვეცადე, მეოცე საუკუნის ისტორიული პიროვნებების ცხოვრების და საქმიანობის შესახებ ამბები მხატვრულად გადმომეცა, _ ამბობს ავთანდილ ბერიშვილი.
წიგნის პრეზენტაციაზე საინტერესოდ და სიყვარულით ისუბრეს გამომსვლელებმა. ყველამ აღნიშნა ის გარემოება, რომ ამ წიგნში საინტერესოდ და ემოციურად არის მოთხრობილი გურიის და გურულების ამბავი, რომელიც მათი ემიგრაციის წლებს ეხება.
_ყველაზე სასიხარულოა ის ფაქტი, რომ ნაწარმოების გმირების შთამომავლები პარიზიდან ჩამოვიდნენ, _არაერთხელ გაისმა აქ.
პრეზენტაციას საგანგებოდ პარიზიდან ჩამოსული წიგნის გმირების შთამომავლები, ბატონები ტიერ ბერიშვილი და ლავრენტი ჩხაიძე ესწრებოდნენ.
ლავრენტი (ლორან ჩხაიძე) ფრანგულ ქართული ასოციაცია ,,გაუმარჯოს საქართველოს,, მდივანია, ტიერი კი თავჯდომარე. ტიერ ბერიშვილი ასევე ლევილის საქართველოს მუზეუმების გაერთიანების გენერალური დირექტორის მოადგილეა.
“გული“…გული“…_ არაერთხელ გაიმეორეს მათ პრეზენტაციაზე გამოსვლისას და ეს ემოცია უკვე ყველაფრის მთქმელი იყო…
ავტორი
