“შარშანდელზე ნაკლები ფასებია, ცოტათი, მაგრამ მაინც…” _ წინასააღდგომო ბაზარი ოზურგეთში

დიდი დღესასწაულების წინ, განსაკუთრებით, სააღდგომოდ, ფასების ზრდის ტენდენცია და ასევე, მისადმი ინტერესი ყოველთვის დიდია.

ოზურგეთის ბაზარში, მუდამ მხიარულად და გულღიად მოსაუბრე, ამ სივრცეში ყველა წვრილმანის მცოდნე, შპს “სოფლის ნობათის” დირექტორი, სოსო სიხარულიძე აქ მოვაჭრეებთან, შარშანდელ ამბებს იხსენებს და ხუმრობასაც არ იშურებს:

_ არ გახსოვთ, შარშან ბადრიჯნის ფასი რვა ლარს რომ გადაცდა? ახლა ერთი კილოგრამი 5 ლარი ღირს. ყველის ფასიც შედარებით ნაკლებია _ ერთ კილოგრამს 11-12 ლარად იყიდი. აი, გოჭის ფასზე რა გითხრათ _ ჯერ არ გაძვირებულია, მაგრამ აღდგომამდე 4-5 დღით ადრე, სავარაუდოდ, ფასი აიწევს, _ ამბობს ის და ჩვეული კეთილი ხუმრობით, თანამშრომლებს (ასე ეძახის აქ მოვაჭრეებს) აიმედებს, შარშანდელზე ნაკლები ფასები კი არის. მართალია, ცოტათი, მაგრამ ეს მაინც კარგია _ თქვენ ბევრი არ მოგაკლდებათ მაგით, ვერც გამდიდრდებით და ხალხისთვის პურის ფულის დანაზოგიაო.

უპირველესი პროდუქტი, რაც სააღდგომოდ მომხმარებელს აუცილებლად შესაძენი აქვს, კვერცხი, ყველი თუ ქათამი, საკმაოდ ძვირია. ახლა კვერცხის ფასი ყოველდღე მატულობს. სოფლიდან ჩამოტანილი კვერცხი, აღდგომამდე ერთი კვირით ადრე 70 თეთრი ღირს. თუმცა, ამბობენ, რომ სააღდგომოდ ერთ ლარს მიაღწევს. ცოტათი მოიმატა რძის ფასმა _ ერთი ლიტრი 2,50-3 ლარი ღირს. ყველაზე ძვირი კი სოფლის ქათამია. ერთ კარგ დედალს 40-45 ლარზე ნაკლებად ვერ იყიდით.

გოჭის ფასი, ცოცხალი წონით, ერთი კილოგრამი 15 ლარი ღირს.

_ ჩვენ ერთი კილოგრამის ანგარიშით 12 ლარად ვიბარებთ, მერე კი 15 ლარად ვყიდით. პურის ფულისთვის ვდგავართ აქ. სააღდგომოდ სულ ძვირი ღირს, მაგრამ რა მოხდება რამდენიმე დღეში, არ ვიცით. ისე ახალ წელს თუ აღდგომას გოჭის შეძენის მსურველი სულ გვყავს. სხვა დღეებისგან განსხვავებით, _ გვეუბნებიან აქ მომუშავეები.

რძის ნაწარმზე ქვეყანაში ატეხილი სკანდალის შემდეგ, ხალხს ეგონა, რომ ფასები კატასტროფულად გაიზრდებოდა. თუმცა, კონკრეტულად ოზურგეთის ბაზარში თუ მარკეტებში აღნიშნული პროდუქტის გაძვირება არ მომხდარა.

_ სააღდგომო პასკას ხშირად ვაცხობ. რამდენიმე მომხმარებელმა წინასწარ მითხრა, პასკა შედედებული რძით დაამზადე, რძე არ იყიდოო. მე ვფიქრობ, ეს ამბები ცოტა პროვოკაციულ ელფერს ატარებს, _ გვიამბობს სალომე ლომჯარია.

