ჩოხატაურის მუნიციპალიტეტში ნოდარ დუმბაძის ქუჩაზე დაგებულ ქვაფენილზე ბალახია ამოსული.
აღნიშნული ფოტოები “გურია ნიუსმა” დღეს გადაიღო.
ჩოხატაურის მუნიციპალიტეტის სერვისჯგუფის ხელმძღვანელი თემურ კოროშინაძე გვეუბნება, რომ ბალახს იმ კვირაში შეწამლავენ.
“სპეციალური აპარატით იმ კვირაში აუცილებლად შევწამლავთ ბალახს”,_ ამბობს კოროშინაძე.
კითხვაზე, თუ რამდენ ხანში ერთხელაა საჭირო მსგავსი პროცედურის ჩატარება, კოროშინაძე გვპასუხობს, რომ მსგავსი პროცედურა ზაფხულის განმავლობაში 3-4-ჯერ მაინც ტარდება და მსგავსი პრობლემა მხოლოდ ჩოხატაურის მუნიციპალიტეტში არ დგას.
“სამ-ოთხჯერ მაინც ვწამლავთ ზაფხულის პერიოდში. შეწამვლის პროცედურიდან 10-12 დღეში არის შედეგი და შემდეგ როცა თავიდან ამოვა ბალახი, ხელახლაა საჭირო პროცედურის ჩატარება. ეს მარტო ჩოხატაურში არ ხდება”,_ ამბობს კოროშინაძე ჩვენთან საუბრისას.
კითხვაზე, თუ რა იწვევს ფილებზე ბალახის ამოსვლას, სერვისჯგუფის ხელმძღვანელი ამას ფილებს შორის არსებულ ღარებზე მიწის მოხვედრას უკავშირებს.
ჩოხატაურის საკრებულოს ფრაქცია “ჩოხატაური საქართველოსთვის” თავმჯდომარე გოგი ბოლქვაძე კი არსებული ვითარების შეფასებისას, ამბობს, რომ სამუშაოები თავის დროზე უხარისხოდ ჩატარდა.
“სამწუხაროდ, კიდევ ერთხელ ვხედავთ ფორმალურ დამოკიდებულებას საზოგადოებრივი სივრცეების მოწყობის მიმართ. ფილები, რომლებიც პარკში და ტროტუარზე სულ ახლახან დაიგო, უკვე ბალახით არის დაფარული. ეს ნათლად მიუთითებს უხარისხო სამუშაოებზე და არათანამშრომლობაზე კონტრაქტორებთან. ეს არის არა კეთილმოწყობა, არამედ მხოლოდ ფასადური სამუშაოები, რომელსაც შედეგი არ მოაქვს. მოქალაქეებს სჭირდებათ მყარი ინფრასტრუქტურა და არა ისეთი პროექტები, რომლებიც უკვე დაწყებისთანავე მწყობრიდან გამოდის. ამასობაში ბიუჯეტიდან იხარჯება თანხა, რომელსაც მეტი გამჭვირვალობა და პასუხისმგებლობა სჭირდება”,_ ამბობს გოგი ბოლქვაძე.
ინფორმაციისთვის, ჩოხატაურში, ნოდარ დუმბაძის ქუჩაზე ინფრასტრუქტურული სამუშაოები პრემიერის ინიცირებული პროგრამის “განახლებული რეგიონების ფარგლებში ჩატარდა.
