ინტერნეტში ადამიანებს შორის სოციალური საზღვრები ფაქტობრივად წაშლილია და თითოეული ჩვენგანი შეიძლება გახდეს დაცინვის, შევიწროებისა და პირადი ინფორმაციის გავრცელების მსხვერპლი. ისეთ პოპულარულ პლატფორმებზე, როგორიცაა „ფეისბუქი“, „ტიკტოკი“ და „ინსტაგრამი“, ყოველდღიურად ვაწყდებით ნეგატიურ, შეურაცხმყოფელ კომენტარებს და ხანდახან მუქარასაც კი, რაც ტექნოლოგიებით ჩადენილი ძალადობის ფორმებია და რამაც შეიძლება, მსხვერპლი მძიმე შედეგებამდე მიიყვანოს.
ონლაინ სივრცეში განსაკუთრებით ხშირია გენდერული ძალადობა, როცა ქალების მიმართ ხდება შეურაცხმყოფელი, ღირსების შემლახავი კამპანიის აგორება და ხანდახან ამაში ასობით პირია ჩართული. კვლევები ცხადყოფს, რომ მსოფლიოში ქალების 38%-ს პირადად გამოუცდია ონლაინ ძალადობა, ქალების 85% კი სხვა ქალების მიმართ ონლაინ ძალადობის შემსწრე გამხდარა. ევროპისა და ცენტრალური აზიის ქვეყნებში, ტექნოლოგიებით ჩადენილი გენდერული ძალადობის ალბათობა 4-ჯერ უფრო მაღალია 18-24 წლის ქალების მიმართ, ვიდრე 65 წელს გადაცილებულ ქალების. იმის გათვალისწინებით, რომ საქართველოში ახალგაზრდები საშუალოდ დღეში 3,7 საათს ატარებენ ინტერნეტში და მათი 86 პროცენტი სოციალურ მედია ქსელებს იყენებს, სწორედ ისინი წარმოადგენენ ჯგუფს, რომელიც ტექნოლოგიებით ჩადენილი გენდერული ძალადობის მაღალი რისკის ქვეშ არიან.
ძალადობის ამ ფორმის მიმართ განსაკუთრებით დაუცველები არიან მოზარდები, რომელთა ფსიქოლოგიური მდგომარეობაც ხშირად პირდაპირ არის დამოკიდებული გარემოსგან მიღებულ უკუკავშირზე.
ონლაინ სივრცეში ძალადობა უკვე იმდენად დიდ გამოწვევად იქცა, რომ ადგილობრივმა და საერთაშორისო ორგანიზაციებმა თავისი უფლებამოსილების ფარგლებში საპასუხო ნაბიჯების გადადგმა დაიწყეს. გაეროს მოსახლეობის ფონდმა (UNFPA) შექმნა საინფორმაციო-საკოორდინაციო პლატფორმა, რომელიც პრობლემის აღმოსაფხვრელად სხვადასხვა აქტივობას ახორციელებს, მათ შორის არის სპეციალური მოდულის შექმნა სკოლებისთვის.
ტექნოლოგიებით ჩადენილი ძალადობის შესახებ ინფორმაციის მისაღებად ეწვიეთ გაეროს მოსახლეობის ფონდის ვებგვერდს.
რა ფორმები აქვს ტექნოლოგიურ ძალადობას, რა შედეგებამდე შეიძლება მიგვიყვანოს მან, რატომ ხდება თავდასხმის მსხვერპლი უმეტესად ქალი და როგორ უნდა დავიცვათ თავი ასეთი შემთხვევებისგან, ამის შესახებ ციფრული უსაფრთხოების ექსპერტი ნინო გამისონია საუბრობს:
- რა ფორმა შეიძლება ჰქონდეს ტექნოლოგიურ ძალადობას?
ტექნოლოგიების გამოყენებით ჩადენილი ძალადობის მსხვერპლი შეიძლება გახდეს ნებისმიერი ჩვენგანი, თუმცა როგორც წესი სამიზნეები უფრო მეტად არიან ქალები, LGBTQ+ თემის წარმომადგენლები, ეთნიკური უმცირესობა და შშმ პირები. განსაკუთრებით დაუცველები არიან მოზარდები და ახალგაზრდები, რადგან ბულინგმა და სიტყვიერი ძალადობის სხვა ფორმებმა უკვე აქტიურად გადმოინაცვლა სოციალურ ქსელებში.
