ლანჩხუთის მთავარი საფინანსო დოკუმენტის მიხედვით, მუნიციპალიტეტში არსებული დაზიანებული და ამორტიზებული გზებისა და ხიდების კაპიტალურ შეკეთება–რეაბილიტაციას 13 680 600 ლარი მოხმარდება.
დოკუმენტში საუბარია იმ პროექტებზე, რომელთა გახორციელება 2024 წელს დაიწყო და 2025 -2026 წლებში უნდა დასრულდეს.
ირკვევა, რომ ქალაქის ადმინისტრაციულ ერთეულში: გურიელის, ნინოშვილის, ურუშაძის და ყაზბეგის ქუჩების რეაბილიტაციის სამუშაოების დასრულება მიმდინარე წელსაა გათვალისწინებული.
ასევე, 2025 წელს უნდა დასრულდეს ქალაქში ბაგრატიონის, ბესიკის, გოგებაშვილის, ებრალიძის, თამარ მეფის (პირველი ეტაპი), რ. ებრალიძის, საფო მგელაძის, ჩაჩავასა და ხოფერიას ქუჩების რეაბილიტაციაც.
ცნობისთვის, ზემოთ ნახსენებ ქუჩებზე რეაბილიტაციის სამუშაოები 2024 წელს დაიწყო.
ზემოთ ნახსენები თანხა, ასევე, გათვალისწინებულია ჯურუყვეთის ცენტრალური გზისა და ლესის გზის რეაბილიტაციისთვის, სადაც სამუშაოების დასრულება 2026 წლისთვის იგეგმება.
ამავე თანხიდან ნაწილი სუფსისა და მოედანი-შრომის გზის რეაბილიტაციის სამუშაოებისთვისაა გაწერილი და ამ შემთხვევაში პროექტი მომავალი წლისთვის უნდა დასრულდეს.
ბიუჯეტის დოკუმენტის მიხედვით, ზემოთ ნახსენები თანხა ასევე მოხმარდება სტიქიის შედეგად დაზიანებული გზების , სანიაღვრე არხების და ხიდების რეაბილიტაციას, რომელთა სამუშაოებიც გასულ წელს დაიწყო და დასრულდება 2026 წელს.
“გარდა აღნიშნული პროექტებისა, სახელმწიფო ბიუჯეტიდან გამოყოფილი დამატებითი სახსრებით, აგრეთვე ადგილობრივი ბიუჯეტიდან გამოყოფილი სახსრებით და წლის განმავლობაში ჩატარებული ტენდერებით წარმოქმნილი ეკონომიებით შესაძლებელია განხორციელდეს სხვა პროექტებიც. პროექტების შერჩევა განხორციელდება მოსახლეობის მომართვიანობისა და წლის განმავლობაში წარმოქმნილი გადაუდებელი აუცილებლობის გათვალისწინებით“, _განმარტებულია მუნიციპალიტეტის მთავარ საფინანსო დოკუმენტში.
მიუხედავად იმისა, რომ ხელისუფლების მხრიდან დიდი თანხები იხარჯება ინფრასტრუქტურის კუთხით, ირკვევა, რომ ლანჩხუთის სოფლებში მაინც საკმაოდ მწვავე პრობლემებია, რაზეც თუნდაც მერიის ფეისბუქის გვერდზე მოქალაქეთა მიერ დაწერილი კომენტარები მოწმობს
ბაჩო ჩხარტიშვილი: “წყალწინდა–ომფარეთსაც მიხედეთ!!!!! სექტემბრის სტიქიის მერე რომ არაფერი გაკეთებულა და უკვე 3 წელი გადის!!!”
ნინო გიგაური: “მიხედეთ გზებს, განსაკუთრებით წყალწმინდის და ომფარეთის საზღვარს, გზა სულ აღარ არის“.
რუსო ბოლქვაძე: “ძალიან კარგია, რაც კეთდება, მაგრამ როდის უნდა გაკეთდეს შრომისუბანი– ხაჯალიის დამაკავშირებელი გზა? დავიღალეთ ამდენი ლოდინით…ასეთი საშინელი გზით დავიღალეთ..”
შეკეთება-რეაბილიტაციას 13 680 600 ლარი მოხმარდება
ავტორი
