საქართფველოს პრეზიდენტის არჩევნებში მონაწილეობას აფხაზეთის უმაღლესი საბჭოს ორი დეპუტატი _ ზურაბ ჯგებურია და თემურ მჟავია არ მიიღებენ.
“მენტალურ რუსს ქვეყნის პრეზიდენტად ვერ ავირჩევ და საერთოდ, არც ამ არჩევნების სამართლიანობას და მის ლეგიტიმურობას ვიზიარებ”, – თქვა აფხაზეთის ავტონომიური რესპუბლიკის უმაღლესი საბჭოს დეპუტატმა ზურაბ ჯგუბურიამ.
იგი დღეს პარლამენტში მისვლას და საარჩევნო კოლეგიის ფარგლებში, პრეზიდენტის არჩევნებში მონაწილეობის მიღებას არ აპირებს.
„მე არ მჭირდება რჩევა, თუ სად და ვისთან დავდგე – მე საკუთარი აზრით, მსოფლმხედველობით და ჩემი ქვეყნისთვის, მეგობარ-თანამემამულეებისთვის, ქართველი ახალგაზრდებისთვის, ჩემი დიდი ოჯახის, შვილების-შვილიშვილების ბედნიერი მომავლის რწმენით ვცხოვრობ ამ ქვეყანაზე“, – ნათქვამია ზურაბ ჯგუბურიას განცხადებაში.
პარლამენტში მისვლას არ გეგმავს არც აფხაზეთის უმაღლესი საბჭოს კიდევ ერთი დეპუტატი თემურ მჟავია:
„მე, აფხაზეთის ავტონომიური რესპუბლიკის უმაღლესი საბჭოს დეპუტატი უარს ვაცხადებ საქართველოს დე ფაქტო ხელისუფლებასთან თანამშრომლობაზე და ბოიკოტს ვუცხადებ მიმდინარე წლის 14 დეკემბერს დაგეგმილ საქართველოს პრეზიდენტის არჩევნებს“, – განუცხადა მჟავიამ „ინტერპრესნიუსს“.