_ სოფლიდან ყოველთვის დამაქვს რძე. ჩემი ძროხები მყავს. მაგათ გამოკვებას და მოვლა–პატრონობაში დაქანცული ვარ. ადამიანივით მოვლა უნდა. ახლა რძის ხარისხზე რომ ატყდა ამბავი, ცოტა შიში დამეუფლა. დილაუთენია ფეხზე ვდგავართ მე და ჩემი მეუღლე. სულ ცოტა სამი საათი გვჭირდება, დილის ამბებს რომ მოვრჩეთ _ დალაგება, მოწველა, კვება, საბალახოდ წაყვანა. ჩვენი საზრდო ეს რძეა, ჩვენი მარჩენალი ჩვენი მცირე ფერმაა. ახლა რომ ვინმემ დამაბრკოლოს, გავგიჟდები. ადრე, სააკაშვილის პრეზიდენტობისას, ფრინველის გრიპის მომიზეზებით, ჩემმა დედამთილმა 40 დედალი დაკლა. გამოაცხადეს და დააფრთხეს ხალხი. მერე ქილებში შევინახეთ. დენი მუდმივად არ იყო, რომ მაცივარში გვქონოდა. მერე ისე მოხდა, რომ სულ ტყუილი აღმოჩნდა ის პანიკა. ახლა რძე რომ “დაგვიბრაკონ“, რა მეშველება _ სააღდგომოდ რძითა და ყველით ვაპირებ ოჯახში სუფრის გაშლას. ვყიდი, რომ რომ სამაგიეროდ სხვა რამ ვიყიდო, _ გვითხრა ნასაკირალის მცხოვრებმა ნონა სურმანიძემ.

ერთი კილოგრამი ნადუღი 5 ლარი ღირს; ნახევარი ლიტრი მაწონი _ ორი ლარი; ერთი კილოგრამი ყველის ფასი, კარგა ხანია, 11-12 ლარია. ერთი კილოგრამი სულგუნი კი 16-18 ლარი ღირს.

არ გაძვირებულა სიმინდის ფქვილი. ერთი კილოგრამი სამი ლარი ღირს და წლის დასაწყისიდან ეს ფასი აქვს.

_ მე კარგად მახსოვს, ერთი კილოგრამი სიმინდის ფქვილი ოთხი ლარი რომ ღირდა. ამიტომ არ ვეთანხმები მოსაზრებას, რომ ყველაფერი ძვირდება, განსაკუთრებით, პროდუქტი… ასე ნამდვილად არაა. თუმცა, ზოგადად, სიძვირე რომ არის, ფაქტია, _ დრო და დრო საუბარში გვერთვება დირექტორი სიხარულიძე, _ თქვენს რედაქტორს მიულოცე აღდგომა, ჩემი გვარის კაცი ყოფილა, პირადად არ ვიცნობ, მაგრამ მიხარია, _ გვეუბნება და კვლავ გვიმეორებს კითხვას, რა მოხდება, რომ დაწეროთო.

აქვე შევნიშნავთ, რომ ბატონი სოსო, დიდი ხანია, ჩვენი ხელმომწერი და მკითხველია. ასევე, რამდენიმე ეგზემპლარი მუდამ მიაქვს შპს “სოფლის ნობათის” თანამშრომლებთან.

აგრარულ კულტურებს რაც შეეხება, ერთი კილოგრამი ბადრიჯანი 5-5,50 ლარი ღირს. “მწვანე ბაზრის” მოლარე-ოპერატორმა გვითხრა, რომ შესაძლოა, ფასმა მოიმატოს, შეიძლება იგივე დარჩეს, ბოსტნეული კულტურები ახლა, გაზაფხულზე მოთხოვნადია და ხშირად სხვადასხვა ფასი აქვს, როცა უცხოეთიდან შემოგვაქვსო.

მწვანილეულის ფასს რაც შეეხება, ყველა სახის, ერთი კილოგრამი ნედლი მასა 11 ლარი ღირს და სურვილისამებრ უწონიან მყიდველს. გარდა წიწმატისა და სუფრის მწვანე ხახვისა, რომლებიც მხოლოდ შეკვრებად დაფასოებული იყიდება.

რაოდენ გასაკვირიც უნდა იყოს, არ გაიაფებულა ქაფშია, რომელსაც ახლა დახლებზე ნაკლებად ნახავთ, თუმცა, ერთი კილოგრამი, სულ მცირე, ექვსი ლარი ღირს.

რაც შეეხება სააღდგომო კვერცხის შესაღებ ტრადიციულ ენდროს ფესვებს, ერთი შეკვრა კვლავ ორი ლარი ღირს.