ლანჩხუთის საკრებულოს ბოლო სხდომაზე, ერთ–ერთ საკითხად დეპუტატებმა კენჭი უყარეს “ლანჩხუთის მუნიციპალიტეტის საკუთრებაში არსებული უძრავი ქონების, პარლამენტის წევრის, გურიის დელეგატის, ვასილ ჩიგოგიძის #26 ბიუროსთვის პირდაპირი განკარგვის წესით, სარგებლობის უფლებით უსასყიდლოდ გადაცემაზე მერისთვის თანხმობის მიცემის შესახებ” ლანჩხუთის მუნიციპალიტეტის საკრებულოს განკარგულების პროექტს. საკითხი სხდომას მერიის ქონების მართვის სამსახურის თანამშრომელმა ვარდენ კვაჭაძემ გააცნო.
მისი განმარტებით, საქართველოს მოქმედი კანონმდებლობის შესაბამისად, მუნიციპალიტეტის აღმასრულებელი ორგანო, მიზანშეწონილად მიიჩნევს დაკმაყოფილდეს ვასილ ჩიგოგიძის მოთხოვნა და ლანჩხუთის მუნიციპალიტეტის მერიის ადმინისტრაციული შენობის მესამე სართულზე არსებული 2 ოთახი, პირდაპირი განკარგვის წესით, უსასყიდლოდ, უზურფრუქტის, სარგებლობის უფლებით გადაეცეს გურიის დელეგატის ბიუროს, რომ დაწესებულებამ შეძლოს მისთვის წესდებით გათვალისწინებული უფლებამოსილების განხორციელება.
სხდომაზე მყოფმა დეპუტატებმა კვაჭაძის მოხსენება მოისმინეს და მხარიც ერთსულოვნად დაუჭირეს.
იქედან გამომდინარე, რომ ოპოზიცია ბოიკოტის რეჟიმშია, საკრებულოს სხდომებს არ ესწრება და მხოლოდ ფრაქციულ მუშაობას ჯერდება, ფაქტს უკანონოდ მიიჩნევს.
“საქართველოს კონსტიტუციით გაუქმებულია მაჟორიტარული არჩევნები, საქართველოს არ ჰყავს მაჟორიტარი დეპუტატი, შესაბამისად, პარლამენტის დეპუტატის ვასილ ჩიგოგიძის ბიუროს ფუნქციონირება უკანონოა“, _ ასე აფასებს ფაქტს ენმ-ის ფრაქციის ხელმძღვანელი კახა ასკურავა.
მისი თანაფრაქციელის, ირმა მგელაძის თქმით, კი “ყველა პარლამენტარს გამოყოფილი აქვს ხარჯების თანხა და ვალდებულია, ამ ხარჯებით იფუნქციონიროს დეპუტატის ბიურომ, მოსახლეობისთვის მისაღებ კომფორტულ ადგილას, რათა შეეძლოთ დეპუტატთან ხშირი კონტაქტი. აღმასრულებელი ხელისუფლება კი ხელს უწყობს უფასოდ მიიღონ ფართი. რასაც არ ეთანხმება“.
ავტორი
