შინაგან საქმეთა სამინისტროს საგანგებო სიტუაციების მართვის სამსახურმა, რამდენიმე დღის წინ, ლანჩხუთის მუნიციპალიტეტში, სამოქალაქო უსაფრთხოების მიმართულებით სწავლება ჩაატარა.
ლანჩხუთის მერიის მიერ გავრცელებული ინფორმაციით, სწავლების მიზანს, სამოქალაქო უსაფრთხოების საკითხებზე, მუნიციპალიტეტის თანამშრომლების ცნობიერების ამაღლება, მუნიციპალური საგანგებო მართვის გეგმის შემუშავება, განხილვა და შესაბამისი რეკომენდაციების გაცემა წარმოადგენდა.
“სწავლების პროცესში, მუნიციპალიტეტის თვითმმართველობის წარმომადგენლებთან ერთად, ჩართულები იყვნენ შინაგან საქმეთა სამინისტროს შესაბამისი დანაყოფები და ადგილობრივი მოხალისეები.
აღნიშნულის ფარგლებში, ადგილობრივი თვითმმართველობის წევრებისთვის და მოსახლეობისთვის, სახანძრო–სამაშველო სპეციალური ტექნიკისა და აღჭურვილობის გამოფენა მოეწყო“, _ ვკითხულობთ მერიის მიერ გავრცელებულ ინფორმაციაში.
ამ ფაქტს საკრებულოს წევრი “ერთიანი ნაციონალური მოძრაობიდან”, ირმა მგელაძე ეხმაურება, რომლის თქმით, ლანჩხუთის სამაშველო სამსახურს ტექნიკისა და აღჭურვილობის პრობლემა აქვს, რაც საჭიროა გადაუდებელი და უბედური შემთხვევების დროს ქმედითუნარიანობისთვის:
“ბავშვობაში ყველას გვითამაშია _ “მე რაღაცა მაქვსო, შენ არა გაქვსო“…
ზუსტად ამას ჰგავდა შინაგან საქმეთა სამინისტროს მიერ ჩატარებული “სწავლების” ღონისძიება!
როცა ჩამოდიხარ ამ დაქცეულ მუნიციპალიტეტში და სახანძრო–სამაშველო სამსახურიდან 50 მეტრში ატარებ რაღაცა სწავლებას, ბოლო–ბოლო უნდა შეგრცხვეს იმ სამსახურის, რომლისთვისაც არც ერთი ერთეული ტექნიკა არ შეგიძენია.
ერთი სახანძრო მანქანა პოლონელებმა გვაჩუქეს და 26 000 ლარი დაჯდა მისი გარემონტება, სხვა ყველაფერი მოძველებული და ნახევრად გამოუსადეგარია. კიდევ ერთი პიკაპი ჰყავთ, რომელიც ჩვენს დროს შევუძინეთ.
როცა ასეთი კითხვა დავუსვი სწავლების ხელმძღვანელს, როგორ გეკადრებათო, ჩაცმულ–დახურულები, ნაჭამ–ნასვამები არიანო და ხელფასები აქვთო… მერე ეს შველის ხანძრის ჩაქრობას მეთქი? გვაცალეთ, ბატონო, გვაცალეთო…
არადა, რამდენჯერ მინახავს თვალცრემლიანი მაშველები, ჩვენები, რომლებსაც არანაირი საშუალება არა აქვთ ხანძრის ჩასაქრობად, არც დროის ფაქტორით და არც გამართული ტექნიკით!
ლანჩხუთი ტერიტორია ვართ, თორემ არც რკინიგზის სადგური გვაქვს, არც სახანძრო–სამაშველო და არც ერთი ისეთი საავადმყოფო (მრავალპროფილიანი), სადაც გადაუდებლად შეუძლიათ მომსახურება.
არადა, უკვე 13 წელია დუღს ეკონომიკა…სამაგიეროდ თითქმის გაორმაგდა სოციალურად დაუცველთა რიცხვი, ხოლი თითქმის 400 ბავშვით შემცირდა საბავშვო ბაღების კონტიგენტი…
გვაცალეთ, ბატონოო, არადა, ოზურგეთსაც აქვს უკვე ახალი სახანძრო–სამაშველო ცენტრი და ჩოხატაურსაც. ჩვენ, ზუსტად ტრასისპირა მუნიციპალიტეტს კი, არა. წლებია, მესმის, ვაკეთებთო, მაგრამ…” _ საკუთარ პოზიციას აფიქსირებს ირმა მგელაძე.
“ესენი რომ დავინახე, გამიხარდა, მეგონა, ჩვენი იყო, თურმე…
ტყუილად გადაყრილი ათასობით ლარი, არაფრის მომცემ ვითომ სწავლებებში და ტრენინგებში. მაშველი, რომელიც იქეთაა საშველი. დიდი პატივისცემა ჩვენგან სამაშველო სამსახურს, მაგრამ რა ქნან ტექნიკის და დამხმარე აღჭურვილობის გარეშე? სამაგიეროდ, Black Sea Arena-ს ჰყავს კარგად გამართული სამაშველო რაზმი, თავისი ტრანსპორტით და ტექნიკით, რომელიც ივანიშვილის საცხოვრებელ ვილაში და სასტუმრო პარაგრაფში ხეებს და მცენარეებს რწყავს“, _ ლანჩხუთის მერიის წინ გამართულ სამოქალაქო უსაფრთხოების სწავლების ფაქტს ეხმიანებიან რიგითი ლანჩხუთელებიც.
საგულისხმოა, რომ მგელაძის მხრიდან ლანჩხუთის სამაშველო სამსახურის თემის წამოწევა არახალია. 2022 წლის თებერვალში, საკრებულოს სხდომაზეც გააკეთა მან ამ კუთხით განცხადება და ადგილობრივ ხელმძღვანელობას კითხვით მიმართა, თუ რა კეთდება პრობლემის გადასაჭრელად.
“რამდენი წელია, რაც “ოცნება” ხელისუფლებაშია და ერთი ცალი ტექნიკაც კი არავის შეუძენია.
ეს ერთი თემა მაინც მოვაგვაროთ ლანჩხუთელებისთვის ამ მოწვევის საკრებულომ, ოპოზიციაც დაგიდგებით ყველანაირად გვერდში, მარტო ხელფასების აღება და პროცედურული დემოკრატია არ კმარა. ბატონო ალექსანდრე, შეხვედრიხართ შსს მინისტრს, გისაუბრიათ ამ თემაზე?” _ კითხვით მიმართა ოპოზიციონერმა დეპუტატმა მუნიციპალიტეტის მერს ალექსანდრე სარიშვილს.
“არის საუბარი ახალი სახანძრო–სამაშველო სამსახური გაკეთდეს იქ, სადაც წლების წინ იყო, ტექნიკის განახლებაზეც არის საუბარი“, _ ასეთი იყო კითხვის უშუალო ადრესატის მხრიდან გაკეთებული მაშინდელი განმარტება.
“გურია ნიუსი” დაინტერესდა სამი წლის შემდეგ რა ეტაპზეა ზემოთ ნახსენები “საუბრები” და მეტი დეტალის გასარკვევად მერიის პიარს, მაკა სულაბერიძეს დაუკავშირდა, რომელმაც საგანგებო სიტუაციების მართვის სამსახურთან გადაგვამისამართა, იქ უფრო დაწვრილებით ინფორმაციას მოგაწვდიანო.
თემასთან დაკავშირებით ინფორმაციის მისაღებად “გურია ნიუსმა” მიმართა აღნიშნულ უწყებას და ახლა მათგან პასუხის მოლოდინში ვართ.
ავტორი
